Sofonías 1 - Kuna San Blas

1. BAB-JEHOVÁ-SABSUR-URWOED-E-IBA (1:1-18)

¹ We, Bab-Jehová-e-gayaburbad. Amón-machi-Josías, Judá-yargi-reyga-maiunni, Bab-Jehová we-gayaburba Cusi-machi-Sofoníasʼga sognonigusad. Sofoníasʼde Gedalías-wagwad, Amarías-wagwa-yokorginedid, degi, Ezequías-wagwa-daksikidid.

Neg-bergued-danikoed iduakwaa owisolenaid

² Bab-Jehová soged: “We-napneggi bela ibmar-bukwadi, an obelogoed.

³ Dulemar-bukwadi, ibdurgan-bukwadi, an obelogoed. Sikwimar-gukudimaladi, uamar-gudimaladi, an obelogoed. Bab-dummadyob-ibmar-imakledimalad, an obelogoed, dule-isganamar, an obelogoed. Dule-we-napneggi-gudiid, an obelogoed.” Bab-Jehová deyob soged.

Judá-dulemar sabsur-odurdaklenonikoed

⁴ Bab-Jehová sogbalid: “Judá-yarginmalad an sabsur-odurdakoed, bela Jerusalénʼgi-gudimalad an sabsur-odurdakoed. Jerusalénʼgi ibmar-Baal-bab-dummadyob-imaklediidi, an bela obelogoed. Dule-Baalʼga-arbadimalad-e-nug, an obelogoed. Dule-irwa-Baalʼse-gormalad-e-nugse-bakale, an obelogoed.

⁵ Dulemar na e-neg-niba niisgwamar-nug-odummogega, niisgwamar-asabin-sindigar-sigmalad, an obelogoed. Dulemar, sindigar-sii an-nuggi ise-sogar-ibmar-sognaid, degi, bab-Milcom ise-sogar-ibmar-sognaidamarbalid, an obelogoed.

⁶ Dulemar-angi-bangudmalad, degi, an amisurmarbalid, degi, anse idaksurmarbalid, an obelogoed.”

⁷ Bab-Jehová-Bur-Gandik-Maid-asabin bogidik sigmalo, ar Bab-Jehová-e-iba bato mosad. Bab-Jehová ibmar-ogumakar-ukleged guakwaa urbisad, ese-dagega-gorlesmaladi swilidik imaklesmalad.

⁸ Bab-Jehová sogbalid: “Anga-ibmar-uklegoed-e-ibagi, dule-dummaganga-mamaid, an sabsur-odurdakoed, rey-masmala, an sabsur-odurdakoed. Bela dulemar dule-ainebalidyob-mor-yomalad, an sabsur-odurdakoed.

⁹ A-ibagine, anse-goled-neg-yawagak-dogedgi nag-obiar-dogmaladi, an sabsur-odurdakoed. Dulemar, emar-sabsur-imakedba e-bab-dummagan-neg ibmar-enasii-imakdimalad, an sabsur-odurdakoed. Emar-yardakedba e-bab-dummagan-neg ibmar-enasii-imakdimalad, an sabsur-odurdakoed.”

¹⁰ Bab-Jehová weyob sogbalid: “A-ibagine, Yawagak-Uaye-nugad-akale, dule-e-bendakega binnasuli-gornanai-gumaloedi, itolegoed. Neggwebur-binid-akale, dule-akiginmalad, itolegoed. Yarmar-mullugan-akale, wile-itogedba-binnasur-oimakmaladi, itolegoed.

¹¹ ”Mactesʼginmalad, binnasur be gormakmarmoga. Ar a-ibagine, dule-manigi-ibmar-ukmalad bergunonikoed. Mani-muchub-ibmar-ogwamalad bela burgwemaloed.

¹² A-ibagine, Jerusalén-neggweburgi gwallu-mee an imaknonikoed. Dulemar-vino-sabolebukwadyob dobsuli-bukwamalad, an sabsur-odurdakoed. We-dulemar binsamalad: ‘Bab-Jehová ibmar-nued imakosulid, ibmar-isgana imakosurbalid.’

¹³ A-ulale, ibmar-nuegan bela e-ibe sulegoed, e-negmar, bela swana naguoed. Neg-sobnanai-gumaloenad, degi-inigwele, egi gwen megosurmalad. Uva-dub digmaloenad, degi-inigwele, e-vinoʼdi gwen gobosurmalad.”

Bab-Jehová-e-urwed-dummad-iba

¹⁴ “Bab-Jehová-e-urwed-dummad-iba bato walikgudanikid, a-iba gwae-gwae modanikid. Bab-Jehová-e-urwed-dummad-ibagine, sabsur-gormaknanai gumaloed. Dule-buledse-bakale, binnasuli-gornai guoed.

¹⁵ A-iba, urwed-dummad-iba, naguoed. Wile-itoged-iba, surbinsa-itoged-iba, naguoed. Bela ibmar-bergued-iba, ibmar-bibisged-iba, naguoed. Negsichid-nagued-iba, neg-gudureged-iba, naguoed. Boo-bela-bela-babated-iba, mogirmar-sichigan-nagued-iba, naguoed.

¹⁶ Gar-trompeta-goled-iba, bila-onogega oimaknanaigumaloed-iba, naguoed. A-ibagi, neggweburmar-sakdigar-bukwadgi-bila-ononaegala, igar uklegoed. Negmar-matusur-gwigwichidgi-urwenamalaga, igar uklegoed.”

¹⁷ Bab-Jehová soged: “Dulemar angi isgusmalad. A-ulale, bela-bela-surbinsa-itogega an imakoed. Ibyasuliyob gudii gumaloed.” E-ablis ukubyob milemai guoed. E-sanmar ibmar-isganayob milemamai guoed.

¹⁸ Bab-Jehová-urwed-ibagi, e-mani gwen e-bendakosulid, e-or gwen e-bendakosurbalid. Bab-Jehová-e-sae-itogedbali, bela napneg-naid berguoed. Bela-dulemar-napneggi-gudidimalad, ilagwen-obelolegar ese imaklemaloed.