Tito 3 - Kuna San Blas

4. JESÚSʼBA-NANAIMALAD IGI-DAMALARGEBE (3:1-11)

¹ Tito, gwenadganga gannar be sogo, insamaloye: Dule-negsemamaid-urbaligwa be nanamaloye, dummagan-mamaid-urbaligwa be nanamaloye, amar-sogedba damaloye. Ibmar-nueganbi-imakegala, be guagwar gudii gumaloye.

² Mer dulemargi ichakwa sunmakmaloye, bur be bogidik gudiguo. Bur dulemargi binsaed-nikaa damaloye, bela dulemar-baigan-urbaligwadaed na be imakmaloye.

³ Ar anmar epenne deyob binsaedsuli-gudii gusmogad, Bab-Dummadba ibmar-imaksuli-gudii gusmogad. Weyob anmar gudii gusad: Yardakles-gudii, ibmar-isgana-maiga-gudii, ibmar-isganagi-wergudii, ibmar-isganagi-binsadii, nobgudii, dulemarse-isdar-dakledii, degine, muchub-muchub-na-isdar-dakdii, anmar gusmalad.

⁴ Ar Bab-Dummad-anmar-Abonoged-e-nued-dulemargi-binsaed-oyolenonigu, degine, bela e-sabgued dulemarse-oyolenonigu,

⁵ Bab Dummad wile-anmar-daksadba anmar-abonononikid. Anmar ibmar-innikii-imaksadbarsulid. Bab-Dummad-Burba-Isligwaled-uksadba anmarga isgued-elinonikid, burba-dulad anmarga uknonikid. Deyob anmar-abonononikid.

⁶ Anmar-Abonoged-Jesucristoʼba, Bab-Dummad anmarga E-Burba-Isligwaled unnitiba uknonikid.

⁷ Bab-Dummad anmargi-nabir-binsamaidba, isgussuliyob anmar-daknonikid, degine, bensulidgi burba-geg-bergued-edarbediguega anmar-imaksad.

⁸ Tito, we-Gayaburba, napiragwadid. We-Gayaburbagi nue-gandikidba dule-odurdaknai an be-abeged, adi, dulemar-Bab-Dummad-bensurmalad ibmar-nueganbi imakdigumalagar. We-ibmarmar, ibmar-nueganad, degine, dulemarga ibmar-nueganga gubalid.

⁹ Ar ibmargi-binsa-ee-sunmaklemaladgi, dadgan-danimalad-igargi, mer be sunmakdii guo. Muchub-muchub-abin-abin-imakmaladgi, Moisés-Igar-Mesisadgi-abin-abin-urwemaladgi, mer be sunmakdii guo. Ar weyob sunmaklegedi, binsaledid, gwen ibmar-nueganga gusulid.

¹⁰ Ar dule-wargwen sordamar-mamardiile, ese be goloed. Irbo-goledgi be-itosulile, a-dule be onogoed.

¹¹ Ar be wisid, we-dule-degidaedi, isgudiid, galagwensuli gudiid. Ar na e-daedbali, bato odurdakleged-igar ega megisdo.

5. PABLO, TITOʼGA NAPI IBMAR SOGSAD (3:12-14)

¹² Artemas an bese barmidodibe, Tíquicoʼdibe. We-gwensak bese-modapile, be gwae anse Nicópolis-neggweburse-daged imako. Ar a-neggweburgi an dii-wied-niigi mai guoed.

¹³ Dule-irwa-gwisgued-Zenas, degine, Apolos, amarga ibmar be ukmalo, adi, neggwebur-baidsik-nadmalar, melle ibmar-sate igarba nadapi gumalagar.

¹⁴ Degine, anmar-sordamarmoga, ibmar-nuegan-imaked durdakmarmogoed, adi, dule-ibmarsurmaladga ibmar-nuegan-imakega, mer binsa Bab-Jesúsʼba nanadii gumalagar.

6. NAPI-SOGLENAID (3:15)

¹⁵ Bela an-walik-bukmalad bega sogsimardo, bemarde nued sogeye. Dulemar-Jesúsʼgi-bensurmalad-anmar-sabmaladga be sogo, bemar nued sogeye. Bab-Dummad nued bemargi binsasun.