Salmo 97 - Kuna San Blas

Bab-Jehová, Rey gued

¹ ¡Bab-Jehová, Rey gued! ¡Napneg, wergumala! ¡Dupugan-dikasur-nanaid, wergumala!

² Mogir-guduremalad Bab-Jehová-ebilis naid. Bab-Jehová igar-inniki-imakedba negsemaid, igar-innikigwadba negsemaid.

³ Soo, Bab-Jehová-idu nadapid, we-soo, Bab-Jehová-e-isdarmalad Bab-Jehová-ebiris-bukwad obeloged.

⁴ E-mala-ibyedi napneg-mee imaked. Napneg mala-ibyed-dakdegu, wawanmakded.

⁵ Yarmala baka-gwalluyob Bab-Jehová-abin daluded. Bab-Jehováʼde bela we-napneg-e-ibedid.

⁶ Mogirmar, Bab-Jehová-e-igar-innikigwad-imaked barsogmalad. Bela-dulemar, Bab-Jehová-gangued dakmalad.

⁷ Dule-bab-dummadyob-ibmar-imakdimalad, bingegumala. Dule, bab-dummadyob-ibmar-imakdimaladgi na san-dummarba-imakmalad, bingegumala. Bela bab-dummadyob-ibmar-imaklemalad, Bab-Dummad-asabin dulluu sigmala.

⁸ Bab-Jehová, be igar-innikigwad-imaked-ular, Sión-neggwebur, weligwar itoged, Judá-neggweburmar, yeer itomalad.

⁹ ¡Ar be, Bab-Jehová-Bur-Birigined gued! ¡Be we-napnegba bur dummad gued! ¡Be, bab-dummadyob-ibmar-imaklemaladba bur dummad gued!

¹⁰ Bab-Jehová, dule-ibmar-isgana-isdar-dakmalad, sabed. Bab-Jehová, e-dulamar-inniki-nanadimalad, edarbed. E-isdarmaladgi wakinnega imakbalid.

¹¹ Dule-nuegan, nue-binsaed-nikaa imaked, Bab-Jehová, dule-inniki-gudidimaladga weligwaled uked.

¹² Bemar dule-nuegan, Bab-Jehováʼgi be wergumala, Bab-Jehová-nug-isligwaled be odummomala.