Hebru 8 - Jamaw ta Marbinto: Kabarre ta Gala ɗo bi ka Iisa Masi iŋ daŋla

Iisa mee satkinte ka tatiko

¹ Cokiyoŋ, an baat ta kaawor : gi gin *mee satkiner ka tatko ar kaak gi kaawtu ɗak ko biy. Ŋa daktu goy ka samaaner ɗo meeday ta ŋaar kaak gin gudurre pakgig gamin okin̰co.

² Ɗo wiktin ta Muusa, ŋu siy *kuraarin ta Buŋdi. Kar diŋ gay, mee satkiner ka tatko-ak gina riyoy ɗo kuraarin ta taɓ. Kuraarin taar-at, *Rabbin meen̰ji kat siyta, yampa, ŋu geenno.

³ Ay mee satkiner ka tatko, ŋu diyig a ŋaa iye gamin ku berindi ɗo Buŋdi ho ŋaaji gine *satkine. Ampa-ak, kante oki, illa ŋaa gine maan ka berindi.

⁴ Kar ya mee satkinte ka tatiko-ak kat goy ɗo kiɗar, ŋa ginaaɗo tak-tak riy ta gay satkiner, asaan kuuk gina riy ta satkiner ar taat *gaanuun kaawtu-ak, ŋuur goy ko.

⁵ Ar gem taliy kelmoy ɗo sawwapa, riy ta gay satkiner-ak sa, taar ar kelim ta riy ta taɓ ŋu giniy ɗo wer kaak Buŋ goyiyo. Ŋaar-aŋ ar maan kaak kuuniyji ɗo Muusa ɗo wiktin taat ŋa siyiy kuraarin ɗo Buŋdi. Ɗo wiktin taar-at, Buŋ kaawji aman : « Ya ki siya kuraarne, zeeɗu kii siyin ar taat nu bayniiji ka dambar-aka. »

⁶ Diŋ gay, riy taat Buŋ gaariiji ɗo Iisa Masi-at, taar pakgit taat awalle serek. Kar jamaw taat ŋu diyig Iisa Masi ɗatik ta geemir iŋ Buŋ gay, taar oki pakgit taat awalle serek. Asaan iŋ jamaw-at, maan kaak Buŋ kaawtu a ŋaa gine pakgig ŋaar kaak ŋa kaawtu awalle ɗo gaanuundi.

Jamaw ta awalle iŋ ta marbinto

⁷ Ka seener, ya jamaw ta awalle-at kat necit ko riyti, maman Buŋ yaa obe jamaw ta pey ?

⁸ Kar sando, Buŋ leesco ɗo geen̰ji aman : « Nun *Rabbin kat kaawaw : ɗo menaw kuuk yaa ase-aku, naa obe jamaw ta marbinto iŋ gee ku Israyeel ho iŋ ku Zuuda.

⁹ Jamaw taar-at arro taat nu obtu iŋ aginiyco wiktin taat nu imiliig min darre ta Meser ho nu ogiriico. Uudin taat ŋu bal karmiyin jamaw-ata, nun Rabbin kat kaawaw, nun oki newsico kopo.

¹⁰ Nu kaawa pey aman : ɗo jamaw taat naa obe iŋ gee ku Israyeel-an, ya menaw ŋuur-ak bire, naa un̰jin̰ gaanuundu ɗo kaƴco ho naa diyin̰ ɗo gelbinco. Naa gine Buŋco ho ŋuur gay yaa gine geendu.

¹¹ Yoo waan minninco ucaaɗo inde giji wal siŋji a ŋaaji gaare botol taat ŋaan ibinindu. Asaan okin̰co, ŋuun ibinindu, min kuuk aginda yoo kuuk n̰aaɗa.

¹² Naaco saamiyin̰ nigin̰co okin̰ji ho zunuubinnico gay, nu icaaɗo pey bico tak-tak. »

¹³ Ya Buŋ kolaat jamaw-at a ta marbinto, ŋaar-ak, ar ŋa ginit taat awalle-at maan kaak taay ko. Kar sando, maan kaak taaye ho zaɓ-ak, ŋaar baay gaay ko bire.