Ephesos 3 - Dakota Wowapi Wakan Kin

¹ Heon Ikcewicaśta kin niyepi on etanhan, Palos, Jesus Messiya on kaśka hnakapi kin he miye.

² Niyepi on Wakantanka towaonśida wicoḣtani maqupi kin he nayaḣonpi hecinhan;

³ Token woyakapi kin on wowiyukcan kin he sdonye makiya; he wanna wicoie tonana on wakaga:

⁴ He dawapi kin ehantanhan Messiya tawowiyukcan kin token imdukcan kin sdonyayapi kta.

⁵ He wicoicage tokeca kin en wicaśta cinca kin owicakiyakapi śni, tuka nakaha Woniya kin eciyatanhan, yewicaśipi owotanna qa wicaśta wokcan tawawicaye cin hena owicakiyakapi kin iyecen:

⁶ Hecen Ikcewicaśta kin nakun kici tawayapi kte c̣a, kici tancan wanjipidan kta, qa Messiya tawotanin waśte kin eciyatanhan wahoyapi qon he en opapi kta.

⁷ He on ookiye makagapi, Wakantanka towaonśida maqupi kin he eciyatanhan, iye towaśake oḣanye cin on.

⁸ Miye tona owotanna un kin owasin en iyotan macistinna, tuka wowaonśida kin de maqupi, Ikcewicaśta kin ekta Messiya tawoyuha okaḣniḣpica śni kin he omdake kte cin hee:

⁹ Qa wowiyukcan kin otokahe wanin ehantanhan Wakantanka, taku owasin Jesus Messiya on kage cin, he en naḣmanpi qon hee takodakiciyapi kin he owasin sdonye wicawakiye kta.

¹⁰ Hecen nakaha okodakiciye kin eciyatanhan, wokiconze wowaśake ko, maḣpiya ekta un kin en, Wakantanka toksape wopteca śni kin atanin kta.

¹¹ Wokonze otokahe wanin ehantanhan kage ciqon he eciyatanhan, Jesus Messiya Itancan unkiyapi kin en;

¹² Iye wacinunyanpi kin eciyatanhan, kokipeśniyan ekta unkipi, qa waditagya unkiapi ece.

¹³ Heon etanhan niyepi kin on kakiś mayanpi kin heon canwannikapi kte śni wacin.

¹⁴ Qa heon Jesus Messiya Itancan unkiyapi he Atkuku kin en, anpetu iyohi canpeśka makehde inawajin.

¹⁵ He eciyatanhan wicowazi maḣpiya ekta un, qa maka akan un kin, ocowasin caśtonpi.

¹⁶ Hecen iye towitan woyuha kin eciyatanhan taku nic̣upi kta, iye Taniya kin eciyatanhan, wowadake on wicaśta mahen tanhan waśagniyanpi kta.

¹⁷ Hecen wacinyanpi onnicantepi kin mahen Messiya ounye kta;

¹⁸ Hecen wowaśtedake on hutkan niyusutapi, qa sutaya hu nihdepi kta; qa tona owotanna un kin owasin om, ohdakinyan qa ohanske cin, omahentuya qa obosdatu kin he taku kin iyukcan oyakihipi kta;

¹⁹ Qa Messiya towaśte okaḣnihpica śni kin he sdonyayapi kte, hecen Wakantanka toojudan kin ocowasin ojuniyanpi kte.

²⁰ Tuwe nine waśagya econ okihi, unkiś unkidapi qa awauncinpi kin isanpa, wowaśake kin on oniciḣanyanpi kin he eciyatanhan;

²¹ He iye okodakiciye kin en, Jesus Messiya on, ohinniyan owihanke wanin wowitan kicihan nunwe.