Zacarías 7 - Kuna San Blas

4. MAS-GUNSULID-IBA-SUNSOGEDSULID (7:1-14)

¹ Rey-Darío birgabakegus negsemaidgine, nii-walabakebak-ibabakegi, Bab-Jehová Zacaríasʼga sunmaknonikid. A-nii Quisleuʼye nugad.

² A-ibagangine, Betelʼginmalad, Bab-Jehováʼse wilesagwa-ibmar-egisega we-dulemar-barmisad: Sarezer, Regem-Melec, degi, e-dule-bamalad.

³ We-dulemar, Bab-Jehováʼse-goled-neggi dule-irwa-Babse-gormalad-gudidimaladse-ibmar-egisega, degi, Bab-Dummad-e-gayaburba-barsogmaladse, weyob ibmar-egisegala barmilesmalad: “Ar igi anmar gusgu birga-irba nii-walataledgi, iba-onodaeyobi, ¿ibagwen wile-itoged-iba, degi, mas-gunsuli-gued-iba nasikoe?”

⁴ Geb Bab-Jehová-Bela-Gangued-Nikad-e-gayaburba anse weyob nonikid:

⁵ “Bela dulemar we-yargi-bukwamaladga be sogo, dule-irwa-anse-gormaladga be sogmogo: ‘Bemar birga-irba, birga-dulapaa-gakambegus (70), nii-walataledgine, degi, nii-walagugledgine (7), mas-gunsulid-iba, degi, wile-itoged-iba onodamargua, ¿bemar nue anga mas-gunsulid-iba ononanaidamala?

⁶ Ar bemar mas-gunnarmalale, gobbarmarbalile, ¿na be bemarga imakmarsursi?’ ”

⁷ Jerusalén-neggweburgi, degi, neggweburmar-e-dikarba-bukwadgi-dulemar-bukwaunni, degi, neg-bogidikid-naiunni, Bab-Jehová we-gayaburba na e-gayaburba-barsogmaladba, ¿deyob sogsa gussursi? Deginbali, Neguev-yargi, dad-argwanedsik-neba-nanaidgi-dulemar-bukwamarmounni, Bab-Jehová we-gayaburba na e-gayaburba-barsogmaladba, ¿deyob sogsa gussursi?

⁸ Geb Bab-Jehová Zacaríasʼga weyob sognonibalid:

⁹ “Ani Bab-Jehová-Bela-Gangued-Nikad weyob soged: ‘Innikigwadba igar be nabomala. Na be muchub-muchub sabgumala, na be muchub-muchub wiledakmala.

¹⁰ Mer omegan-ei-sui-burgwismalad be sabsur-imakmala, mer dule-babgan-satemalad be sabsur-imakmala. Mer dule-ainebarmalad be sabsur-imakmala, mer dule-wilemalad be sabsur-imakmala. Mer be na be gwage-ulubgine, muchub-muchub isdar binsamala.’

¹¹ ”Degi-inigwele, dulemar gwen eba ibsassulid. Urwedgine, wagar-biir imaksamalad. Mer itogega uaya gasmalad.

¹² Dulemar Bab-Jehová-Bela-Gangued-Nikad na E-Burbaba e-gayaburba-barsogmaladba-ibmar-sogsagusad, degi, e-igar-mesisgusad-mer-itomalaga, na e-gwage, akwayobi, dutusur imaksamalad. Degisoggu, Bab-Jehová-Bela-Gangued-Nikad uludsunnad.”

¹³ Bab-Jehová-Bela-Gangued-Nikad weyob sogded: “An ese gornaigua, gwen an-itossurmalad. Degisoggu, anse-gollarmalale, an itogosurmogad.

¹⁴ Agala, igi-burwa-dummadba ibmar-seleddae, deyobi, dule-akudakmalad-yar-baid-baidgi-bukwamaladse, an we-dulemar oaisakis gusad. E-yar-metemaladi, swanga nagunonikid, dulemar gwen bar egi nabi dasurmalad. Deyobi, iduar yar napa-nuedga-naigusadi, nega-dulesulidganga nagunonikid.”