Marcos 7 - Bab dummad Jesucristoba igar mesisad garda

Ibi nue dulemar-gwage icho-dae

¹ Ibagwengi Fariseomar, degi, escribamar gwen-gwen Jerusaléngi-danimalad Jesússe nonimarmogad.

² Amar dakarmargu, abar Jesús-sapingan, e-dadgan-igar-maidgii argan-enuksur mas gunne, egi sunmakarmalad.

³ Ar ade Fariseomar, degi, Judio-baiganmo, e-dadgan-igar-mesisadba damalad. Amarde argan-enuksur geg mas gunmalad, bina argan enukgweler-gebed, igi e-dadgan ega igar-mete-nadedba.

⁴ Fariseomar ibmar-ukleged-neggi danimalar, geg mas gunmalad, bina argan-enukgweler-gebed e-dadgan igi ega igar-mesisa, aba imakgweler-gebed. Degi e-dadgan igar-obesmalad bukidar mamaid, nog-enuked, esmed-enuked, bormogimalad-enuked, degine, na ganmar-enuked, adi Bab Dummad yeer e-dakegegar.

⁵ Agala, Fariseomar, degi, escribamar Jesússe egichiarsunnad: —¿Ibiga be-sapingan anmar-dadgan-igar-maidba dasurmala? Emide igar-maidgii argan-enuksur mas gunmargu.

⁶ Jesús, abin-sogded: “Bemar wagar-darbo-daed-dulemar. Aga nabir Isaías Bab-Dummad-gaya-burba-berbeged bemar-nik sogsa-gusad, garda narmaksagu: Bab Dummad sogye: ‘Bemar unnila askinbi angi binsamalad, be gwagegi angi gwen binsasurmalad.

⁷ Binsa askinbi an-nug odummomalad. Be-odurdakeddi dulemar-igar-mesedba bur odurdakmalad.’ Is. 29:13

⁸ Be-dadgan-igar-mamaid-ular Bab-Dummad-igar bemar iearmalad.”

⁹ Degi Jesús sogdebar: “Be-dadgan-igar-mamaidgi bur-bule bemar binsasoggu, Bab-Dummad-igar mamaid be oakalodmarsunnad.

¹⁰ Ar Moisés sogsa-gusad: Be-babgi, degi, be-nangi binsaed-nikaa damaloye. Ex. 20:12; Dt. 5:16 Degine, Moisés sogsabalid: Dule-gwensak babgi, nangi gaya-ichakwa sunmaksale, a-dule-oburgwilegoye. Ex. 21:17; Lv. 20:9

¹¹ “Bemar-Fariseomardi sogmalad, dule-wargwen e-babga, degi, e-nanga sog-dibe: ‘Geg an be-bendak, ar bela an-ibmar be-bendakoed-nikadi bato Korbán, a sogleged, Bab Dummadga ukaled.’ Bemar sogmalad, we, ibmar-nuedye.

¹² “Degi, bemar sogmarbalid, Korbánye be-babga, degi, be-nanga be sogsale, be-bab, degi, be-nan geg be bar bendakye.

¹³ Wegi-bemar-daedba Bab-Dummad-igar-maidba geg be damalad, egi obichaa bemar damalad. Wegiid, bukidar be-dadgan-igar-mamaidba be damalad.”

¹⁴ Geb degi Jesús dulemarse gochasun, amarga sogdesun: “Bela nue an-itomalo.

¹⁵ Ibmar-neg-askinmalad dulegi uboder, amar dule-gwage ichogedsulid, ar gwagegi-ibmar-bukwad ainialirdi, adi dule-gwage ichogeddo.

¹⁶ “Bemar mag nue itobiele, nue itomar an-bemarga-ibmar-soged.”

¹⁷ Jesús dulemar-bukidaradgi bangudgu, neg-gwagwengi dogdapid, bia na obunnomaidgi. E-sapingan Jesússe egichialid: —Wede ibi nue obare, emiskwaa be-ibmar-burbar-odurdaksigusad.

¹⁸ Jesús na e-sapingan-abin sogded: —¿Amba bemar akusunna itomarmode, ibmar-neg-askinmalad dulegi uboder, amar dule-ichosulid? ¿Bemar wichursi, ibmar-neg-askinmalad dulegi uboder, geg dule-gwage ichoged?

¹⁹ Ar ade gwagese ubosulid, unnila sabanse ubodap-daed, geb degi gannar ber miled-dabalid. A Jesús sognaisundo, bela mas Bab Dummadgardi ised-surye.

²⁰ Jesús sogdebalid: “Ar dule-gwagegi ibmar-ainieddi adi dule-ichodo.

²¹ Ade dule-gwagegi binsaed-iskana ainiar-daed, dule omegibi, machergangibi damalad, atursaed, na iblomalad,

²² ome-dikarba, degi, machered-dikarba-yolemalad, na ebi-ibmar-abeged, aimar-ibmar-bina-soged, aimargi-istar-binsaed, emar-yardaked, bingesuli-abgangi-galagwensuli-sunmaked, nobgued, gakansaerbad, na san-dummarba-saed, degine, bina-gutuu-daed.

²³ Bela wemar-ibmar-iskana dule-gwagegi ainiar-daed, adi dulemar-gwage-ichogeddo.”

Jesús ome-Sirofeniciagined-bunolo-nudaksad

²⁴ Genesaretgi-gudii, Jesús nade-gusad, Tiro, degi, Sidón-yarse. Dule-wargwen-negse dogdapgu, dule-gwen-e-wisgubisuli abesad, ar degite wisgulesa winakad.

²⁵ Bunolo-wargwen-niaburba-nikad-e-nan, Jesúsgi sunmakmar itoargu, Jesússe nonikid, yokorgi asabin yog sindigar signonikid.

²⁶ A-omede Judio-dulesulid, Sirofeniciaginedid. A-ome Jesúsgi wilenagusad, ega sognagusad: “Nia-an-bunologi-maid anga wis be onoged saye.”

²⁷ Ar ome Judiosursoggu, Jesús, abin-sogded: —Bina mimmigan-inse mas-gunnoye sogleged. Ar ade igar-maisulid mimmigan-mas achuga be ukoye. Mimmigan-inse bina immelegweler-gebed. We sogledo, be Judiosursoggu, an be-bendakele, mimmigan-mas achuga uknaiyob an guo-itoleye.

²⁸ Ome, Jesús-abin sogded: —Dummad, napira be soged degi-inigwele, achumarse-bakar sunna mesa-urba-mimmigan-mas-obatemamaid gunmogad.

²⁹ Jesús omega sogde: —Ar weyob be sogsad-ular an bega sogsunnad, be-negse be nae, nia be-bunologi-maid bato nosad.

³⁰ Ome nadsunnad. Negse modapgu, e-bunolo e-gabedgi obunnomai dakdapid, nia-egi-maid bato nosa, nue nugus.

Jesús dule-geg-sunmaked, agi, geg-itobalid, nudaksad

³¹ Jesús Tiro-yargi gudii, Sidón-yarsik biirnade gusad, geb degi Decápolis-yala-imbaganba nodapid, Galilea-mata-dummad naidse.

³² Agi dule-gwensak Jesússe senonimalad. A-dulede uaya-yalliled, degi, naya-naya sunmakbalid. Dulemar Jesúsgi wilenagusmalad, ega sogdemalad: “Wis be nudake.”

³³ Jesús a-dule bachikii sesad, dule-sulidba. Degi Jesús e-goo dule-bonigwaled-uaya-yaba odos imaksad, geb degi e-gogi wiaksagu, dule-bonigwaled-gwabin-duku-ebus imaksabalid.

³⁴ Geb degi Jesús niba atakdegu, ulubgi binnasur-bunnosad-sorba, dule-bonigwaledga e-gayaba sogded: —Efata. A sogleged, argas gue.

³⁵ Jesús degi-sogsagua, dule-bonigwaled-uaya yog argaar naded, geb degi e-gwabin yog bipinmakarbalid, nue-swilidik sunmakded.

³⁶ Jesús dulemarga sogdesunnad: —Mer bipisaar dule-baiganga sogmalo, an we-dule-nudaksaye. Ar Jesús dulemarga degi-sogdele, aka-bur-bule barsogde-damalad.

³⁷ Ibiyobi geger Jesús-dakmala, a-ular sogdemarsunnad: “We-dule ibmar-nueganbi imakdiiye. ¡Ar dule-uaya-yalliledse-bakar sunna mag-ito dule-imaked, ar degi, dule-geg-sunmakedi, sunna dule-sunmak imakbalid!”