Marcos 1 - Bab dummad Jesucristoba igar mesisad garda

Juan-Bautista Bab-Dummad-Machi-idu igar-mayenonikid

¹ Jesucristo, Bab-Dummad-Machi, egi-gaya-burba-nued-sunmaklesad, wegi-onoddo.

² Epenne Isaías, Bab-Dummad-gaya-burba-berbeged narmaksado, Bab Dummad sogye: Be-iduale, anga-gaya-burba-barsoged an barmidoed, adi be-iduar bega igar-mayegar. Mal. 3:1

³ Dule-wargwen nega-dule-sulidganba binnasur sunmaknonikoed, dulemarga sognonikoed: “Dule-Dummad-idu igar-mayemar, igar-swilidik mesmar.” Is. 40:3

⁴ Igi Isaías Bab-Dummad-gaya-burba-berbeged sogsa-gusa, deyobi Juan-Bautista nonikid, Bab-Dummad-digi-ogleged-igar imaknonikid, nega-dule-sulidganba nonikid, sunmaknonikid: “Be-iskuedga na be ulubgi bukib binsamar, be-daed be ogwamar, Bab-Dummad-digi-ogleged-igar be imakmar, adi be-iskudiid Bab Dummad bega eliegar.”

⁵ Degisoggu, bela Judea-yalaganbarmalad, degi, bela Jerusalén-neggweburginmalad, Juan-Bautistase nonimarsun, gaya-burba-nued itogegar. E-iskudiid na dukin-dukin barsognanai-guarmalad. Geb Juan Bab-Dummad-digi-ogleged-igar imaknai-gualid, Jordán-diwargi.

⁶ Juan-Bautista moli-yargan-mureged-e-absar na morga imakdii-gualid, degi, moli-uka e-molidubga imakdii-guarbalid, geb sese, degi, achanis e-masga imakdii-gusbalid.

⁷ Juan dulemarga sogdebarsunnad: —Dule-wargwen-an-sorba-danikid, a-dule anba bela-bela bur dule-dummadsoggu, andi e-sapat-dubse-bakar geg ei an esiked.

⁸ Andi Bab-Dummad-digi-ogleged-igar imaksad, unnila digi an be-ogsamalad. An-sorba-danikiddi, Bab Dummad Burba Nuedgi be-ogmaloed.

Juan-Bautista Bab-Dummad-digi Jesús-ogsad

⁹ Deunni, a-ibagi Jesús Galilea-yargi gudiid, Nazaret-neggwebur-nugadgi. Agi nadegusad, Jordán-diwarse. Geb a-diwargi Juan-Bautista Bab-Dummad-digi-ogleged-igargi Jesús-ogsad.

¹⁰ Jesús diwargi nakwiargu, nibnega argad daksad, degine, Bab Dummad Burba Nued nuuyobi egi aidedani-gusad.

¹¹ Degine nibneggi, gaya-burba gollar, sogded: “Be An-Machi-sabed-sunnad gued, beba weligwar an itoged.”

Jesús nia-sailase wilubdaklesad

¹² Juan Bab-Dummad-digi Jesús-ogsad-sorba, Bab Dummad Burba Nued Jesús-sesa-gusad, nega-dule-sulidganba.

¹³ Agi ibmar-durgan-abargi Jesús iba-dulabo gudigusad. Deunni nia-saila Jesússe noni-gusad, geb degine nia-saila-Satanás Jesús-wilubdaknai-gualid. Nia-saila Jesús-wilubdaksad-sorba, angermar noni-gusmogad, Jesús-bendakegar.

Jesús Galilea-yargi e-arbadedgi arbaded

¹⁴ A-ibagangi, eskaryagi-Juan-Bautista-metemalad-sorba, Jesús Galilea-yarse nonikid, Bab-Dummad-neg-dakmaid-gaya-burba-nuedgi sunmakegar.

¹⁵ Jesús sogdigualid: “Ibagandi nonisun, Bab-Dummad-neg-dakmaid anmarse warmaknonisun. Degisoggu, be-iskudiidga na be wile itomar, mer bar iskuegar, Bab-Dummad-gaya-burba-nued mer ulubgi bengumar.”

Ua-gamalad-warbakese Jesús gochad e-sapinganga guegar

¹⁶ Jesús Galilea-mata-dummad-gakaba nadapgu, Simón-dakalid, sakigi ua-ganai e-urba-Andrés-ebo. Ar amar gusgu ua-gaedgi arbamalad.

¹⁷ Jesús amarga sogded: —Anba be dagmar, igi bemar ua-gae, abayobi dulemar-we-napneggi-bukwad-gaega an be-odurdakmaloed, adi dulemar anba nagumalagar.

¹⁸ Simón, degi, Andrés, abga e-saki yog miar imasmalad, geb degi Jesúsba yog naar imasmarsunnad e-sapinganga guegar.

¹⁹ Jesús sikwas nadbargu, Santiago, degi, e-urba-Juan-ebo, urgi saki matumakbukwa dakdapid. Amar Zebedeo-machimala gued.

²⁰ Jesús amarga yog sogdemogad: —Bemar anba dagmarmo, an-sapinganga gumarmogagar. Santiago, Juan-ebo Jesúsba nadmarsun e-sapinganga gumarmogagar. Zebedeodi, degi, ega-arbamaladdi, sorba urgi besmarsunnad.

Jesús dule-niaburba-nikad nudaksad

²¹ Jesús na e-sapinganmala Capernaum-neggwebur-nugadse nonimargu, obunnoged-ibagi Judiomar-onmaked-negse dognonimalad. Agi Jesús Bab-Dummad-igargi dulemar-odurdakdesunnad.

²² Jesús dulemar-odurdaksigu, geger dakmalad igi dulemar-odurdaked. Ar ade escribagii dulemar-odurdaksulid, Jesúsdi nue-igar-wisi dulemar-odurdaked.

²³ Agi Judiomar-onmaked-neggi dule-wargwen, niaburba-nikad siid, binnasur gollalid, sogded:

²⁴ —Jesús-Nazaretgined, ¿Ibiga be anmar-wiodaniki? ¿Be anmar-obelogega daniki? Anmar be-wisi be doa-dule. Be dule-gwage-swilidikidid, Bab-Dummad-nuggi-danikid-duled.

²⁵ Jesús niase uluded, ega sabsur ibmar sogded: —Mer be sunmak, dulegi-maid be noe.

²⁶ Niaburba dule-bindumakde-imasgu, binnasur goted, degine, geb dulegi nodsunnad.

²⁷ Degi-gusad bela geger dakdemalad, agi sogdemarsunnad: —¿Wede igidbarsunna? We-dule nue-igar-wisi dulemar-odurdaked. Niaburbamarse-bakar eba ibsamalad.

²⁸ Degi bela Galilea-yalaganba wisguarmalad, igi Jesús dulemar-nudakdiid.

Jesús, Simón-Pedro-e-sakbundor-uelemaid-nudaksad

²⁹ Jesúsmala Judiomar-onmaked-neggi noarmar-gusad: Simón, Andrés, Santiago, degi, Juan. Amar-e-atar Simón-negse nonimalad, a-neg Andrés-negmogad.

³⁰ Simón-negse nonimargu, Jesúsga sokarmalad: “Simón-sakbundor ise-uelegar maiye.”

³¹ Jesús ese nade-gusad. Walik gwisgudapgu, argangi gasgu, geb ogwichiis imaksad, geb a-ome yog nuguar naded. Geb Simón-sakbundor a-sorba emarga yog ibmar imakar-gusad.

Obunnoged-iba bergusgu, Jesús dulemar-bukidar-nudaksad

³² Neg-sedodgu, dad-argwated-sorba Jesússega dule-uelemalad, degine, nia-nikmaladse-bakar ese senonimalad.

³³ Dulemar bukidar Jesús-yawagak-naba ambikunonimalad.

³⁴ Jesús bukidar dule-gegumalad-nudaksad, degine, niamar-bukidar-onisbalid. Niamar-e-abin-sunmakega gwen imaksasulid, ar ade wismalad, we-Jesús doa-dule gue.

Jesús Galilea-yalaganba Bab-igargi sunmakdii-gusad

³⁵ Banedgine, bolegoedbali, Jesús neggweburgi noded, na wargwen bachikii Bab Dummadse golegar. Geb degi, Babse gorsigusad.

³⁶ Simón-Pedro, degine, e-sordamar Jesús-amiarmalad.

³⁷ Jesús-amismargu, ega sogdemalad: —Dulemar bela be-amidimalad.

³⁸ Jesús, e-sapingan-abin sogded: —Unnila we-dulemargarbi an nonisulid. Degisoggu, neggwebur-baidse Bab-Dummad-igargi sunmaknamarbargwelo, ar aga we-napnegse an nonikid.

³⁹ Galilea-yalaganba Jesús garmakdii, Judiomar-onmaked-negmargi Bab-Dummad-igargi sunmakdii, degi, niamar-onidii-gusad.

Jesús dule-naibe-buna-ya-maleged-nikad nudaksad

⁴⁰ Degi-gudii, ibagwengine, dule-naibe-buna-ya-maleged-nikad yokorgi sindigar Jesús-asabin signonikid, egi wilenai, ega sogded: —An wisi, sunna be an-nudaked, be an-nudakbier.

⁴¹ Jesús dule-bonigwaled-dakdegu, nue-wile dakded, e-argangi ebus imaksagu, ega sogded: —Nugubi an be-abeged. ¡Be nugusun!

⁴² Dule-naibe-buna-ya-maleged-nikad yog nuguar naded.

⁴³ Jesús, dule-nugusad abga yog barmiar imaksad, sabsur ega sogded:

⁴⁴ —Mer dulemar-baiganga be sogo, unnila dule-irwa-Bab-Dummadse-goledga na be-san oyona, be nugusad. Degine, nuu-gwabo be sedbalo, Bab Dummadga ukegar, Moisés-igar-mesisadba, adi dulemar mag be-dakegar, be nue nugusad.

⁴⁵ Ar a-dule-nugusad nadgua, emarga bela sogded, igi Jesús e-nudaksad. Degisoggu, a-ular geg Jesús neggweburse doge-guarsunnad, unnila nega-dule-sulidganba gudiguarsunnad. Ar degi-inigwele, dulemar-dikasurmalad bukidar Jesússe noni-gusmalad, Jesús-dakegar.