Galatia 2 - Dakota Wowapi Wakan Kin

¹ He iyohakam waniyetu ake topa, hehan ake Titos yuha, Barnabas kici Jerusalem ekta itawankanhde mda.

² Woyakapi on ekta mde c̣a, Ikcewicaśta ekta wotanin waśte omdake ciqon he hena owicawakiyaka, qa tona okinihanpi kin hena iśnaśnana owicawakiyaka; ituya waimnanke śni, qa taku śni on waimnanke kte śni heon.

³ Tuka Titos mici un kin he Helenes heca keś bakiḣdayapi kta keyapi śni.

⁴ Qa he nakun hunkawanjinkiciyapi itonpiśni kin heca, hena unkiye token Jesus Messiya on tawa unkic̣iyapi kin he iwanyakapi kta e en hipi, wowidag unyanpi kte cin heon.

⁵ Tuka hena wihiyayedan oape wanjidan hehanyan wicihukuya unyakonpi śni, wotanin waśte wowicake kin nicipi un kte cin heon.

⁶ Unkan tona wicaśta wicakinihanpi seca, qa takupi kaśta he etanhan tokeca śni, Wakantanka wicaśta itohnake kin iwanyake śni, hena wicakinihanpi seca, tuka wicoie kin en takudan omakiyapi śni.

⁷ Tuka hececa eśta, tohan bakiḣdayapi śni wotanin waśte kin he maqupi e wanyakapi qehan, bakiḣdayapi wotanin waśte Inyan qupi qon he iyececa;

⁸ Tuwe bakiḣdayapi kin on yewicaśipi kin en Inyan okihiye cin hee Ikcewicaśta ekta okihimayan;

⁹ Qa Jakob, Inyan qa Johannes kici, ipatanhdepi kin hecapi seca, wowaonśida maqupi kin he wanyakapi, hehan takodakiciyapi on Barnabas kici nape mayuzapi, unkiś Ikoewicaśta ekta unyanpi kta, qa iyepi kin bakiḣdayapi kin ekta yapi kta.

¹⁰ Tuka decedan, tona waḣpanicapi kin wicunkiksuyapi kta keyapi, unkan miś nakun hecamon tawaṭenwaya.

¹¹ Unkan Inyan Antiyoka ekta hi qehan, kici taninyan awakinica, iye iyaonpepica nakaeś.

¹² Jakob etanhan wanjikji hipi śni kin he itokam Ikcewicaśta kin om wota ece; tuka wanna en hipi, hehan tona bakiḣdayapi qon hena kowicakipe c̣a, tokan iyaye c̣a ihdonica.

¹³ Qa he opeya Juda wicaśta tokeca kin iyecen anaḣbeya econpi, hecen hena wohnaye kin on Barnabas nakun opeya yeyapi.

¹⁴ Tuka wotanin waśte wowicake kin eciyatanhan owotanna manipi śni, he wanmdaka heḣan owasin wicitokain Inyan hewakiya; Juda wicaśta nenica, tuka Ikcewicaśta kin iyecen yani kinhan, qa Juda wicaśta kin iyecece śni, tokeca e Ikcewicaśta kin Juda wicoḣan kin en ope wicayaśi he.

¹⁵ Unkiye wicaceḣpi eciyatanhan Juda wicaśta kin heuncapi, qa Ikcewicaśta waḣtanipi sa heuncapi śni;

¹⁶ Wicaśta kin woope wicoḣan kin eciyatanhan yaowotanpi śni ece, tuka Jesus Messiya wacinyanpi kin on, he sdonunyanpi kin heon unkiś eya Jesus Messiya wacinunyanpi, Messiya wicadapi kin on unyaowotanpi kta e heon, qa woope opapi kin on etanhan śni; woope wicoḣan kin eciyatanhan wicaceḣpi owasin tuwedan yaowotanpi kte śni.

¹⁷ Tuka Messiya on unyaowotanpi kta unkakitapi kin he icunhan, waḣtanipi sa heuncapi hecinhan, heon Messiya woaḣtani wowidake kin heca he. Hiya hecetu śni.

¹⁸ Taku mdujuju qon he ake piya wakage cinhan, wawaḣtani e mihdutanin.

¹⁹ Wakantanka on wani kta e heon, woope eciyatanhan, woope kin ekta mata ce.

²⁰ Messiya kici icipaweḣ omakatanpi; tuka nahaḣin wani; qa he miye śni tuka miye mahen Messiya ni un kin hee; qa wicaceḣpi kin en wani kin he Wakantanka Cinhintku wacinyanpi kin eciyatanhan wani, he iye cantemakiye c̣a miye on iyeic̣ic̣u.

²¹ Wakantanka towaonśida kin mdujuju śni; woope kin eciyatanhan wicoowotanna u kinnan, hehan Messiya ituya ṭa.