Ephesos 5 - Dakota Wowapi Wakan Kin

¹ Heon hokśiyopa cantekiyapi kin iyecen Wakantanka opa po.

² Qa wacantkiyapi kin en mani po; Messiya canteunkiyapi, qa unkiyepi on Wakantanka en ic̣ic̣u, qa waihduśna, woomna iyokipi kin he iyececa.

³ Tuka wiinaḣmanpi, qa waaśapapi, qa waicucupikte cin, niyepi ekta caje yatapi śni nunwe, tuka tona owotanna un taku iyokipi wicaye cin hena.

⁴ Qa wawiśtenyapi, qa wicoie ecinśniyan kin, qa iapi śica hena hecetu śni; tuka wopida eyapi kin he waśte.

⁵ He de sdonyayapi, tuwe wawiciḣaḣapi econ, qa tuwe waaśape cin, qa tuwe waicucukte cin, he wakagapi cekiya ece, hena wanjidan eśta Messiya qa Wakantanka kici tokiconze kin en takudan tawapi kte śni.

⁶ Iapi ecinśniyan on ihnuhan tuwe nihnayanpi kin; wicoḣan kin hena on Wakantanka tocanniye kin woakta śni cincapi kin en awicau kta.

⁷ Heon etanhan hena en opeya unpi śni po.

⁸ Enanna otpaze cin henicapi, tuka wanna Itancan kin en iyoyanpa kin henicapi; iyoyanpa cinca kin iyecen nmni po:

⁹ Woniya tawaskuyeca kin he wowaśte owasin, qa wicoowotanna, qa wowicake kin en un:

¹⁰ Qa Itancan kin taku iyokipiye kte cin he akita po.

¹¹ Qa otpaza wicoḣan, on taku waśte icage śni kin hena en okicipapi śni po, tuka hena iyopeya po.

¹² Hena taku naḣmana econpi kin caie yatapi kin he wowiśtece.

¹³ Tuka taku tona iyopeyapi kin hena owasin iyoyanpa kin yuotanin; qa taku owasin yuotanin kin he iyoyanpa kin ee.

¹⁴ Heua etanhan kaken eya; Tuwe iśtinbe cin kikta, qa wiconṭe etanhan najin wo, Messiya iyoyamniye kta ce.

¹⁵ Hecen on wakta po, itonpeya mayanipi kta, witkotkoke cin iyecece śni, tuka wicaśta wacin ksape cin iyececa.

¹⁶ Qa omaka kin tanyan hduha po, anpetu kin śice cin heon etanhan.

¹⁷ Heon etanhan wacin ksapa po, qa Itancan token tawacin in sdonya po.

¹⁸ Qa miniśa on witkopi śni po, he on iyatahdepi ece; tuka oniya kin on ojudan un po.

¹⁹ Qa Psalm, qa odowan, qa wakan dowanpi kin on wahokonkiciciya po; ahiyayapi qa nicantepi kin ekta Itancan kin idowan po.

²⁰ Qa ohinniyan, taku owasin on, Wakantanka Ateyapi kin wopida eciya po, Jesus Messiya Itancan unkiyapi caje kin on:

²¹ Qa Wakantanka kokipeyahan otoiyohi tokan ihukun iyeic̣iya po.

²² Winoḣinca, nihihnapi kin wicihukun iyeic̣iya po; Itancan kin en iyececa.

²³ Wicaśta kin he iye tawicu pa kin hee, Messiya okodakiciye pa kin hee he iyececa; qa he iye wicatancan kin wanikiye cin hee.

²⁴ Heon okodakiciye kin Messiya ihukuya yanke cin he iyecen winoḣinca kin iye hihnakupi kin taku owasin on ihnkun unpikta.

²⁵ Wicaśta, winoḣinca nitawapi kin cantewicakiya po, Messiya okodakiciye kin waśte kidake c̣a, on iye ic̣ic̣u kin he iyecen;

²⁶ Hecen iye oie kin eciyatanhan, mini on hduecedan, qa hduska kta;

²⁷ Qa hecen iye ekta ehdaku kta, wowitan okodakiciye kin heca, woaśape qa yuśkipi, qa taku hececa wanica; hecen wakan, qa waaśape śni un kta.

²⁸ He iyecen, wicaśta kin iye tancanpi kin iyecen tawicupi kin waśte wicakidakapi kta; tuwe tawicu kin waśte kidake cinhan he waśte ic̣idaka.

²⁹ Qa tohinni tuwedan iye ceḣpi kin śice kidake śni, tuka icahkiye c̣a, tanyan hduha, Messiya okodakiciye hduhe cin iyececa.

³⁰ He tancan, qa ceḣpi, qa huhu kin en, huha kin he unkiyepi.

³¹ Heon etanhan wicaśta kin, atkuku, hunku ko eḣpewicakiye c̣a, tawicu kin en iyaihdaśke kta, qa heniyos wicaceḣpi wanjidan kta.

³² He wowiyukcan wan tanka, tuka Messiya qa okodakiciye kin hena wicawaka.

³³ Heon niś niyepi otoiyohi niye inihdacin nitawin waśte yakidake kta, qa winoḣinca kin iś iye hihnaku kin kinihan kte.