Galatia 1 - Dakota Wowapi Wakan Kin

¹ Palos yewicaśipi kin heca, wicaśta akantu kin etanhan śni, qa wicaśta on kagapi śni, tuka Jesus Messiya etanhan, qa Wakantanka Ateyapi kin, he wiconṭe etanhan najin kiye cin he nakun etanhan;

² Qa hunkawanjin kiciyapi mici unpi kin owasin ko, Galatia ekta okodakiciye kin wowapi unnicagapi.

³ Wowaonśida, wookiye ko, Wakantanka Ateyapi kin, qa Jesus Messiya Itancan unkiyapi kin etanhan, nicipi un nunwe.

⁴ He iye waunḣtanipi kin on ic̣ic̣u, wicoicage śice cin de etanhan eunhdakupi kta, Wakantanka Ateunyanpi tawacin kin eciyatanhan:

⁵ He ohinniyan owihanke wanin wowitan kicihan nunwe. Amen.

⁶ Tuwe Messiya towaonśida kin inicopi kin kohanna aduśtanpi, qa wotanin waśte tokeca en oyapapi kin, heon imanihan manka.

⁷ He nakun tokeca śni, tuka wicaśta wanjikji nagiyeniyanpi, qa Messiya tawootanin waśte kin ayuśtan niyanpi kta tuka.

⁸ Tuka he unkiś unkiyepi, qa iś ohnihde wan maḣpiya kin eciyatanhan kin, wotanin waśte unkoniciyakapi qon he ohna śni, tuka tokeca oniciyakapi kinhan, wośnapi un nunwe.

⁹ Unkeyapi qon hecen ake nakaha epe, tuwe wotanin waśte iyacupi qon kici okonwanjidan śni kin oniciyakapi kinhan, he wośnapi un kte.

¹⁰ Wicaśta qa Wakantanka, unma tukte cinwicawakiya he; qa wicaśta kin iyokipiwicawaya awakita he. Wicaśta kin iyokipiwicawaya unkanś, Messiya wowidagmaye kte śni tuka.

¹¹ Mihunkawunji he de ociciyakapi, wotanin waśte omdake ciqon he wicaśta akantu kagapi śni;

¹² Qa wicaśta kin etanhan iwacu śni, qa iye omakiyakapi śni, tuka Jesus Messiya oyake cin eciyatanhan onmaspe.

¹³ Juda wicoḣan en opeya waun qehan, token owaḣanmde cin nayaḣonpi; Wakantanka taokodakiciye, kin nina śicaya wakuwa, qa mdujuju.

¹⁴ Qa mitaoyate kin en tona om akinimaskokeca kin hena ota Juda wicoḣan kin en kawicawape c̣a, mihunkakepi wohdakapi qon iyotan nina tewaḣinda.

¹⁵ Tuka Wakantanka inn tezi kin etanhan imacu, qa iye towaonśida kin on mico kin he,

¹⁶ Iye Cinhintku kin sdonye mayan iyokipi qehan, Ikcewicaśta wotanin waśte kin owicawakiyake kte cin heon, kohanna wicaceḣpi, wicawe ko, kici wowahdake śni:

¹⁷ Qa Jerusalem ekta tona mitokapa tanhan jewicaśipi qon hena ekta wicawai śni, tuka Arabia ekta imdamde c̣a, ake Damaskos ekta icicawin wahdi.

¹⁸ Hehan waniyetu yamni iyohakam Inyan kici wowahdake kta e Jerusalem ekta wai, qa anpetu ake zaptan kici manka.

¹⁹ Tuka yewicaśipi kin tokeca tuwedan wanmdake śni, Jakob Itancan sunkaku kin heceedan.

²⁰ Unkan wicoie wowapi en cicagapi kin de, iho, Wakantanka itokam itonśni mawanica.

²¹ He iyohakam Suria, qa Kilikia makoce kin en wahi.

²² Qa Juda makoce kin en okodakiciye kin Messiya en un kin, hena ekta ite kin sdonmayanpi śni waun.

²³ Tuka, Tuwe śicaya unkuwapi qon he nakaha wowacinye ehanna yujuju qon he oyaka ce, hecedan naḣonpi.

²⁴ Unkan miye on Wakantanka yatanpi.