Ephesos 1 - Dakota Wowapi Wakan Kin

¹ Palos, Wakan tanka tawacin kin eciyatanhan, Jesus Messiya yeśi qon hee, Ephesos ekta tona owotanna un, qa Jesus Messiya wacinyanpi kin hena wowapi cicagapi:

² Wowaonśida, wookiye ko, Wakantanka Ateunyanpi kin etanhan, qa Jesus Messiya Itancan unkiyapi kin etanhan niyepi en nicipi un nunwe.

³ Jesus Messiya Itancan unkiyapi Wakantanka tawa, qa Atkuku kin yawaśtepi nunwe; he iye Messiya en taku maḣpiya tanhan un kin wowaśte wakan ocaje owasin on unyuwaśtepi:

⁴ He en maka kagapi kin itokam unkaḣnigapi qon iyececa, unwakanpi kta qa iye itokam wowaśte en iyaonpepica śni unyakonpi kte cin heon:

⁵ Qa iye en, Jesus Messiya eciyatanhan cinca unyanpi, iye tawacin oiyokipi kin eciyatanhan:

⁶ Iye towaonśida wowitan yatanpi kte cin on, he iye Waśtekidake cin en waśteundakapi:

⁷ He on wopekitonpi kin unhapi, iye we kin on, woaḣtani kajujupi kin hee, iye towaonśida tanka kin eciyatanhan:

⁸ He iye unkiciyuotapi, wicoksape owasin qa wookaḣnige ko on:

⁹ Qa iye toiyokipi kin eciyatanhan, iye tawacin wowiyukcan kin sdonyeunkiyapi, he iye en ic̣iconze ciqon he iyecen:

¹⁰ Hecen tohan iyehantu kinhan, wokonze kin eciyatanhan taku owasin Messiya en witaya mnaye kta, taku maḣpiya ekta un, qa taku maka akan un kin hena, iye en.

¹¹ Qa tuwe iye tawacin wokonze kin eciyatanhan, taku owasin kage cin he otokaheya tanhan unkaḣnigapi kin, he iye en woaiḣpeye kin unhapi.

¹² Hecen unkiye tokaheya Measiya wacinunyanpi qon, iye towitan kin yatan unyakonpi kte cin heon.

¹³ He niś niyepi nakun, wowicake oie kin nayaḣonpi qehan, wotanin waśte on ni niyanpi kte cin hee, he iye wacinyayapi, unkan Woniya wahoyapi kin he on wapetognitonpi:

¹⁴ He taku unhapi kte cin tokaheya wicaqu ece kin hee, taku opetonpi hdamnanpi kin u kte cin hehanyan, iye towitan yatanpi kte cin heon.

¹⁵ Hecen miś eya, Jesus Messiya wacinyayapi kin he, qa tona owotanna un kin owasin waśte wicayadakapi kin nawaḣon kin,

¹⁶ Ehantanhan niyepi on wopida eya amdaśtan śni, qa wocekiye epa eca, ciksuyapi ece:

¹⁷ Jesus Messiya Itancan unkiyapi Wakantanka tawa, qa wowitan Ateyapi kin hee woksape wowiyukcan ko oniya kin nic̣upi kta, he iye sdonyayapi kta e heon:

¹⁸ Nitawacinpi iśta kin iyoyam niyanpi kta, hecen nicopi wowacinye kin he taku kin e sdonyayapi kta, qa tona owotanna un kin taku tawapi kte cin wowitan wijica kin he taku;

¹⁹ Qa tona wicaundapi kin en iye townśake tanka ḣinca woptecaśni kin he taku kin nakun, iye towaśake waśagya oḣanye cin eciyatanhan.

²⁰ He Messiya okiciḣan, wiconṭe etanhan najin kiye c̣ehan, qa maḣpiya ekta iye etapa kim en ekihde:

²¹ Wokiconze owasin, qa wowaśake, qa wookihi, qa itancankiyapi, qa wicacaje caje yatapi kin owasin, wiconi kin de en hecedan śni, wiconi u kte cin he nakun, hena iwankam tehan wankantuya ekihde:

²² Qa iye siha kin ihukuya taku owasin ekihnaka, qa taku hiyeye cin owasin iwankam okodakiciye kin en he pa kin kaga;

²³ He iye tancan kin hee, tuwe taku owasin on owasin ojuye cin woojudan kin hee.