Marcos 15 - Bab dummad Jesucristoba igar mesisad garda

Pilato Jesúsga igar-itosad

¹ Wakudaryalaba, dule-irwa-Bab-Dummadse-gormalad-e-dummagan, degi, Judiomar-girmar-dummagan, degi, escribamar, bela Judio-dummagan-igar-nabiromalad igar-itosmargu, argan-edinnar Jesús-sesmalad. Geb degi Pilatoga Jesús-uksamarsunnad, ega igar-itogegar.

² Geb Pilato Jesússe egichided: —¿Ar be Judiomar-E-Rey? Jesús, abin-imakdegu, ega sogded: —Ar bede soged.

³ Dule-irwa-Bab-Dummadse-gormalad-e-dummagan sognanai-guarmalad, Jesús igar-iskana imakdiiye.

⁴ Pilato gannar Jesússe egichided, ega sogded: —¿Be dulemar-abin imaksuli? Be dake bule begi sognanai, bede ibmar-iskana imakdiiye.

⁵ Degite, Jesús bipisaale gwen abin-imaksasulid. Degisoggu, Pilato geger daksunnad, ar ibiga-wede Jesús dulemar-abin imaksuli.

⁶ Dakleargu, ibagi Pilato gusgu Judiomar-egismaladba dule-wargwen-eskaryagi-mellesiid ega ono-daed.

⁷ Agine, dule-wargwen, Barrabás-nugadi, e-sordamarmala eskaryagi deun mellesii-gusad. Ar ade amar Roma-dulemargi gwisgusmargu, neg-oimakdii dulemar-oburgwis-gusmalad.

⁸ Dulemar-bukidar Pilatose nonimalad, ese egisnonimalad, dule-wargwen-eskaryagi-mellesiid igi gusgu Judiomar-ibagi ega ono-dae, deyob ega onobaligar.

⁹ Pilato dulemar-abin-imakdegu sogded: —¿Judiomar-E-Rey bemarga onobi be an-abemala?

¹⁰ Ar ade Pilato wisid, dule-irwa-Bab-Dummadse-gormalad-e-dummagan binsa Jesúsgi-nobmaladbali ega uksamalad.

¹¹ Dule-irwa-Bab-Dummadse-gormalad-e-dummagandi mer-Jesús-onogegala yamo dulemar-ibe-binsaed-gasmalad, adi Barrabás-onomalagar.

¹² Pilato dulemarse gannar egisdebarsunnad: —¿Judiomar-E-Reyye bemar biedi igi imakbi be an-abemarsunna?

¹³ Dulemar Pilato-abin-oimakdemalad: —¡We-dule nakrusgi bioke!

¹⁴ Pilato, dulemar-abin-sogded: —¿Ar degite, we-dulede ibu-ibmar-iskana wede imaksunna? Agi dulemar bur-bule oimakdemalad, sogdemalad: —¡We-dule nakrusgi bioke!

¹⁵ Pilato nabir-dulemar-ito imakbisoggu, Barrabás ega onossunnad. Jesúsdi sabsur-bibyosad-sorba suar-ibmalaga uksasunnad, adi nakrusgi bioknamalagar.

Suar-ibmala Jesúsgi dodosad

¹⁶ Degi suar-ibmala Jesús-sesmarsunnad Pilato-neg-Pretorio-nugad-imbase. Agi suar-ibmala bela e-sordamar-danagwenad Jesússe ambikunonimalad.

¹⁷ Geb degi suar-ibgan mor-suir-akwagiid, reygadgiid, geb Jesúsga yosmalad, degi, e-nonogi iko-gurgin-sobaled sismarbalid.

¹⁸ Geb degi yamo Jesúsgi dodonagusmalad, binnasur gotemalad: —¡Be Judiomar-E-Rey, suibaksaar be ani gudigusana-gadin!

¹⁹ A-sorba nonogi suargi Jesús-sarsosmalad, degi, egi wiaksamarbalad, agi yamo yokorgi sindigar Jesús-abin signoni-damalad, yamo e-nug odummonaiyob.

²⁰ Suar-ibgan Jesúsgi-dodosmalad-sorba, mor-suir-akwagiid ega esusmalad, adi e-mor ega gannar yomalagar. Geb degi Jesús-sesmarsunnad, nakrusgi biokmalagar.

Jesús nakrusgi bioklesad

²¹ Suar-ibgan igarba Jesús-semaigu, dule-wargwen Jerusalénse-dani abinguarmalad. A-dule dakargu, Simón, Cirenegined. A-dulede Alejandro, degi, Rufo-e-bab. Suar-ibgan a-dule gannar-obirismalad ise-barmiar Jesúsga nakrus-seega imaksamalad.

²² Gólgota-neg-nugadse Jesús-sesmarsunnad. Gólgota sogleged, Dule-Nonogar-Nega.

²³ A-negse modapmargu, vino ina-gaibidgi oburaledba suar-ibgan Jesús-ogobdemalad, adi dogdar mer wis nunmaked itogegar, ar Jesúsdi gwen abin-gobsasulid.

²⁴ Suar-ibgan nakrusgi Jesús-bioksamargu, Jesús-morgi dodoarmalad, na wilubdaknai-guarmalad, igid Jesús-mor na emargadga guo-dibeye.

²⁵ Dakargu, deun dad-abar-dummad-gusad, Jesús nakrusgi bioksamargu.

²⁶ E-nakrus-birgi narmaksamalad, ibiga Jesús burgwenai. Narmakaled weyob sognaido: WE, JUDIOMAR-E-REY.

²⁷ Geb degi suar-ibgan dulemar-atursamalad-warbo nakrusgi bioksamarmogad. Wargwen Jesús-nakrus-argan-nuedsik ogwichismalad, baiddi Jesús-nakrus-argan-sapiledsik.

²⁸ Igi Bab-Dummad-Gardagi Jesúsgi narmakar nai, degi-sognaidba gunonikid: Dulemar-gwage-iskudimaladyob we-dule-dakmaloed. Is. 53:12

²⁹ Dulemar-Jesús-dikarba-nasdamalad ise-dodoar egi nas-damalad, yamo ega nono-ege-ege gunadap nas-damalad, ega sogde-damalad: —¡Yaped! Be Babse-goled-neg-e-aroedi, degine, ibapaagi-gannar-sobbaloedi,

³⁰ na be-dukin bendak-den, nakrusgi-naid be aideda-den.

³¹ Amba deyob dule-irwa-Bab-Dummadse-gormalad-e-dummagan, degi, escribamar Jesúsgi dododmarmogad, na ga sogdemalad: —We-Jesús, dule-baigandi nabir bendaksad, edi dukin na geg bendaked.

³² Ar ede Bab-Dummad-dule-wargwen-barmidagoye-sogsad-dulele, Israel-Dulemar-E-Reyle, nakrusgi-naid aideda-den, adi anmar dakegar, geb agi anmar egi benguosulid. Jesúsba-nakrusgi-bioklegar-naimarmogadse-bakar egi dodonanai-gusmarmogad.

Jesús nakrusgi-nai burgwisad

³³ Dad-yorukugusgu, bela-napneggi neg-sichid nagunonikid, wachi-irbaase naigusad.

³⁴ Wachi-irbaa gusgu Jesús binnasur gote, sogded: —Eloi, Eloi, ¿lama sabactani? A-sogleged: An-Bab-Dummad, An-Bab-Dummad, ¿ibiga be angi bangusa? Sal. 22:1

³⁵ Jesús-nakrus-walik-bukmalad gwena-gwena Jesús degi-soge itosmargu, sogdemalad: —Be itomar, wede Elíasse gornaid.

³⁶ Degi dule-wargwen abarmakded, vino-gaibidgi ibmar-buta-butadi owardikusad, geb suar-dukugi edichagu, Jesúsga ukded, adi suk-suk saegar. Geb degi dule sogded: —Mer ese achamar, dakmalo, bule Elías odenoniko-dibe.

³⁷ Geb Jesús napi binnasur gotegu, burkwis naded.

³⁸ Deun Jerusaléngi, Bab-Dummadse-goled-neggi, Neg-Islidikid-irwa mor-naid niba achirmakde urbalidse-bakar gusad.

³⁹ Degi, Roma-suar-ibed, sordamar-dulatar-sediid, daksad Jesús binnasur-gochad-sorba igi burgwisa, a-dule sogded: —We-dule, nue Bab-Dummad-Machi-sunnadid.

⁴⁰ Bannabasaar omeganmo Jesús-dakbuk-gusmarmogad. Amar-omegan-abargi gwichi-gusmogad: María-Magdalena, degi María, Santiago-bipigwad-e-nan, a, José-e-nanbalid, degi, Salomé, geb omegan-baiganmo.

⁴¹ We-omegan, Jesús-Galileagi-gudidagu, gusgu Jesúsba gudidamarmogad, degi, ega ibmar-imakdii-gusmalad. Degi, bukidar omegan-baigan-Jesúsba-Jerusalénse-nonimalad, dakbukwa-gusmarmogad.

Jesús neg-uangi diglesad

⁴² Deun a-ibagi Ibmar-Guagwar-Sied-Ibad, bato obunnoged-iba warmakdanisoggu, neg-sedodgu,

⁴³ José, Arimatea-neggweburgined, Pilatose nade-gusad. A-Joséde Judio-igar-nabiromaladgi nue nug-nikmogad, Bab-Dummad-neg-dakmaid nue edarbedimogad-dulemogad. Joséde Pilatose dobsuli nonikid, Jesús-e-mui-egisnonikid, adi neg-uanse dignaegar.

⁴⁴ Pilato, abin geg-itoded, bato Jesús burgwisad. Degisoggu, Roma-sordamar-dulatar-sediidse gochasunnad, agi ese egichided, bato Jesús burgwis sogeye.

⁴⁵ Roma-sordamar-dulatar-sediid, Pilatoga bela ibmar sogsagu, Pilato Joséga igar-uksasunnad, Jesús-mui-sedegar.

⁴⁶ Degi, José atued-binid baksagu, Jesús-mui nakrusgi-naid odesad, geb degi atued-sipugi nue obipirmaksad. Geb degi José akwa-gwisar-neg-uanga-siid-yaba Jesús-mesisad. Geb degi José akwa-dummad neg-uan-yawagakse obaparmasgu, akwa-dummad yawagak-idu sisad.

⁴⁷ María-Magdalena, degi, María, José-e-nan, daksamalad bia Jesús diglesad.