Juan 2 - Bab dummad Jesucristoba igar mesisad garda

Jesús Caná-neggweburgi ibmar-dakledisulid gebe imaksad

¹ A-ibapaagwad-sorba Galilea-yargi, Caná-neggweburgi dule-wargwen ome-niku-sokalid. A-ibagi Jesús-e-nan sii-gusmogad.

² A-ibagi Jesússe, degi, e-sapinganse, dule-ome-niku-sokalid gochamogad, a-ibase dagegar.

³ Ibagi vino emarga galadgua, Jesús-e-nan Jesúsga sokar: —Vino emarga bergud.

⁴ Jesús, e-nan-abin sogded: —¿Omegwa, ibiga deyob be anga soge? An-ibagan amba yo warmaked.

⁵ Jesús-e-nan, neg-ibed-e-maiganga sokar: —Jesús, ibi imakye bemarga sokalile, a-sogedba bela be imakmalo.

⁶ Deun mete-akwa-gwanergwa dii-siega sii-gusad, ar igi Moisés-igar-mesisadba Judiomar na nudakega ebumala. A-mete-gwagwengi sunna galón-dulagwen-wilub, igi, galón-dulagwen-gakambe-wilub-dibe, dii siged.

⁷ Jesús maimarga sogded: —Bela metemar digi enomar. Bela nue-ena mete digi enosmarsun.

⁸ Geb Jesús amarga sogdebar: —Emigi dii be wemar, dule-iba-sailaga-gusiidse be sedmar. Degi ase sesmarsun.

⁹ Iba-sailaga-gusiid dii-vinoga-binnisad gobsagua, dule-ome-nikusiidse gochad. Iba-sailaga-gusiid wichulid bia vino daniki. Ar maigandi wisdo, ar ade emar na dii wesmalad.

¹⁰ Iba-sailaga-gusiid ome-nikusiidga sogded: —Bela dulemar vino-nued-insa mimmi-damalad, geb bukidargus-gobmalad-sorba vino-akusaaled mimmid-damalad. Ar bedi vino-nued sabos, geb be mimmialid.

¹¹ Jesús we-ibmar-wilubgan-dakledisurmalad gebe Galilea-yargi, Caná-neggweburgi imaksa-gusad. Agi Jesús na e-gangued oyosad. Degine, e-sapingan Jesús-nue-bensuli-gunonimarsunnad.

¹² We degi-gusad-sorbali, Jesús, e-nan, e-urbamar, degi, e-sapingan, Capernaumse nade-gusmalad. Agine, dogdar melu megissurmalad.

Jesús, Bab-Dummadse-goled-neggi ibmar-ukbukmalad-onosad

¹³ Deun Judiomar-iba, Bab-Dummad-Israel-Dulemar-Egiptogi-Wilebukwa-Onosad-Iba warmakdanikidgi, Jesús Jerusalénse nade-gusad.

¹⁴ Jesús Bab-Dummadse-goled-negse dogdapgu, dulemar-moli-ukmalad, sibad-wawaad-ukmalad, degi, nuu-ukmalad, ukbukwa dakdapid, degine, dulemar agi-mani-ogwabukwa dakdapbalid.

¹⁵ Degi Jesús ibmar-bibyoged-duba sobsagu, Bab-Dummadse-goled-neggi bela dulemar-ibmar-ukbukmalad-onosad, degi, sibad-wawaad, degi, molimar onisbalid, degine, dulemar-mani-ogwabukwad-e-mani midbalid, agine, e-mesamar ei obichabalid.

¹⁶ Jesús dulemar nuu-ukbukmaladga sogded: —¡We-ibmarmar bela be sedmar, melle an-Bab-nega ibmar-ukleged-negga be imakmar!

¹⁷ Degi Jesús-e-sapingan insad nadmalad, igi Bab-Dummad-Gardagi narmakar nai: Be-nega an bina nue soged-ular, nue egi nobe an itoged. Sal. 69:9

¹⁸ Judiomar Jesús-abin imakdemalad, abin-sogdemalad: —¿Ibi-ibmar-wilubgan-dakledisulid be anmarga imakosunna, adi anmarse oyogegar Bab Dummad bega igar-uksad weyob be ibmar imakegar?

¹⁹ Jesús, abin-imakde, emarga sogded: —We-Bab-Dummadse-goled-neg-siid be earmar, an ibapaagi gannar soboed.

²⁰ Judiomar geb abin-sogdemarbar: —We-Bab-Dummadse-goled-neg birga-dulabo-gakanergwa soblenai-gusadde, emide, ¿bede ibapaagi gannar sobode? Geg be gue.

²¹ Ar Jesúsdi na e-sangi sunmaknaid, akwa-neg-sobaledgi sunmaknaisulid.

²² Ar degisoggu, Jesús burgwis gannar durgusgu, geb e-sapingan insaas-nadmalad we bato degi-sogsad. A-ular Jesús-e-sapingan Bab-Dummad-Gardagi narmakar naid, degine, Jesús-ibmar-sogsad, nue ulubgi abingasmalad, gwen bengussurmalad.

Jesús dulemar-ulubgi-binsanaid-wisidba dulemar-bengusad

²³ Bab-Dummad-Israel-Dulemar-Egiptogi-Wilebukwa-Onosad-Ibagi Jesús, Jerusaléngi gudigu, ibmar-wilubgan-dakledisurmalad imaksadba, bukidar Jesús-bensuli-gunonimalad.

²⁴ Ar Jesúsdi bela dulemar-daed wissoggu, dulemar-bengusad, ar ade wisid dulemar eba nue naisulid.

²⁵ Jesús dule-ega-ibmar-soged gwen abessulid, ar wisid dulemar ulubgi igi binsamala.