Ephesos 4 - Dakota Wowapi Wakan Kin

¹ Heon etanhan miś miye Itancan caje on makaśkapi, ceciciyapi ce, Wicakicopi on nieopi kin he iyacinyan mayanipi kte.

² Wicotawacin waśte ocowasin qa wicowaḣbadan, wacin tankapi ko yuha, wowaśtedake en otoiyohi iyowinyeciciyapi kta:

³ Qa wookiye icaśke kin on Woniya okonwanjidan kin he yahduhapi kta e aic̣iciya po.

⁴ Wicatancan wanjidan qa Woniya nakun wanjidan; nicopi kin en wowacinye wanjidan inicopi kin he iyececa;

⁵ Itancan wanjidan, wowacinye wanjidan, baptera wanjidan,

⁶ Taku Wakan wanjidan, he owasin Ateyapi kin, owasin iwankam un, qa owasin opta un, qa niyepi owasin en niunpi kin.

⁷ Tuka Messiya iyunwin codan wicaqu iyutapi kin eciyatanhan unkiyepi otoiyohi wowaonśida unqupi.

⁸ Heon kaken eye; Wakantkiya kihde c̣ehan, wayaka ahdapi qon he ocowasin ahde c̣a wicaśta kin taku wicaqu ce.

⁹ Wankan kihde cin he taku he; tokaheya maka mahentuya kin iyaye cin hee.

¹⁰ Tuwe kun hi qon he taku owasin ojuye kte cin heon, he maḣpiya kin ako sanpa tehan wankantuya kihde cin.

¹¹ Unkan apa yewicaśipi kin heca wicaqu, qa wicaśta wokcan wanjikji, qa wotanin waśte oyakapi kte cin wanjikji, qa waawanhdakapi waonspekiya ko wanjikji;

¹² Tona owotanna un kin hena wicayuecedan kta, wawokiyapi wicoḣan kin on, qa Messiya tancan icaḣyapi kte cin heon.

¹³ Tohan owasin okonwanjidan wacinyanpi, qa Wakantanka Cinhintku sdonyapi kin ekta, qa wicaśta tanka Messiya toojudan kin iyehankeca iyutapi kin ekta iyounhipi kte cin hehanyan.

¹⁴ Hecen detanhan hokśiyoqopa aptanptan iyeyapi, qa woonspe tate owasin on kaha iyeyapi kin heuncecapi kte śni, wicaśta ośkiśkeya oḣanyanpi, qa wohnaye on wicahnayanpi wicoḣan kin eciyatanhan;

¹⁵ Tuka wowaśtedake en iewicaunkapi kta, hecen tuwe wicapa kin ee, Messiya hee en taku owasin on unkicagapi kta.

¹⁶ Iye eciyatanhan tancan kin ocowasin wayupiya iciyakaśkapi, qa okihe kin owasin wawokiyapi on icicazontapi, huha kin otoiyohi iyacinyan icage cin he iyecen tancan kin icaḣyapi, wowaśtedake en icage kte cin heon.

¹⁷ Heon kaken epe c̣a Itancan kin on mdaotanin; Ikcewicaśta tokeca wicotawacin witkotkopi kin en manipi kin he iyecen mayanipi kte śni.

¹⁸ Hena wicotawacin aotpasyapi, qa Wakantanka wiconi tawa kin itehanyan unpi, wosdonye śni iye tanmahen un kin eciyatanhan, wicocante teḣika yuapi kin heon;

¹⁹ Hena iyasaka icaḣ ayapi, qa wicaśtapi śni kin en iyoḣpeic̣iyapi, taku aśapapi kin owasin wohitiya econpi kte cin heon.

²⁰ Tuka niyepi e qe hecen Messiya kin onspenic̣iciyapi śni:

²¹ He nayaḣonpi, qa he onspeniciyapi hecinhan, Jesus en wowicake kin iyececa.

²² Wicoḣan tokaheya kin en, wicaśta tannike cin, wohnaye wocantiheye kin on ḣwin kin hee yahduśdokapi kta;

²³ Qa nitawacinpi woksape kin en niyutecapi kta;

²⁴ Qa wicaśta teca woowotanna, qa wowicake wakan kin en, Wakantanka eciyatanhan icaḣyapi kin he kodakapi kta.

²⁵ Heon etanhan, itonpi śni kin ayaśtanpi, qa otoiyohi wicaśta tokeca kici wowicake ece ohdaka po; otoiyohi huha yeciciyapi kin heon.

²⁶ Śinyahdapi eśta, waḣtanipi śni po. Canniniyanpi ecen wi iyaye śni nunwe.

²⁷ Qa Wakanśica kiyukanpi śni po.

²⁸ Tuwe wamanon kin he ake manon kte śni, tuka ḣtani kta, nape on taku waśte econ kta, hecen waḣpanica kin he taku wicaqu kte cin yuhe kta.

²⁹ Wicoie śice cin owasin takudan niipi kin etanhan hinanpe śni nunwe, tuka taku waśte, on icaḣ yapi kta, tona naḣonpi kinhan wowaonśida wicaqu kte cin he ecedan.

³⁰ Qa Wakantanka Taniya Wakan kin iypkiśinyapi śni po; he on wopekitonpi anpetu kin aiyahdeya askam niyanpi.

³¹ Wicokige owasin, qa wocantiyahde, qa wośihda, qa iwaśicunpi, qa waaiapi canniyekiciyapi ko owasin eḣpeyayapi nunwe.

³² Qa otoiyohi okiciciyapi, qa cantekiciyapi, qa otoiyohi kicicajuju po, Wakantanka Messiya on nicicajujupi kin he iyecen.