Juan 12 - Bab dummad Jesucristoba igar mesisad garda

María Betaniagi gwallu-wawagwadgi Jesús-magsad

¹ Iba-nergwase, Bab-Dummad-Israel-Dulemar-Egiptogi-Wilebukwa-Onosad-Iba naguoele, Jesús Betaniase nonikid, bia Lázaro maidse. We-Lázaro burgwis-gusgu, deun Jesús gannar we-dule-odulosad-duled.

² Agine, Jesúsga sedo mas-gunned imaksamalad. Marta deun ega mas daknai-gusad, Lázarodi Jesús-mas-gunsiidgi sii-gusmogad.

³ Agi María, bute-gwagwen gwallu-wawaad-nued, nardo-nugad, ber gargesailad, Jesússe senonikid. Geb degi María Jesús-naggi a-gwallu-wawagwad eosad, degi, na e-sailagiagi Jesús-nag odinnosad. Gwallu-wawagwad-e-yapanned bela neg gasa sigisad.

⁴ Jesús-sapin-wargwen, Judas-Iscariote, Simón-e-machi, ar darba-Jesús-ukoed-dule, sokalid:

⁵ —¿Ibiga we-gwallu-wawagwad denario-dulataled-ilapaa gargegu uklessuli, adi a-mani wileganaga ukega?

⁶ Ar Judas degi-sogsa-gusadi, dule-wilegana-sabedbali deyob sogsasulid, ar ade dakargua, dule-atursilisoggu, mani-sagu na e sedisoggu, mani-agi-urbilemaid arbak atursadii-daed.

⁷ Geb degi Jesús, Judas-abin sogded: —Mer Maríaga akar-soge. We gwallu-wawagi an-magsadi, an diglegoed-ular an-magsad.

⁸ Ar bemar-abargi wileganadi gusgu gudiguoed, andi bemar-abargi sadeguosulid.

Judio-dummagan Lázaro-oburgwebi-gusmalad

⁹ Judiomar-bukidar wisguarmargu, Jesús Betaniagi gudiiye, ese duurmaknonimalad, unnila Jesús-dakegarbisulid, Lázaro-dakegarbalid, ar ade Jesús Lázaro burgwar-mai odulosad.

¹⁰ Dule-irwa-Bab-Dummadse-gormalad-e-dummagan igar-amismarbargu, igar-mesismalad, Lázaro-oburgwemarmogoye.

¹¹ Ar ade Jesús, Lázaro-odurgusad-ular, Judiomar-bukidar Judio-igar-odurdakmaladgi bangudmalad, Jesúsgi-bensuli-gunonimalad.

Jesús Jerusalén-neggweburgi reyyob dogsad

¹² A-banedgine, dulemar-bukidar-ibase-nonimalad itoarmargu, Jesús Jerusalénse daniye,

¹³ ogob-gagangiid-e-gagan gwachamalad, degine, Jesús-abin nadmalad, Jesús-nug odummogegar. Jesús-dakarmargu, binnasur gotemalad, sogdemalad: ¡Bab-Dummad-nug odummomar! ¡We-dule Bab-Dummad-nuggi-danikid, bela ega ib-nuedga guena-gadin, Israel-e-Reygi! Sal. 118:26

¹⁴ Jesús moli-uaya-suid-e-mimmi-amisad, egi birgi sigisad, ar Bab-Dummad-Gardagi egi narmakar naidyob:

¹⁵ Mer be dobgu, Siongi-bukmalad, emigi be-rey bese danikid, moli-uaya-suid-e-mimmi-birgi sii. Zac. 9:9

¹⁶ Ar gebesaila Jesús-sapingan aku-itosmalad, wede ibi-obare. Ar Bab Dummad Jesús-nug-ogannosad-sorbali, geb e-sapingan insadmalad, we Jesúsgi bato Bab-Dummad-Gardagi narmakar naid, degi-narmakar-naidba ega imaksamarbalid.

¹⁷ Dulemar Jesús-daksamalad, igi deun Lázaro-neg-uan-yaba-maigu ese gocha, gannar odulosa, amar baiganga sogedbimalad we-igargan.

¹⁸ A-ulale dulemar-bukidar Jesús-abin noni-gusmalad, ar ade itosmalad, igi Lázaro gannar odurgus-gusad.

¹⁹ Ar Fariseomardi na ga sogdemalad: —Dulemar mer Jesúsba naguegala, anmar gwen oakalogosurmalad. Ar be dakena, ar bela dulemar eba duurmakmaid.

Griego-dulemar Jesús-aminonimalad

²⁰ Griego-dulemarmo, Bab-Dummadse-golega, Judiomar-ibagi Judiomar-abargi nonimarmogad.

²¹ Amar, Felipese nonimalad. Felipe, Betsaida-Galileaginedid. Griego-dulemar Felipegi wilenai-gusmalad, ega sogdemalad: —Dummad, anmar Jesús-dakbimalad.

²² Felipe nadgu, Andrésga sogdapid. Degine, Felipe, Andrés-ebogwa Jesúsga sogdapmarsunnad.

²³ Jesús, abin-imakdegu, sogded: “Emigindi iba nonisun, adi ani Dule-Machi, an-nug odummolegegar.

²⁴ Napira an bemarga soged, ar ibmar-gwag napagi argwansulile, e-uka nungu sulile, unnila na ebi gudii-daed. Ar e-uka nunguerdi, adi bukidar sanmakodo.

²⁵ “Ar amba deyobmodo dule na e-san-burba na sabele, binsa oyogguodo. Ar we-napneggi e-san-burba na sabsulile, burba-geg-berguedga sabogodo.

²⁶ Ar dule anga arbabiele, anba dagodo, an-sogedba nanaegar. Ar bia an gudiguoedgine, dule-anga-arbaedi agi gudigumogoed. Ar dule anga arbaele, an-Bab a-dule-nug odummogoed.”

Jesús e-burgoedgi sunmaksad

²⁷ Jesús sogdebar: “Emigindi an ulubgi surbinsa itoged, degite, ¿igi an sogosunna? ¿An sogoe, ‘Bab Dummad, emigindi we-ibmar-nunmaked-dummad be anga osuloye?’ Suli, degi-an-sogosuli, ar aga we-napnegse an nonikid, burgwegar.

²⁸ Bur an sogodo: Bab Dummad, be-nug be odummoge.” Degi nibneggi gaya-burba gornonikid: “Bato an-nug an ogannosad, degi, an-nug gannar an ogannobaloed.”

²⁹ Dulemar-bukmalad, gaya-burba-sunmak-itosmaladi, sogdemalad: —Mar gochaye. Baigandi sogmalad: —Anger-wargwen ega sunmaksaye.

³⁰ Jesús sunmakdegu, sogded: —We-gaya-burba-be-itosmalad anga nonisulid, bemarga nonikid.

³¹ Emigindi we-napneggi dulemar-bukmalad sabsur-odurdakleged-iba nagunonikid. Emigindi nia-saila we-napneg-dummadga-gudiid, a-onoleged-iba nonisunnad.

³² Ar ani, ar napneg-naidgi an onakwilesale, bela dulemar anse an ebioed anba nagumalagar.

³³ We Jesús degi-sogsa-gusadi, mag itoledo, sognaid, ede nakrusgi biokar burgoye.

³⁴ Dulemar, Jesús-abin sogdemalad: —Anmar wismalad Moisés-igargi sognaid, Cristo, Bab-Dummad-dule-wargwen-barmidagoye-sogsad-dule nonikir, burgosulid, degi-sadeguoed. ¿Ar ibiga bedi sogsunna, Dule-Machi onakwileger-gebye, nakrusgi biokar burgwega? ¿Ar we doa-sunna Dule-Machi?

³⁵ Geb degi Jesús, abin-sogded: —Emigindi ani gwallu-meegwadga ichesaar amba bemar-abargi an gudiid. Gwallu-meegwad amba bemar-abargi-gudiidgi eba be nanamar, ar melle neg-sichid ukiar be imakmalagar. Ar dule neg-sichidgi nadapile, wichur daed bia nadapi.

³⁶ Ar emigindi amba be gwallu nikmarsoggu, gwallugi mer be bengumar, adi bemar neg-meegwad-mimmiganga gumalagar. Jesús degi-ibmar-sogsa-gusad-sorba nadsunnad. Emar-idu dukusad, mer e-amimalagar.

Judio-dummagan Jesús-abingassurmalad

³⁷ Ar Jesús emar-wagab ibmar-wilubgan-dakledisurmalad bukidar imaksa-inigwele, dulemar amba Jesúsgi bengusmalad.

³⁸ Ar ade epenne Bab-Dummad-gaya-burba-berbeged, Isaías sogsa-gusadyob guegala, deyob gunonikid, deun Isaías sogsa-gusgu: Bab Dummad ¿doa anmar-ibmar-sogsa-gusad bengussuli? Bela bengusadbimalad. ¿Doasega Bab Dummad na e-gangued oyosa? Amba a-dulemargardo. Is. 53:1

³⁹ A-ulale dulemar Jesús-abingassurmalad, ar ade Isaías amba sogsa-gusbalid:

⁴⁰ Bab Dummad amar-e-ibya aku-dake imaksad, degi, amar uayasur-daega imaksabalid, adi melle na e-ibyagi mag dakmalagar, degi e-gwagegi melle mag itomarbaligar. Ar degiile, abonolemalo-itole. Ar degiile, amar an nudake dakledago-itole. Is. 6:10

⁴¹ Isaías weyob sogsa-gusad, deun Jesús-e-gangued daksagu, agi egi sunmaksa-gusad.

⁴² Ar degi-inigwele, dummagan-bukidar-neg-dakmamaid, ulubgi Jesús-gwen-bengussurmalad, degite bakar-buud amar gwen sogsasurmalad, emarde Jesúsba naimoye, ar ade dobmalad, adi melle Fariseomar Judiomar-onmaked-neggi emar-onomalagar.

⁴³ Deginbali, ar dummagan dulemar-na-e-nug-odummoged bur-nabir itomarbalid, Bab Dummad e-nug odummogedbar.

Jesús-ibmar-sogsad, dulemargi gwisguoed

⁴⁴ Jesús binnasur sunmakde, sogded: “Ar dule an-bensulile, anbi an-bengusulid, Bab-Dummad-an-barmialid-bensurbalid.

⁴⁵ Ar dule mag an-dakale an-doa-dule, dule-an-barmialid-mag-dakbardo.

⁴⁶ Ani, we-napnegse gwallu-meegwadga, an nonikid, adi bela-angi-bensurmalad, mer bar neg-sichidgi gudigumalagar.

⁴⁷ “Ar dule an-gaya-burba-itogedi, ar aba dasulile, ani an sogosulid, be dummad-nosye. Ar we-napnegse an nonigua, dulemarga sogega an nonisulid, be nue iskusmarye. Ar an nonikidi, dulemar-abonogegalad.

⁴⁸ Ar dule an-abingasulile, degine, an-gaya-burba-sunmaked abingasurbalile, amargardi soglegodo, be dummad-nosye. Ar ibagan-napi-naiguoedgi an-ibmar-sogsadba dulemar-an-abingassurmaladga soglegoed, ‘Be Bab Dummadse sabsur odurdaklegoye.’

⁴⁹ “Ar an sunmaksad an-itolegedba an ibmar sogsasulid. Bab Dummad an-barmialid, a, igar anga uksad, igi an sogoe, degi, igi an sunmakbaloe.

⁵⁰ Ar an wisdo, Bab-Dummad-igar-anga-uksadi, dulemar-anba-nagumaloedga burba-geg-bergued uked. Degisoggu, ibmar an sunmakedi, ar igi Bab Dummad anga sogsa, deyob an sunmaked.”