Mateo 4 - Bab dummad Jesucristoba igar mesisad garda

Jesús nia-sailase wilubdaklesad

¹ Juan Bab-Dummad-digi-ogleged-igargi Jesús-ogsad-sorba Bab Dummad Burba Nued nega-dule-sulidganba Jesús-sessun, nia-sailase wilubdaklegegar.

² Jesús Bab-Dummadse-golegala iba-dulabogus mutikid, degi, ibginedba mas-gunsuli gudigusad-sorba, ukur itoalid.

³ Degi nia-saila, dule-wilubdaked ese nonikid, ega sognonikid: —Ar be Bab-Dummad-Machi-sunnadile, we-akwamarga be soge: ‘Maduga be-binyeye.’

⁴ Jesús, abin-imakdegu, nia-sailaga sogde: —Noar be soged, ar Bab-Dummad-Gardagi narmakar naid: Dule maduginbi dula gudiguosulid, bela Bab-Dummad-gaya-burba-itogedgi dula gudigubaloed. Dt. 8:3

⁵ Geb degi nia-saila neggwebur-islidikidse Jesús-ses, Jerusalénse. Agi Bab-Dummadse-goled-neg-uas-birgi ogwisdapgu,

⁶ Jesúsga sogded: —Ar be Bab-Dummad-Machi-sunnadile, be napase ichomakdo, ar Bab-Dummad-Gardagi narmakar naid: Na e-angermar bega barmidagoye, e-argangi be-gamaloye, adi melle be nag akwagi yolegegarye. Sal. 91:11-12

⁷ Jesús, nia-saila-abin sogde: —Nabir be sogendo, ar Bab-Dummad-Gardagi narmakar sognaibalid: Melle Dummad, be-Bab-Dummad, be wilubdakoed. Dt. 6:16

⁸ Geb degi gannar nia-saila yar-matusulidse Jesús-sesbalid, agi belagwable napa-naid, degi, e-gangumalad ese oyosgu,

⁹ geb Jesúsga sogded: —An-nug odummogegar, be sindigar an-asabin siger, geb we-ibmar belagwapa an bega ukoed.

¹⁰ Geb degi Jesús, abin-sogded: —Nia-saila-Satanás, be angi bangu, ar Bab-Dummad-Gardagi narmakar naid: Ar Dummad, be-Bab-Dummad, Asebi be goloed e-nug odummogegar, unnila agarbi be ibmar-imakoed. Dt. 6:13

¹¹ Geb degi nia-saila Jesúsgi bangussun. A-sorba angermar Jesússe nonikid, ega ibmar imaknonimalad.

Jesús na e-arbadedgi onoded

¹² Jesús itoargu, Juan-Bautista eskaryagi mellesiiye, Jesús gannar Galilease nonikid.

¹³ Nazaretgi-maid bangudgu, Capernaumgi megnonikid, mata-dummad-naid-walik, Zabulón-yala, degi, Neftalí-yala-walik.

¹⁴ Ar Bab-Dummad-gaya-burba-berbeged, epenne-Isaías-sogsa-gusadba guegala deyob gusad, deun sogsa-gusgu:

¹⁵ Zabulón-yala, degi, Neftalí-yala, mata-dummad-naidsik, Jordán-diwar-obakar-bukmalad, Galilea-dola, Judiosurmalad,

¹⁶ a-neggweburgi Bab-Dummad-wichuli-bukmalad nega-sichidgi siidyobid, dule-wargwen Bab-wisgusar, gwallu-dummad-meegwad ega ganonikidyobid, dulemar-neg-sichidgi-burgwednagagi-bukmaladga, dule-wargwen nonikid, ega gwallu-meegwad-ganonikidyob nonikid. Is. 9:1-2

¹⁷ Degi, agi Jesús Bab-Dummad-gaya-burbagi sunmakarsun: “Be-iskudiidga na be bukib binsamar, be-daed na be ogwamar, ar Bab-Dummad-neg-dakmaid bemarse warmaksad.”

Jesús ua-gamalad-warbakese gochad, e-sapinganga guegar

¹⁸ Jesús Galilea-mata-dummad-gakaba nadapgu, dule e-urba-ebo mata-dummadgi saki-minai dakalid. Gwensak Simón, Pedroye-nugbalid, degi, e-urba-Andrés. Amarde gusgu ua-gaedgi arbamalad.

¹⁹ Jesús amarga sogde: —Anba be dagmar, igi bemar ua-gae, abayobi dulemar-napneggi-bukwad gaega, an be-odurdakmaloed, adi dulemar anba nagumalagar.

²⁰ Abga Simón, degi, Andrés, e-saki yog indakar, Jesúsba yog naar imasmalad.

²¹ Jesús sikwas nadbargu, Santiago, Zebedeo-machi, degi, e-urba-Juan, a-ebo urgi e-bab-Zebedeomala saki-matumakbukwa dakdapid. Jesús amar-warbose-gochamogad, eba dagegar e-sapinganga guegar.

²² Amar yog ur, degi, e-bab-Zebedeo mete nadmalad, Jesúsba naegar.

Jesús dulemar-bukidar-nudaksad

²³ Jesús bela Galilea-yalaganba gudigusad, Judiomar-onmaked-neggi dulemar-odurdakdii, Bab-Dummad-neg-dakmaid-gaya-burba-nuedgi sunmakdii, degine, dulemar bela uelemalad, degi, galagwensuli ibmar-nunmak-itomalad nudakdii-gusad.

²⁴ Jesús dulemar-nudakdiidba, bela Siria-yalase e-nug dunguded. A-ular dulemar bela ibmar-naibi-itodimalad, galagwensuli-gegudimalad, abgan-nunmakdimalad, niasamalad, suu-itodimalad, abgan-burgwarmalad, Jesússe senonimalad. Bela Jesús amar-nudaksad.

²⁵ Dule-bukidar Jesúsba duurmaknadap-gusmalad, Galilea-dorgan, neggwebur-gwaambe-bukmaladginmalad, Jerusalénginmalad, Judeaginmalad, degi, Jordán-diwar-obakarmalad, amar Jesúsba duurmaknadap-gusmalad.