Ephesos 6 - Dakota Wowapi Wakan Kin

¹ Hokśiyoqopa, nihunkakepi kin anawicakigoptan po, Itancan kin en, he owotanna.

² Niyate nihun kici wicahduonihan wo; woahope on taku wahoyapi tokaheya kin hee;

³ Hecen tanyan yaun, qa maka akan tehan yani kta.

⁴ Qa ateniyanpi kin, nicincapi kin waciriko wicakiyapi śni po, tuka Itancan waicaḣye c̣a woonspe tawa kin en icaḣwicakiya po.

⁵ Qa wowidake yaunpi kin, tona wicaceḣpi ekta niyuhapi kin wokokipeya cancanic̣iya anawicakigoptan po, Messiya kin iyececa, nicantepi okonwanjidan on:

⁶ Wanniyakapi ecedan śni, wicaśta iyokipiwicayapi kin iyececa; tuka Messiya taokiye kin iyececa, nagi kin eciyatanhan, Wakantanka tawacin kin ecen ecanonpi kta.

⁷ Iyokipiya wawokiya po, Itancan kin ekta hecetu, qa wicaśta kin en iyecece śni.

⁸ Qa tuwe taku waśte econ kinhan, he on Itancan kin eciyatanhan wayuhe kta, wowidake un, qa iś tawaiciya un kin, unma tukte kaśta, he sdonyayapi.

⁹ Qa tona itancan yaunpi kin, niś eya he iyecen ecawicayeconpi kta, qa wakokipe wicayecagapi kte śni. Maḣpiya kin ekta iś iyepi qa niś niyepi nakun Itancan yakiyapi kin yanke c̣a, he ekta wicaśta itohnake yuonihanpi wanica, he sdonyayapi.

¹⁰ Unkan ehake mihunkawanji, Itancan kin en waśagya un po, iye towaśake wicookihi kin on.

¹¹ Wakantanka tawipe kin ocowasin un po, hecen Wakanśica wohnaye oḣanye cin itkokim inajin oyakihipi kta.

¹² Wicawe, qa wicaceḣpi kin kici unkicizapi śni, tuka wokiconze, qa wicowaśake, qa wiconi kin de en otpaza itancanpi kin, qa taku wakan śicapi wankantuya yukanpi kin hena om.

¹³ Heon etanhan Wakantanka tawipe kin ocowasin icu po, hecen anpetu śice cin en najin oyakihipi kta, qa taku owasin hduśtan nayajinpi kta.

¹⁴ Heon wowicake ipiyag kitonpi ecen najin po, qa wicoowotanna maza maku akaḣpe kin koyaka po.

¹⁵ Qa nisihapi kin en wookiye wotanin waśte ohduśtan kin okihan po.

¹⁶ Qa owasin akapa tanhan wowacinye wahacanka kin icu po, he on wicaśta śica tunwanhinkpe ide kin owasin yusni oyakihipi kta.

¹⁷ Qa wiconi maza wapaha kin he icu po, qa nakun Woniya tamazasagye kin, Wakantanka oie kin hee:

¹⁸ Wocekiye qa wokidapi owasin on Woniya kin en, ohinniyan tona owotanna un kin on cekiya po, qa heon woape owasin wokidapi ko yuha kiktahan un po:

¹⁹ Qa nakun miye on, iapi owakihi kte cin heon, hecen waditagya i wahdukawa, qa wotanin waśte wowiyukcan kin omdake kta.

²⁰ Heon wahośiya un wan kaśka hnakapi kin hemaca, hecen on token iwae kte cin he iyecen waditagya iwae kta.

²¹ Tuka taku mitawa kin, token waun kin he nakun, sdonyayapi kta e heon Tucikos hunkawanjin kiciyapi wan waśte dakapi, qa Itancan kin en ookiye owotanna kin he taku kin owasin oniciyakapi kta:

²² Heon etanhan niyepi ekta ye waśi, unkiyepi ekta taku kin sdonyayapi kta, qa he nicantepi kin wacintonhnag niyanpi kte cin heon.

²³ Hunkawanjin kiciyapi kin en wookiye un nunwe, qa wowaśte, wowacinye ko, Wakantanka Ateyapi, qa Jesus Messiya Itancan kin eciyatanhan.

²⁴ Tona awicakehan Jesus Messiya Itancan unkiyapi waśte dakapi kin hena owasin en, wowaonśida wicakici un nunwe. Amen.