Salmo 96 - Kuna San Blas

Bab-Dummad, anmar-Reyd

¹ Bab-Jehováʼga, namakleged-binidgine, be namakmala. Bela napneggi-dulemar-bukwad, Bab-Jehováʼga namakmala.

² Bab-Jehováʼga namakmala, e-nug odummomala, e-isdarmaladgi-nakwisad bane-bane obarmala.

³ Dulemar-yar-baid-baidgi-bukmalad-abargi, e-gandikid-yeerdakleged sogmala, bela neggweburmar-abargi, e-ibmar-gegerdaklemalad-imaked obarmala.

⁴ Ar Bab-Jehová, dule-dummadid. Bela-belad e-nug odummolegergebed. Bab-Jehová ibmar-bab-dummadyob-imaklemaladba bur bule dobguleged.

⁵ Neggweburmar-baigan-e-bab-dummaganga-imaklemaladi, Bab-Dummadsulid, unnila ibmargi sobarmaladid, ar Bab-Jehováʼdi nibneg obinnisad.

⁶ ¡Bab-Jehová-walikaa neg-ibegwaled naid, dummarba-gued naid! E-neggine gangued oyolenaid, yeerdakleged oyolenaid.

⁷ Bela-dulemar-napneggi-bukwamalad, Bab-Jehová-nug odummomala, Bab-Jehová e-gandikid-yeerdakleged be obarmala.

⁸ Bab-Jehová-e-nug-gandikid-yeerdaklegedi be ogannomala. Ese-goled-neg-imbase be dogdamala, ega ibmar-ukleged be sedamala.

⁹ Bab-Jehová-e-nug, e-neg-yeerdaklegedgi be odummomala. Bab-Jehová-asabin bela-napneggi-dulemar-bukwad bela-belad dobekwaa ambikumarsun.

¹⁰ Dulemar-yar-baid-baidgi-bukmaladga weyob be sogmala: “¡Bab-Jehová, Rey gued!” Innikigwadba napneg nasiksad, napneg bar bipisaale onirilegosulid. Bab-Jehová igar-innikigwadba dulemarga igar-naboged.

¹¹ ¡Nibnegmar weligue, napneg yeer-itoge! Muu-billi uurmake, bela egi ibmar-bukwad weligumala.

¹² Sapurmar, weligwar namakmala. Bela sapurgi ibdurgan-bukwad, weligwar namakmala. Bela sapurgi sapimar-bubukwad, weligwar namakmala.

¹³ ¡Bab-Jehová-asabin namakmala, bato danikid! Igar-innikigwadba dulemarga-igar-nabogega bato danikid. Bab-Jehová igar-innikigwadba dulemarga igar-nabogoed. Napiragwadgi dulemarga igar-nudakoed.