Zacarías 2 - Kuna San Blas

Dule wilubsaed-dub ganikid

¹ An niba atakdegua, dule-gwensak e-argangine wilubsaed-dub-ganiki an dakalid.

² An a-dulese egisded: “¿Bia be nae?” Geb an-abin-imaksad: “An Jerusalén-neggwebur wilubsasokalid. An wisgubied, bule sugudibe, degi, bule matardungubardibe.”

³ We-baliwitur-anbogwa-sunmaknaid bato nasokalidgine, baliwitur-baid ese nonikid,

⁴ ega sogded: “We-sapingwaga gwae ega be weyob sognae: ‘Jerusalén-neggweburgi dule-bukidar ambikunonikoed, moli-bukidar ambikunonikoed. Jerusalén neggwebur-galu-matusulid-satedga gunonikoed.’

⁵ ”Bab-Jehová soged: ‘Jerusalén-neggweburgala an soo-galu-matusulidyob ebiris gunonikoed. An Jerusalén-neggweburga e-gangued-yeerdaklegedga gunonikoed.’

⁶ ”Bab-Jehová weyob soged: ‘¡Be nomala! ¡Be wakinmala! Yar-dad-nakwed-argan-sapiledsik-naidgi be nomala.’ ”Bab-Jehová weyob soged: ‘Ani an bela-we-napneg-ugakaase, bemar-oaisakiega imaksad.’

⁷ ”Bemar Sión-dulemar, Babilonia-yargi-gudimalad, egi be nomala, egi be wakinmala.”

⁸ Ar Bab-Jehová-Bela-Gangued-Nikad, dule-yar-baid-baidgi-bukmalad-bemar-ibe-ibmar-susmaladga, weyob gandikidba ibmar-sogega an-barmialid: “Dule-bamalad an-dulamar-naibi-imakele, an-naibi-imaknaimogad.

⁹ A-ulale, an-sunnad, an we-dulemargi gwisgunonikoed, e-maimar bela e-ibe ibmar atursanonimaloed.” Weyobi wisgunonimaloed, Bab-Jehová-Bela-Gangued-Nikad an-barmiarye.

¹⁰ Bab-Jehová weyob soged: “¡Sión-dulemar, weligwaledbali be gormakmala! ¡An bemar-abargi megnonikoed!

¹¹ ”A-ibagine, bukidar dule-yar-baid-baidgi-bukmalad anba nagumaloed. A-dulemar-bukidarad an-dulamarga gunonimaloed, a-dulemar-abargi an megnonikoed.” Deyobi, wisgunonimaloed, Bab-Jehová-Bela-Gangued-Nikad bemarse an-barmiarye.

¹² Bab-Jehová yar-islidikid-naidgi Judá-yar na egadga imaknonikoed. Degine, Jerusalén-neggwebur gannar sunonibaloed.

¹³ Bela-dulemar Bab-Jehová-asabin bogidik ambikumala, ar Bab-Jehová e-neg-islidikidgi-maid-akar bato danikid.