Ephesos 2 - Dakota Wowapi Wakan Kin

¹ Unkan niś niyepi kin woaḣtani wicoḣan śica ko en niṭapi:

² Hena ehna ehanna mayanipi, wicoicage kin de wiconi kin eciyatanhan, qa okotonyan wowaśake kin itancan kin eciyatanhan, he taku wakan woakta śni cinca kin en oḣanye cin hee.

³ Hena om, unkiyepi owasin ehanna unnipi, unceḣpipi wacin yuze cin en, wicaceḣpi wicotawacin ko wacinpi kin ecetu unyanpi, qa unmanpi kin iyecen wocantiyahde cinca kin neuncapi.

⁴ Tuka Wakantanka wowaonśida kin on wijica kin he towaśtedake tanka kin on waśte undakapi kin heon;

⁵ Unkiye wicoḣan śica ehna unṭapi qehan, Messiya kici niunkiyapi; wowaonśida on wiconi duhapi ece;

⁶ Qa Jesus Messiya en witaya najin unkiyapi, qa maḣpiya kin ekta kici kiyotang unkiyapi;

⁷ Hecen wiconi u kte cin en, Jesus Messiya on cantounhnakapi kin on, towaonśida woyuha wopteca śni kin hduotanin kta.

⁸ Wowaonśida kin on yanipi, wacinyanpi kin eciyatanhan, qa he niyepi kin etanhan śni, Wakantanka taku nic̣upi kin hee.

⁹ Wicoḣan kin eciyatanhan śni, okinni tuwe ihdatan kta tuka.

¹⁰ Iye taku kage cin he unkiyepi, Jesus Messiya en wicoḣan waśte aicaḣ unyanpi, hena ohna maunnipi kte cin heon otokaheya tanhan Wakantanka wiyeya ehnaka.

¹¹ Hecen ehanna wicaceḣpi ekta Ikcewicaśia henicapi kin he kiksuya po, qa wicaceḣpi baḣdayapi eyapi, nape on econpi kin he bakiḣdayapi śni eniciyapi qon:

¹² He chan Messiya yuhe śni yaunpi; Israel wokiconze kin iyenicihantupi śni, qa wahoyapi wicotakuye kin sdonyayapi śni, wowacinye ninicapi, qa wicoicage kin en Wakantanka codan yaunpi.

¹³ Tuka nakaha Jesus Messiya en, niś niyepi ehanna itehanyan yaunpi qon, wanna Messiya we in on kiyadan anihipi.

¹⁴ Unkan iye wookiye unkitawapi kin hee, iye qe napin yuwanjidan, qa cokahnagya ehnakapi qon he yujuju;

¹⁵ Qa iye ceḣpi kin en, tokakiciyapi kin woahope woope kin econ wicaśipi qon he yutakuni śni; iś iye en nonpa etanhan wicaśta wanjidan teca icaḣye kta, hecen wookiye kage kte cin heon e tanhan.

¹⁶ Qa tancan wanjidan on, can susbeca kin eciyatanhan, hena napin Wakantanka kici okiciciye wicakiye c̣a, heon tokakiciyapi kin kte.

¹⁷ Qa tona tehan dukanpi qon kiyadan un kin hena ko wookiye oniciyakapi hi.

¹⁸ He eciyatanhan Woniya wanjidan on, napin Ateunyanpi kin ekta kiyedan ipi kin he unhapi.

¹⁹ Heon etanhan, detanhan togkicihdapi, qa oyate tokeca kin henicapi śni; tuka tona owotanna unpi kin hena om yatipi, qa Wakantanka tiyohnaka tawa kin he niyepi:

²⁰ Qa yewicaśipi wicaśta wokcan ko taku ahehde tawapi kin akan tinicagapi, Jesus Messiya he oise en otancanke kin hee.

²¹ Iye ohna tipi kin ocowasin ayucoco ehnakapi, qa Itancan kin en tipi wakan icaga.

²² He ohna niyepi nakun ptaya tinicagapi, Woniya kin eciyatanhan, Wakantanka tipi ye kte cin heon.