Filipenses 2 - Bab dummad Jesucristoba igar mesisad garda

Bab Dummad dummadga Cristo-imaksad

¹ Degisoggu, ar Cristo be-ogannomar-dibe, ar e-sabguedgi be yeer itodimar-dibe, ar E-Burba-Nued bemarba gudii-dibe, ar Cristo bemar-sabedba nabir bemargi binsa-dibe, degine, wile bemar-dakbar-dibe,

² weligwar-ito be an-imakmarsun, na bulakwaa balibi nanabukwadgi, na emarbi sabgubukwadgi, na be binsaed, degi, ibmar-bina-soged, bela emarbi na bulakwaa nika-gumarsun.

³ Mer ibmar be imakmalo na be dukin yeer itogegar, ise na san dukin odummogegar. Na be san bipii samaloed, degi, dule-baigan bur beba dule-dummarba be dakmaloed.

⁴ Mer na be-sanginbi binsamalo, gwenadgan-baigangi be binsamogoed.

⁵ Igi Cristo-Jesús na dukin egi binsasa, abayobi bemar na begi be binsamarmogo.

⁶ Ar Cristo-Jesús na Bab-Dummadyobmo-inigwele, na Bab Dummadsuliyob na san imaksad, ar na Bab Dummadyob san imake-wilubbinad.

⁷ Na Bab Dummadyobid mete-gusad, ar bur na dukin ibgwensuli, na maiga san imaksad. Cristo-Jesús na nue dule-sunnad gwalulesmogad.

⁸ Jesús nue dule-sunnadga gunonigu, aka bur-bule na san bipii imaksad. Ar Jesús Bab-Dummad-sogedba nanadigussoggu, burgwed-igar sunonisunnad, burgwega nakrusse nade-gussunnad.

⁹ Degisoggu, agala Bab Dummad bur-bule Cristo-Jesús dulemar-baiganba dummadga imaksasunnad. Jesús a-ulale dule-baiganba bur-bule dummadga gussunnad.

¹⁰ Adi belagwapa nibneggi-bukmalad, napneggi-bukmalad, degi, napneg-urba-bukmaladse-bakar, Jesús-nug-odummolesadba, bela Jesús-asabin yokorgi sindigar sigmalagar,

¹¹ degine, belagwapa sogmalagar, Jesucristo bur-Dule-Dummad-sunnadye. Agine, Bab-Dummad-nug odummoledii-guoed.

Jesúsba-nanaimalad niskwamar-gaedyobi we-napneggi gued

¹² Degisoggu, gwenadgan nue-an-na-be-sabmalad, bemar gusgu an-ibmar-sogedba damarsoggu, mer unnila an bemar-abargi gudiidginbi an-sogedba damaloed, an bemar-abargi gudisurbalir, bur-bule an-sogedba bemar dae-wilubmalad. Emigindi nue na be salakarmar, na be ulubgi abonolesadgi alamaknai nue na be imakmarsun. Bab Dummadgi nue binsaed-nikaa damar, degi, na be Bab-Dummad-dobegwaa damarbarsun.

¹³ Ar bemar ibmar-nued imakbied, Bab Dummad bemargi nasiknoni-damalad, degine, Bab Dummad gangued bemarga ukbalid, e-ibmar-imakbiedba bemar ibmar-nued imakmalagar.

¹⁴ Degisoggu, mer bemar ibmar istar-itogedgi, degi, mer na abin-abin imakmaladgi, na be ibmar samaloed.

¹⁵ Adi mer bemargi iskued nai-guegar, degine, dulemar mer bemargi sogmalagar, bemar galagwensuli gudimarye. Ar bemar Bab-Dummad-mimmigan gumarsoggu, dulemar-galagwensuli-gudidimalad-abargi, degi, dulemar-iskanamar-abargi, bemar gutu-gwen-naisuli gue-wilubmalad. Ar emigindi bemar we-napneg-sichidgi niskwamar-gaedyobi gudidimalad.

¹⁶ Gaya-burba sunna-dula dule-imakedgi akanai bemar gumarsun, adi Cristo gannar we-napnegse danikile, yeer an itogwichi-guegar, adi an sogegar, gwen binsa Bab-igarba an nanassurye, degi, gwen binsa an Bab-Jesúsga arbassurbarye.

¹⁷ Bemar Bab-Dummadgi-bensuli-ibmar-imakdimalad, Bab-Dummadga-ibmar-gummakar-ukedyobid. An bemar-ular burgweye soger gwen akarsulid, ar Bab-Dummadga-ibmar-gummakar-bemar-ukmalad-birgi napi e-nis eolegedyob an-san gusaled. Degisoggu, an burgwisar, an werguoed, degi, bemarba an wergubaloed.

¹⁸ Degisoggu, bemar wergumarsun, degine, an werguedgi bemar wergumarmosun.

Timoteo, Epafrodito-ebo Pablo-bendakmaladid

¹⁹ Dummad-Jesús-sogedba bemarse emiskwasaar Timoteo an barmido an insado, adi an yeer nue itomogagar, an bemar-wisgualir, bemar nued gudiiye.

²⁰ Ar Timoteoyobi dule-baid bar an niksulid, bemargi nue-napiraa binsaed.

²¹ Ar baigandi belagwapa na emarginbi binsamalad, Jesucristo-ibmargindi binsasurmalad.

²² Bemardi bato wismalad, igi Timoteo na e-daed oyosa, machi na igi bab-ebogwa arbae, ayobi Bab-Dummad-gaya-burba-nued-berbegedgi Timoteo anba arbasad.

²³ Degisoggu, aga Timoteo bemarse barmidedgi an binsaed, an wisgusar igi wegi anga igar guoe.

²⁴ Degisoggu, Bab-Jesúsgi an bensulid, a-sogedba emiskwasaar bemarse an nadapmogoed.

²⁵ Emigindi an-gwenad-Epafrodito, bemarse gannar an barmidager-gebed. We-dule anba-arbaed-duled, degine, Bab-Jesús-igar-barsogedgine anbo alamaknai-gusad-dulebalid. Ar bemar-sunnad we-Epafrodito-barmiar-gusad, nue an-bendakegar.

²⁶ Emide Epafrodito ar nue bela bemar-dakbi-gudiid, degine, beedse nue e-oakudii-gusad, deun geguye bemar e-wisguar itosgu.

²⁷ Ar nue napiragwad Epafrodito ueles-gusad, burgwednaga. Ar Bab Dummad abi nue wile daksasulid, wile an-daksamogad, a-ulale, Epafrodito burgwissulid, degiir an-bukib-itodiidgi bur wile-itoged anga uko-itole.

²⁸ Degisoggu, a-ulale an bermarse Epafrodito nue barmidbisunnad, adi bemar Epafrodito-dakalile, wergumalagar, degi, anmoga dogdar mer bukib binsadii-guegarmo.

²⁹ Degisoggu, Bab-Jesús-nuggi nuedgi Epafrodito be weligwaledgi abingamalo. Deginbali, dulemar-Epafroditoyob-damaladi e-nug bemar ogannoge-wilubmalad.

³⁰ Ar Epafrodito Cristoga arbaed-ular burgwednaga-gusad, na san sabsuli uksa-gusad, adi bemar-nuggi anga arbaegar. Ar ade bemardi geg an-bendaked, angi dikasur maid-ular.