Salmo 94 - Kuna San Blas

Bab-Jehová-igar-naboged innikigwadid

¹ Bab-Jehová-dule-buged-mai-imakedye, Bab-Dummad-dule-buged-mai-imakedye, be magarodage, dule-sabsur-imaklediid be buged-mai imakdage.

² Bab-Jehová, be igar-naboged-dulesoggu, be-gangued be oyodage, dule-na-san-buled-imakdimalad, be sabsur-odurdakdage.

³ Bab-Jehová, ¿sanagwadse dule-isganamar yeer-itodii gumaloe?

⁴ Ar bela we-dule-isganamar, dule-ibmar-sabsur-sogmaladid, na san-dummarbaa imakmaladid.

⁵ Bab-Jehová, dule-isganamar be-dulamar-sabsur imakdimalad. Be-dulamar-mesagwar imakdimalad.

⁶ We-dule-isganamar, omegan-ei-sui-burgwismalad oburgwemalad. Wemar, dule-yar-baidsikid ogilomalad. Wemar, dule-babsuli-gudimalad gindakmalad.

⁷ Dule-isganamar sogmalad: “Bab-Jehová we-ibmar daksulid, Jacob-e-Bab-Dummad, we-ibmar wissulid.”

⁸ ¡Dule-ibmar-aku-itomalad, be magar itomala! Bemar binsaed-satemaladi, ¿sanagwadse be binsaed-nika gumaloe?

⁹ Ar dule-anmarga-uaya-nasiksadi, ¿itogosuli? Ar dule-anmarga-ibya-sisadi, ¿dakosuli?

¹⁰ Ar dulemar-ibmar-noar-imaksad-onudakedi, ¿sabsur-odurdakosur be ebinsae? Ar dule-ibmargi-odurdakedi, ¿ibmar-wisguosur be ebinsae?

¹¹ Bab-Jehová dulemar-binsaed bela wisid, Bab-Jehová wisid, dulemar unnila yogasaar binsamalad.

¹² Bab-Jehová, dule-ibmar-noar-imaksad be nudakedi, we-dulegi be ise-nued binsasad. Be, be-igar-maidgi-dule-odurdakedi, we-dulegi be ise-nued binsasad.

¹³ We-dule, ibagan-bulegangi gwage-bogidiki gudiguoed. Dule-isganagardi, diglegega napa gwislegoed.

¹⁴ Bab-Jehová e-dulamar obanosulid. Bab-Dummad, e-dulamar-egadga-imaksad wargwen metosulid.

¹⁵ Igar-nabolegedi igar-innikigwadba imaklegoed, bela dule-gwage-inniki-gudimalad, igar-maidba damaloed.

¹⁶ ¿Doa, dule-isganamar-abin an-irwa gwisgusa? ¿Doa, dule-isganamar-abin anba nagusa?

¹⁷ Ar Bab-Jehová an-bendaksasulina, bato an napa-uluba bergus mellemainad.

¹⁸ Bab-Jehová, an sogsagusgu, “an bergudaniye,” be-sabgued-nikadba yog be an-bendaknoni gusad.

¹⁹ An bela-bela suli-suli-itogedgine, baisur-itogega be an-imaksad, weligwaled be anga uksad.

²⁰ Bab-Jehová, reymar-isganamar-e-aiga geg be gued. Ar we-reymar ibmar-isgana-imakega igar-mesmalad,

²¹ dule-nuegangi-aibinega igar-amimalad, dule-ibmar-akar-imaksasulid-oburgwega imakmalad.

²² Ar Bab-Jehová an-edarbedid, an-Bab-Dummadid, akwasaila-an-odukuedyob gued.

²³ Bab-Jehová dule-isganamar-e-isguedi, dule-isganamargi-aibinega imakoed. Bab-Jehováʼse e-isgusad-ulale, dule-isgana berguoed. ¡Anmar-Bab-Dummad-Jehová we-dulemar-obelogoed!