Zacarías 3 - Kuna San Blas

Dule-irwa-Babse-gormalad-e-dummad-e-mor-swilidikid

¹ Geb degine, Bab-Jehová anga negburganbali dule-irwa-Bab-Dummadse-gormalad-e-dummad-Josué oyosad. Josué, Bab-Jehová-e-baliwitur-asabin-gwichi an daksad. Degine, nia-saila Josuéʼgi-yolegega Josué-e-argan-nuedsik-gwichi an daksad.

² Geb agine, Bab-Jehová-e-baliwitur nia-saila-Satanásʼga sogded: “Satanás, Bab-Jehová bese sabsur-urwesun. ¡Bab-Jehová-Jerusalén-neggwebur-susad, bese sabsur-urwesun! ¡Nia-saila, Bab-Jehová bese sabsur-urwesun! ¡Satanás! Ar we-Josuéʼde, ¿sapan-gummakmai-sulesadyob bendaklessursi?”

³ Josué baliwitur-asabin mor-ollibi-yoi-gwichi an daksad.

⁴ Degisoggu, baliwitur dulemar-ega-ibmar-samalaga-guakwa-bukmaladga sogded: “Josué-mor-ollibi-yoid ega ungemar.” Geb Josuéʼgardi sogded: “Be dake, be-isgued an bega osulosad. Emigindi, mor-nuedi an bega yooed.”

⁵ Agine, baliwitur sogdebalid: “Josué-e-nonogine morgurgin-gutu-sated ega be sibali.” Bab-Jehová-e-baliwitur amba gwisgua, Josué-nonogi morgurgin-gutu-sated sismalad, mor-nued ega yosmarbalid.

⁶ Geb sorbali, Bab-Jehová-e-baliwitur Josuéʼga weyobi sogded:

⁷ “Bab-Jehová-Bela-Gangued-Nikadi weyob sogye: ‘Ar an-igar-maidba be nanadidibe, dule-irwa-anse-goled-ibmar-imaked be imakdidibe, anse-goled-neg-seega an be-imakoed, an-neg-imbamar-nanaid-dakega an be-imakbaloed. We-dulemar-anga-ibmarsamalad-abargi, be anga-arbaega an be-imakoed.

⁸ ” ’Dule-irwa-Babse-goled-bur-dummad-Josué, nue be itogo. Be-sordagan-be-asabin-sigdimaladi, nue itomarmogo. Ar bemar yoedse-ibmar-guoed-wilubga gumalad. An-mai sapi-siklesad-gannar-ainieyobid an sedasokalid.

⁹ Josué, an be-asabin akwa-sisad nue be dake. We-akwa wagar-gwagugle (7) nikad. An-sunnagwad an we-akwagi ibmar-soggwen narmakoed. Ani Bab-Jehová-Bela-Gangued-Nikad soged, We-yargi-bukmalad-e-isgued ibagwen-unni an elioed.’

¹⁰ ”Bab-Jehová-Bela-Gangued-Nikad soged: ‘A-ibagine, uva-dub-urba-ambikumalaga, degi, sapi-higueraʼye-nugad-urba-ambikumalaga, bemar na be muchub-muchub be-neg-dikarba-mamaidse gormaloed.’ ”