Mateo 12 - Bab dummad Jesucristoba igar mesisad garda

Jesús-sapingan obunnoged-ibagi ibmar-gwag gwachamalad

¹ Deun a-ibagangine, Jesús obunnoged-ibagi orosgii-dakleged-digaled-imbaba nadapgu, e-sapingan ukur itoargu, ibmar-digaled gwane-gwane imakarmar, gunnegar.

² Fariseomar-Jesúsba-nadapmalad deyob dakarmargu, Jesúsga sogdemar: —Be dakena, be-sapingan obunnoged-ibagi ibmar-ise-imakleged imaknadapmardo. ¿Mer arbaoye igar-maisursi?

³ Jesús, Fariseomar-abin sogde: “An-sapingan igar-maidgi annadisulid. ¿Ar bemarde absodisurmarsi, igi David imaksa, deun David, degi, e-sordamar ukumecharmargu?

⁴ A-ibagi David Bab-Dummadse-goled-negse dognoni-gusad, degi, madu-Bab-Dummadga-uklesad gucha-gusad. Ar David, degi, e-sordamar a-madu gunnedsulinad, ar ade madu isedid. ¿We-madu unnila dule-irwa-Bab-Dummadse-gormaladbi gunnoye igar-maisursi? Degite, ¿David, degi, e-sordamar igar-noar imaksamala? Suli, ar ukudba nabir madu guchamalad. Degisoggu, an-sapingan nabir imaksamarmodo.

⁵ Deginbali, ¿ar bemarde Moisés-igar-maidgi absodisurmarsi, igi dule-irwa-Bab-Dummadse-gormalad, Bab-Dummadse-goled-neggi, obunnoged-ibagi annadimala, ar degite amar igar-noar imakdimala? Suli, igar-noar imakdisurmala.

⁶ Ar an bemarga sogdo, emide Bab-Dummadse-goled-neggi dule-bur-dummad be-abargi gudimalad.

⁷ Ar bemar insaena, Bab Dummad soged: Nue wile emar-daked bur an abeged, anga ibmar-gummakar ukedba. Os. 6:6 We bemar insamalana, an-sordamar noar-ibmar-imaknaiye bemar sogosurmalando. Ar dulemar-igar-maidgi-yoledsurmaladgi binsa bemar egi gwisgussurmalardo.

⁸ Ar ade ani Dule-Machi, obunnoged-iba-e-Dummadid.”

Jesús dule-argan-burgwaled-nudaksad

⁹ A-nainu-naidgi nasgu, Judiomar-onmaked-negse Jesús nonisun.

¹⁰ Agine dule-wargwen-argan-burgwaled sii-gusmogad. Jesússe yamo egichiarmar, adi Jesúsgi sogmalagar, obunnoged-igar-maidgi annadiiye. Jesúsga sogdemar: —¿Ar obunnoged-ibagi sunna dule nudaklege?

¹¹ Jesús, abin-sogde: —¿Ar doa-dule, bemar na sibad-wawaad-wargwen nika-dibe, ar bei obunnoged-ibagi yaa-gureged-yaba argwachale, be onossurmalale? Be onosmalale.

¹² ¿Ar degite, dule bur-ibmar-nuedsursi sibad-wawaadba? Ar degisoggu, ibmar-nueddo, obunnoged-ibagi ibmar-nued saed.

¹³ Geb degi Jesús dule-argan-burgwaledga sogdesun: —Be-argan be onak. Dule e-argan onakwidgu, yog nuguar naded, ar igi e-argan-baid nuedi, deyob gusmogad.

¹⁴ Fariseomar-Judiomar-onmaked-neggi-bukmalad ainiarmargu, yog igar amiarmar, igi-saele Jesús-oburgwemalo-dibeye.

Bab Dummad Jesús-susad ega arbaega

¹⁵ Ar Jesús wissoggu, Fariseomar e-oburgwebied, agi-gudiidgi bangudsun. Dulemar-bukidar eba nade-gusmalad, degine, Jesús bela dulemar-uelemalad nudakdii-gusad.

¹⁶ Ar Jesús dulemar-nudaksamaladga sogde-daed, mer an-barsogmaloye.

¹⁷ Ar epenne Isaías, Bab-Dummad-gaya-burba-berbeged idu-sogsa-gusadba guega, deyob gusad, deun sogsa-gusgu, Bab Dummad sogye:

¹⁸ Emi be dakena, an-mai, anga arbaega an susad. An nue na sabed, an-burba egi nue-weligwar itoged. An-Burba-Nued an ega ukoed, ar dulemar-Judiosurmaladga igar-naboged-igargi sunmakoed.

¹⁹ Gwen a-dule urwosulid, degi, binnasur sunmakosulid. Ar degi, igar-imbaba dule binnasur gordii, e-gaya gwen itogosulid,

²⁰ Ar gammu-maraled gwen biskosulid, degine, gwallu-bipii-bupurmaksiid gwen oginnosulid, ar geb igar-napiragwad imakedse.

²¹ Ar bela-Judiosurmalad e-bendakega, a-dule-edarbebukwa gumaloed. Is. 42:1-4

Jesús nia-saila-sogedba niamar-onodiiye-nik sogmalad

²² Geb degi Jesússe dule-nia-nikadi, geg-atakedi, degine, geg-sunmakbalidi ese senonimalad. Jesús a-dule-nudaksad. Degisoggu, nabir-atak, degi, nabir-sunmak nadsunnad.

²³ Jesús-dule-nudaksad bela dulemar geger dakdemalad, sogdemarsunnad: “¿Ar we-dulede inso David-wagwa-yoedse-danikoye-soglesad-sunnad be insae?”

²⁴ Ar Fariseomardi degi-dulemar-soge-itoarmargu, sogdemar: “Suli, we Mesías-suli, we Beelzebú, nia-saila, a egi-naid, wede a-sogedba niamar-onodiid.”

²⁵ Ar Jesús Fariseomar-binsanaid mag daksoggu, amarga sogded: “Rey-gwensak na neggwebur dakmaid, ar e-sordamar na dukin-dukin egi aibinnarmalale, we-neggwebur bergudeled. Degine, ar neggwebur-dibe, igi, neg-yagin-dibe, na e-neg-yaginmalad na egi aibinnarmalale, we-neg bergudeled.

²⁶ Ar nia-saila-Satanás na e-sapingan na onodele, ar na dukin egi aibinna-itole, ar degiile, ¿igi e-neg-na-dakmaid degi-sadeguosunna? Suli, e-neg bergudele.

²⁷ “Ar ani, nia-saila-Beelzebú-nuggi an niamar-onodiile, ¿be-sapingandi doa-nuggi niamar-onodimarmosunna? Nia-saila-ganguedbarsuli. Degisoggu, bemar-sapingan bemarga oyonado, bemar noar sogdimalad, nia-saila-sogedba an niamar-onodiiye.

²⁸ “Ar an Bab Dummad Burba Nuedgi niamar-onodiile, we bemarga oyonado, Bab-Dummad-neg-dakmaid bemarse warmaknoniye.

²⁹ “Ar dule-dutusulid na e-neggi siile, ¿igi dule-wargwen na e-negse dogo be insae, ei-ibmar atursaegar, ar bina iduar edinsulir? Ar bina iduar edingweler-gebed, geb degi sunna ei-ibmar atursaodo. Ar an deyobmodo, an nia-sailagi-nakwisadba, sunna emi an niamar-onodiid.

³⁰ “Ar dule anba dasulile, angi gwisgudiido. Ar dule anga dulemar danar urbedisulile, bur we-dule anga dulemar-ichodiido, mer anba naguegar.

³¹ “Ar degisoggu, an bemarga sogsun, ar bela dulemar-iskued, degine, dulemar galagwensuli Bab Dummadgi dodoar sunmakdii-dibe, Bab Dummad sunna amarga iskued elioed. Ar dulemar Bab Dummad Burba Nuedgi galagwensuli dodoar sunmaksardi, adi Bab Dummad gege iskued amarga elied.

³² Ar doa-dule galagwensuli Dule-Machigi dodoar sunmaksa-dibe, Bab Dummad sunna amarga iskued elioed. Ar dule Bab Dummad Burba Nuedgi galagwensuli egi dodoar sunmaksardi, adi e-iskusad we-napneggi, degi, nibneggi Bab Dummad ega gwen eliosulid.

³³ “Ar sapi nuedile, e-durbamaked nuedmodo, sapi iskanale, e-durbamaked iskanamodo. Ar ade sapi e-sanmakedgi dakleged, sapi-nued-dibe, igi, sapi-iskana-dibe. Dulemar deyobmodo, e-daedgine mag daklenonimogoed.

³⁴ “¡Ar bemar naibe-bulegan-e-mimmiganyob-gumalad! ¿Ar bemar iskana damarsoggu, degite, ar igi ibmar-nuegangi bemar sunmakosunna? Geg ibmar-nuegangi bemar sunmakmala. Ar ade dule gwagegi-binsaedba sunmak-daed.

³⁵ “Ar dule, dule-nuedile, e-gwage-nuedba ibmar-nued onodo, ar dule, dule-iskanale, e-gwage-iskanadba ibmar-iskana onomodo.

³⁶ Ar andi an bemarga sogdo, ar igi binsa galagwensuli dule sunmaksale, Bab-Dummad-ibagan-igar-nabogedgine, na sunmaksadgine Bab Dummadga na dukin barsoggwichi gumalodo.

³⁷ Ar na be sunmaksadbali bega soglegoed, be odurdaklegosurye, igi, bega soglego-dibe, be sabsur odurdaklegoye.”

Dule-iskanamar ibmar-dakledisurmalad dakbi-damalad

³⁸ Agi geb gwen-gwen escribamar, degi, Fariseomar, Jesúsga sogdemar: —Odurdaked-saila, anmar-wagab ibmar-wilubgan-dakledisulid anmarga be imake, adi anmar mag dakega, be-Bab-Dummad-nuggi-sunmaked napiragwadid.

³⁹ Jesús, abin-imakdegu, sogde: —Be dulemar-iskanamar, degi, neg-sichigi-galagwensuli-yolemaladyob bemar-Bab-Dummadgi-nodimalad, bemar abemardo, ibmar-wilubgan-dakledisulid be-wagab bega imaked. Ar an bega sogmardo, wilubgan bega oyolegosurdo, ar oyolegoedi, Bab-Dummad-gaya-berbeged, Jonásye-nugad gusadyob bega oyolegoed.

⁴⁰ “Ar igi Jonás ua-dummad-saban-yaba ibapaa-ibgined, degi, ibapaa-mutikidba megisa, debayobi ani Dule-Machi, napa-urba ibapaa-ibgined, degine, ibapaa-mutikidba megmogoed.

⁴¹ Machergan-Níniveginmalad Bab-Dummad-igar-nabogoed-ibagangi we-dulemar bemar-emi-dula-gudidimalad-abargi gwisgudagogu, bemar-sabsur-odurdakye sogdagoed. Ar ade Jonás Bab-Dummad-igargi sunmaksagu, Nínive-dorgan na e-iskuedga bukib-binsas-gusmalad, na e-daed gwagsamalad. Ar emigindi, Jonásba bur-bule dule-dummad wegi bemar-abargi gudiid, ar degite, bemar be-iskuedga na be bukib-binsasurmalad, be-daed na be ogwasurmalad.

⁴² “Reina-yalasikid-neg-dakmaid Bab-Dummad-igar-nabogoed-ibagangi bemar-emi-dula-gudidimalad-abargi gwisgudagogu, bemar-sabsur-odurdakye sogdagoed. Ar ade we-omegwa bela-bela-dikasur dani-gusad, dad-Salomón-dule-binsaed-ibed-nikad itogegar. Ar emigindi, Salomónba bur-bule dule-binsaed-nikad wegi bemar-abargi gudiid, ar degite bemar an-itobisurmalad.”

Burba-iskana nosad, gannarse noni-daed

⁴³ Ar Jesús sogdebar: “Ar niaburba dulegi nodele, neg-dinnaganaba obunnoged-neg amidii-daed. Ar neg-obunnoged amisursoggu,

⁴⁴ sogdasunnodo, ‘An-neg an mete-alidse gannar an dognaoye.’ Ar na e-negse modapogu, dakdapodo, neg olobi sii, nue durwiar sii, degi, nue neg nudakar sibar.

⁴⁵ “Geb degi niaburba deyob daksale, gannar naodo, e-sordamar-walagugle eba-bur-bulegan-damalad sedagegar. Niaburbamar a-negse dognonimalogu, na e-negga imakdemalodo. Ar dule epenne-e-daedba aka-bur-bule iskudsunnodo. Debayobi bemar-emi-iskudidimalad gumarmogoed.”

Jesús-e-nan, degi, Jesús-e-urbamar Jesús-aminonimalad

⁴⁶ Ar amba Jesús dulemarga sunmaksii, deun e-nan, degine, Jesús-e-urbamar neg-magaba Jesús-edarbebukwa-gusmalad, ebo sunmakmalagar.

⁴⁷ Dule-wargwen Jesúsga sokar: —Emi be-nan, degi, be-urbamar, neg-magaba be-edarbebukmalad, bebo sunmakbimalad.

⁴⁸ Ar Jesús, dule-degi-ega-sogedga abin-sogded: —¿Ar doa an-nan-sunna, degi, doamar an-urbamar-sunna?

⁴⁹ Jesús na e-argan e-sapingansik oyodgua, sogde: —We an-nan, degi, wemar an-urbamar.

⁵⁰ Ar ade doa-dule an-Bab-nibneggi-maidba, a-sogedba ibmar imakele, ar a an-nando, a an-bundo, degine, a an-urbamardo.