Zacarías 9 - Kuna San Blas

6. DULEMAR-YAR-BAID-BAIDGI-BUKWAMALAD SABSUR-ODURDAKLEGOED (9:1-8)

¹ Bab-Jehová we-gayaburba Hadrac-neggwebur-annik, degi, Damasco-neggweburnik sogsagusad. Bab-Jehová bela-dulemar-bukwadi dakmaid, degi, bela Israel-dulemar-danar-danar-bukwamalad dakmaibalid.

² Deginbali, Bab-Jehová Israel-dikarba-yar-naid Hamatʼye-nugad dakmaibalid. Bab-Jehová, neggwebur-nasgusbukmalad: Tiro, degi, Sidón, dakmaibalid.

³ Tiro-dulemar galu-matusulid-gandikmalad sobsad. Ukub-mergueyob mani onmaksad. Igarba olli-nanaiyob ormar onmaksad.

⁴ Degi-inigwele, Bab-Jehová bela e-ibe ibmar sunonikoed, bela e-ibe e-ibmar-nuegan demargi mioed. Soogi bela e-neggwebur ogumakoed.

⁵ Ascalón-dulemar deyob-neg-guoedi dakmaloed, geb dobgudmaloed. Gaza-dulemar, naibid-dummad itomaloed. Ecrón-dulemar e-bendakleged-edarbediid-sate-dakarmalale, nunmaked-dummad itomarmogoed. Gaza-dulemar, rey-sate gumaloed. Ascalón-neggwebur dulemar-sate sigoed.

⁶ Asdod-neggweburgi dule-isganamar megnonikoed, Filistea-dulemar-na-e-nug-dummarba-imakdiid, an obelogoed.

⁷ Filistea-dulemar ablisba-mesa-san-gunmaladi, an obelogoed. Mas-ise-gulleged-gunmaladi, an obelogoed. Filistea-dulemar-abar-bemaloedi, anmar-Bab-Dummadgadga gunonimarmogoed. Amala, Judá-dulemar-e-dummaganga gunonimaloed. Ecrón-dulemar, Jebuseo-dulemaryob gumaloed.

⁸ Mer dulemar anse-goled-neggi yogasaar dogsa-dogsa-gumalaga, an egi nakuledii guoed. An-neggweburgi dule-emar-sabsur-imaked bar dognonikosulid, ar an-sunnagwad an egi nakuledii guoed.

7. SIÓN-E-REY-MEGNONIKOED (9:9-17) Sión-e-rey

⁹ Sión-dulemar, ¡be nue-wergumala! Jerusalén-dulemar, ¡weligwaledba be binnasur gormala! ¡Weligwaledba be gormakmala! Be dake, be-rey bese danikid. Be-rey, dule-innikigwadid, emar-abonogedid, na san-dummarba imaksulidid. Moli-uayasuid-bipigwad-birgi-sii danikid, we-moli-bipigwad, moli-uayasuid-ome-e-mimmid.

¹⁰ We-rey, Efraín-e-moli-urmar-bila-onoged obelogoed, Jerusalén-e-molimar obelogoed. Warsib-bila-onoged bibisgoed, bela dulemar-yar-baid-baidgi-bukmaladga, neg-bogidikidgi sunmaknonikoed. We-rey, bela demar-nanaid-ugakaase neg-ganonikoed. Éufrates-diwar-maid-akar, bela we-napneg-bergunaidse, neg-ganonikoed.

Israel-dulemar gannar bendaklenonikid

¹¹ “An bebo-ablisba-igar-mesisad-ulale, be-dulemar-dia-dummad-dinnagwadgi-galesbukwamaladi, an onogoed.

¹² Dule-galesbukmalad-bendakleged-edarbebukmalad, gannar e-neg-gandikid-bukwadse dagmala. Ar emi an bega soged, bemar-wilesadbali, bur bule ilabo-wilub wergued an bemar-imakoed.

¹³ An-warsiyob an Judá-dulemar gachii gaoed, an-siguyob an Efraín-dulemar imakoed. Sión-yar, an be-mimmigan, Grecia-mimmigangi-yolegega an imakoed. Bila-onogedgi-es-suid-ebulegeyob an be-imakoed.”

¹⁴ Bab-Jehová Grecia-dulemargi nonikoed. E-sigu, mala-aidegeyobi miledoed. Bab-Jehová-Bela-Gangued-Nikad gar-trompeta ogornonikoed, dad-nakwed-argan-nuedsik-burwa-dummad-goled-abargi naoed.

¹⁵ Bab-Jehová-Bela-Gangued-Nikad na e-sordamar-bendaknonikoed. E-sordamar, e-isdarmalad-e-gingimar bela obelogoed. Vino-gobeyobi ablis gobmaloed abali, mummu-gunanaiyobi, allenanaioed. Igi ablis ibmar-ogumakar-ukleged-ailagi-eolegega nogmargi enoledae, deyobi, ablisbi-moodo gudimaloed.

¹⁶ A-ibagine, e-Bab-Dummad-Jehová, na e-sordamar sibad-wawaadyobi bendaknonikoed. E-sordamar Bab-Jehová-e-yargine, ologurgingi-akwa-nuegan-bukwadyob dakarmakdemaloed.

¹⁷ Ibiyobi bela we-ibmarmar, doggus-nued daklenonikoe. Ibmar-gwag-gulleged sapingan-ogannogoed. Vino-ochigwad, weligwar bunamala-imaknonikoed.