Zacarías 6 - Kuna San Blas

Moli-urmar-walabakegwad

¹ Gannar an niba atakdebargua, an negburgan dakarbalid. Agine, yar-gwabo-siid-imbaba bila-onoged-urmar-napagined-walabake nodaniki an dakalid. A-yar-gwabogwadi esgoro-gordikidbi nanaed.

² Ur-napagined-gebed moli-ginniganase ebipilenaid. Ur-napagined-sogbogined moli-sichiganase ebipilenaid.

³ Ur-napagined-sogbaagined moli-sipuganase ebipilenaid. Ur-napagined-napisorbaliddina moli-goto-gotomaladse ebipilenaid. Bela we-molimala, dutusur itomalad.

⁴ Baliwitur-anbo-sunmaknaidse an egisded: “Dummad, we-urmar, ¿ibu obarsunna?”

⁵ Baliwitur anga sogded: “We-urmar, burwa-sogabakegwad-gormamaidid. We-burwamar, Bab-Jehová-bela-napneg-ganikid-asabin-arbimalad-sorba, noarmaladid.

⁶ Ur-napagined-moli-sichigan-egi-nanaidi, dad-nakwed-argan-sapiledsik-yar-naidsik nadapid. Ur-napagined-moli-sipugan-egi-nanaidi, dad-argwanedsik nadapid. Ur-napagined-moli-goto-gotomalad-egi-nanaidi, dad-nakwed-argan-nuedsik-yar-naidsik nadapid.”

⁷ We-moli-nollosurmaladi, napneg-ebirega gwae-gwae itomalad. Baliwitur ega weyob sogded: “Namala, bela napneg-ugakaase bipirmaknamar.” Geb nadmarsunnad.

⁸ Geb degine, baliwitur anse goted, weyob anga sogded: “Be dake, molimar-dad-nakwed-argan-sapiledsik-yar-naidse-nadmaladi, a-yargi an-urwed-boo-imakega nadmalad.”

3. JOSUÉʼGA OLOGURGIN SILESAD (6:9-15)

⁹ Bab-Jehová weyob anga sogsabalid:

¹⁰ “Emi, Sofonías-e-machi-Josías-negse be nae. A-negsega, Heldaiʼye-nugad, Tobíasʼye-nugad, Jedaíasʼye-nugad nonimalad. Amar Babilonia-neggweburgi-galesbukwa nonimalad.

¹¹ We-dulemarse or-senonimaladi, mani-senonimaladi, be egiso. We-ormargine, we-manimargine, ologurgin be sobo. We-ologurgin, dule-irwa-anse-gormalad-e-dummad-Josué-nonogi be sioed. Josuéʼde, Josadac-e-machid.

¹² Ani, Bab-Jehová-Bela-Gangued-Nikad-gued. Geb Josuéʼga an-nuggi, weyob be sogoed: ‘Wegi-dule-gwichidi, Sapi-Siklesad-Gannar-Ainieyobidye nugadid. Ar na e-sailagi gannar ainidagoed, Bab-Jehováʼse-goled-neg gannar sobnonikoed.

¹³ We-dule Bab-Jehováʼse-goled-neg gannar sobnonikoed. E-gangued-yeerdakleged nikunonikoed, e-ologangi-sii negsemai guoed. Deginbali, dule-irwa-Babse-goled e-ologangi signonimogoed. Wemar-ebogwadi, nuedgi neg-bogidikidgi negsemai gumaloed.’

¹⁴ ”Ologurginmar anse-goled-neggi bukuoed. Adi deyobi, Helem, Tobías, Jedaías, degi, Sofonías-e-machi-Hen, degisadegu an-gayaburba-ebinsadii gumaloed.”

¹⁵ Ar bemar, be-Bab-Dummad-Jehováʼba ibsaele, dulemar-dikasuli-gudidimaladi, Bab-Jehováʼse-goled-neg-soblealile, bemar-bendaknonimaloed. Deyobi, bemar wisguoed, Bab-Jehová-Bela-Gangued-Nikad bemarse an-barmiarye.