Tito 2 - Kuna San Blas

3. IGAR-NUEGAN-MAMAIDGI-ODURDAKLEGED (2:1-15)

¹ Tito, ar bedi Jesús-Igar-nuegan-mamaidba be innikii sunmako.

² Dadormarga be sogo: Mer dogdar wilub-obichaa damaloye, mer dodoakwaa damaloye, nue-binsaed-nikaa damaloye, Jesúsʼgi-nue-bensuli gumaloye, nue sabgumaloye, degine, mer ukurmakar ibmar abemaloye.

³ Amba deyob mukwamarga be sogmogoed: E-daedgi Bab-Dummad-dobee nanamaloye, mer dule-baigan-ogakansamaloye, mer mumgudii nanamaloye, ibmar-nueganginbi dulemar-baigan-odurdakdii nanamaloye.

⁴ Deginbali, mukwamarga be sogbalo, omegan-odurdakbaloye: E-nusgana-sabguedgi, e-suimar-sabguedgi,

⁵ nue-binsaed-nikadaedgi, san-swilidik-nanaedgi, neg-nued-akwedgi, nueddaedgi, e-sui-urbaligwa-nanaedgi, adi, dulemar mer Bab-Dummad-Gayaburbagi isdar sunmakmalagarye.

⁶ Deginbali, sapingana be weyob unabalo: Nue-binsaed-nikaa damaloye.

⁷ Tito, bedi be bela ibmar-nuegan-saedgi sapinganga be oyogoed, igi nanamalargebe. Ulubgi akar-binsasulidgi, degi, sunmaked-napiragwadgi dodoakwaadasulidgi, be sapingan-odurdakoed.

⁸ Gaya-nuegangi be sunmakoed. We-gayagi dule geg akar soged. Weyob be odurdakele, be-isdarmalad be obingegsaoed. Ar ade, begi ibmar-isdarmalad geg soge-gumaloed.

⁹ Maigan be weyob ounabalo: Be-dummagan-ibmar-sogedba be damarye, bela yeer-itoged be imakye, melle abin be sunmakmarye.

¹⁰ Degine, mer e-ibe be ibmar atursamaloye. Na be oyoged imakmarye, bemar geg-dulemar-yardakmaladye, adi, begi dakmalagar, Bab-Dummad-anmar-Abonoged-e-Igar, igar-nuedi.

¹¹ Bab-Dummad bela nabir dulemargi binsamaid. Ar Bab-Dummad nabir dulemargi binsaewilubsulinad. Emigindi, isguedgi bela dulemar-abonogega, e-nabir-binsaed bela dulemarga oyononikid.

¹² Bab-Dummad nabir-anmargi-binsaedba we-igarmargi anmar-odurdaknonikid: Bab-Dummadgi-binsasuli-nanaed-obaned, ibmar-isganagi-binsaed-obaned. Adi, weyobi anmar we-napneg-naidgi nue-binsaed-nikaa nanaegar, ibmar-innikigwadbi-imakdii guegar, nue-Bab-Dummad-dobee-nanadii guegar.

¹³ Emide anmar, bensulidgi anmar-Bab-Jesucristo-Abonoged-nuedid e-gangued-yeerdaklegedgi-gannar-danikoed edarbedimarsunnad.

¹⁴ We-Jesucristoʼde isguedgi anmar-onogegala, anmar-anar na san-burba uksagusad, anmar-anar burgwisad. Adi, bela anmar-isgudiid eliega, egadga anmar-imakega swilidik anmar-imaksad. Adi, anmar ibmar-nueganbi imakdii guegar.

¹⁵ Tito, weyob bega ibmar-soglesadba be sunmako, be dule-unao, gandikidba weyob be ibmar sogo. Mer dulemar ibgwensur-be-daked be imako.