Juan 13 - Bab dummad Jesucristoba igar mesisad garda

Jesús na e-sapingan-nag-enuksad

¹ Bab-Dummad-Israel-Dulemar-Egiptogi-Wilebukwa-Onosad-Iba bane-nagudoed-iduar, Jesús deunni Jerusaléngi gudiid. Jesús na wisid, we-napneggi gudiid e-Babse gannar-naed-ibagan warmaksad. Ar Jesús na e-sapingan we-napneggi-bukwad nue sabgussoggu, na nue bela-bela sabgussunnad, e-burgwedse.

² Jesús na e-sapinganmala sedo mas gunbukwagua, nia-saila bato Judas-Iscariotegi burba-iskana oubosad Jesús-darba-ukega. We-Judasde Simón-e-machid.

³ Jesús na wisid, e-Bab bela ega igar-uksad bela ibmar imakegar. Degine, Jesús wisbalid, na Bab Dummadgi danikid, degi, na Bab Dummadse gannar nabaloed.

⁴ A-ulale, Jesús na mas gunsigua gwisgus imaksad, e-suba esusad, degine, toalla susgua, na e-sadergi edichad.

⁵ Degi Jesús bormo-yagi dii eosad, e-sapingan-nag enukegar. Geb degi toalla e-sadergi-naidgi ega nag odinnoarbalid.

⁶ Geb degi Jesús Simón-Pedrose nonikid, geb Pedro ega sokalid: —¿Dummad, be anga nag enukoe? Suli, be anga nag enukosuli.

⁷ Jesús, abin-sogded: —An-emi-ibmar-imaknaid aku amba be itoged, geb sorba mag be itodapoed.

⁸ Pedro, Jesúsga sogded: —An-nag be enukosurguoed. Jesús, abin-sogded: —An bega nag enuksulile, geg be an-sapinga gued.

⁹ Geb degi Simón-Pedro Jesúsga sogdesunnad: —Dummad, ar be deyob sogele, an-nagbi be anga enukosulid, an-argan, degi, an-nono be anga enukbalir-gebed.

¹⁰ Jesús, abin-sogded: —Ar dule bato obsamalad bar obed abesulid, unnila e-nagbi napi-enuked abeleged, ar ade bato guar swilidik gudiid. Ar bemar bato swilidik gudimalad, ar bela bemar swilidik gudisurmar-inigwer.

¹¹ Ar ade Jesús na wisid doa darba e-ukoe, a-ulale sogsa-gusad: “Bela bemar swilidik gudisurmarye.”

¹² Degisoggu, Jesús e-sapinganga na nag-enuksad-sorba, gannar e-mor na yosgu, mesase gannar signonikid. Geb degi e-sapinganga sokalid: “¿Bemarga-an-nag-enuksad mag bemar itomala, we ibi obare?

¹³ Ar bemar Odurdaked-Sailaye, degine, Dummadye be anse gormalad, ar nabir deyob be anse gormardo, ar an adid.

¹⁴ Ar ani, an Dummadid, degine, an Odurdaked-Sailadde, degite bipii na san imaksad, bemar-nag an enuksadde, bemar na muchub-muchub nag na ga enuke-wilubmarmodo, na maikwaa na san sae-wilubmarmodo.

¹⁵ Ar bemarga an na oyosad, ar igi bemarga an be-imaksamala, deyob bemar na imake-wilubmarmodo.

¹⁶ Napira an bemarga soged: Dule maiga-arbaed, e-dummadba geg dummad gued, degine, gege dule-barmilenaid e-barmisiidba bur dummad gued.

¹⁷ Ar we-ibmar bemar bato wismarsoggu, ar aba bemar imakele, bemargi nued binsalegodo.

¹⁸ “Ar bemar belagwapaga an sogsulid. Ar an wisid doamar an susa, adi Bab-Dummad-Garda-narmakaledba guegala, bemar-wargwen dikarba an-ukoed, ar Bab-Dummad-Garda-narmakaledgi sognaid: Ar dule anba madu gunsiidi, angi aibinnoniye, an-istaradga gunoniye. Sal. 41:9

¹⁹ Deyob gued iduar, an bemarga soged, adi degi-gunonikile, bemar mag-ittos-namalagar, ani an Cristod.

²⁰ Napira an bemarga soged: Ar an dule-barmidoed-abingamalale, an-abinganaid. Ar dule an-abinganaile, Bab-Dummad-an-barmialid a-abinganamogad.”

Jesús iduar sogsa-gusad, Judas darba e-ukoye

²¹ Jesús degi-sogsad-sorba, e-ulubgi bukib-binsa-naded, degi, e-sapinganga sogdesunnad: —Napira an bemarga soged, bemar-wargwenadi darba an-ukoed.

²² Degi e-sapingan na muchub-muchub dakdemalad, na wichurmalad doagi Jesús degi-soge.

²³ E-sapingan-wargwen, ar Jesús na nue sabedi, e-dikarba sii-gusad.

²⁴ Asega, Simón-Pedro arbak achasad, adi Jesússe egisegar, doa-dulegi wede deyob soge.

²⁵ Degi a-dule, Jesús-binasgar-walik biligwa maid, Jesúsga sogded: —Dummad, ¿doa-dule arbak be-ukoe?

²⁶ Jesús, abin-sogded: —Ar doa-dulega madu-waraa an ukoe, a-dule, darba an-ukoed. Jesús madu owardikusgu, Judas-Iscariote, Simón-e-machi, aga madu uksad.

²⁷ Judas, madu-bipi ega uklesad guchagu, nia-saila-Satanás egi dognonikid. Geb degi Jesús Judasga sogdesunnad: —Ar ibmar-be-imakoedi, gwae bur be imaknasun.

²⁸ Ar e-sapingan mesa-naba-bukmaladi aku itosmalad, ar ibiga Jesús deyob Judasga sogsa.

²⁹ Ar abar binsadmalad, Judas mani-saboged-e-sagu sedisoggu, Jesús Judasga sogdakleye: “Anmar-ibmar-ibaga-abegedi be baknaye,” ar ega sogbar-dibe: “Wileganaga wis be mani uknaye.”

³⁰ Ar Judas madu guchagua, yog noar-imaksad. Ar nodgua, bato deun neg-mutikid.

Jesús sogsa-gusad, na be muchub-muchub sabgumaloye

³¹ Degine, Judas-naded-sorba Jesús sogdesunnad: “Ar emigindi ani Dule-Machi, an-nug odummolesunnoed, degine, anba Bab-Dummad-e-nug odummolemosunnoed.

³² Ar ani Dule-Machi, angi Bab-Dummad-nug odummolegele, Bab Dummad an-nug odummomogoed, degi, ar emiskwaa an-nug odummogoed.

³³ Mimmigan, wis ichesaar amba an bemar-abargi gudiguoed. Be an-amimalo-inigwele, ar igi Judiomarga an sogsa, deyob bemarga an sogmarmogad. Ar bia an nasokalidse, geg be anba namalad.

³⁴ “Igar-binid an bemarga ukmarsunnad, na be muchub-muchub na be sabgumar, ar igi an be-sabgusmarmoga, na deyob be muchub-muchub sabgumarmosun.

³⁵ Agi bela mag be-dakmaloed, bemar an-sapingan gumalad, ar na be muchub-muchub nue sabgumalar.”

Jesús Pedroga sogsad, aku be an-dakye be sogoed

³⁶ Simón-Pedro Jesúsga sogded: —Dummad, ¿bia be nae? Jesús, abin-sogded: —An-emi-nasokalidse, emigindi geg be anba daggweled, sorbardi geb be anse naoed.

³⁷ Pedro ega sogded: —Dummad, ¿ibiga emigindi geg an beba nae? An be-ular an burgweye sogele, an guakwaa gudiid.

³⁸ Jesús, abin-sogded: —¿Be guakwaa gudii an-ular burgwega? Suli, be guakwaa gudisuli. Napira an bega soged: Gannir-namaked-iduar, ilapaa be an-osulogoed.