Salmo 88 - Kuna San Blas

Burgwedgi-bendaklegega Babse-goled

Namakmalad-e-iduedga soglesad: We-namakleged Mahalatʼyob namaklegoye.

¹ Bab-Jehová, Bab-Dummad-an-bendaked, an bese ibginedba, mutikidba gordiid.

² An bese-gornaidi be itoge. An bese wilesakwaa-goledi be nue itoge.

³ Bela-bela angi bonigan yolenaid, an burgwedani maid.

⁴ Dulemar bato burgwisayob angi binsamalad. An ganguedsulidyob dakleged.

⁵ Burgwarmalad-abargine an-metemalad, napa-urba mui-mellemaiyobi an gued. We-muimargi-bar-be-binsalesulidyob an gued, ar be wemar bar-bendaksasulid.

⁶ Yaa-bur-matusulidgi be an-balimeted, nega-sichiganba, napa-urba-solanaga be an-balimeted.

⁷ Be-sae-itogedi bela angine yolenonikid, be-urwed demargi-gundilenaiyobi an-imaksad.

⁸ An-aimar angi banguega be imaksad, an-aimar ima-an-dakega be imaksad. An dule-esgaryagi-mellesiidyob geg wakinned,

⁹ An bela-bela-boedbali an-dalamar momommakded. Bab-Jehová, bane-bane an bese gordiid, an bese argan onakdiid.

¹⁰ ¿Ar dule-burgwarmalad-abargi ibmar-gegerdaklemalad be imake? ¿Dule-burgwarmalad be-nug-odummogega sunna durgudagosi?

¹¹ ¿Dule-burgwarmamaidgi sunna be-sabguedgi sunmaklesi? ¿Dule-burgwarmalad-neggi sunna be-innikidaedgi sunmaklesi?

¹² ¿Ar nega-sichigangi, be-ibmar-gegerdaklemalad wismarsi? ¿Ar napneg-ieleged-neggi, be-igar-inniki-imakleged wismarsi?

¹³ Bab-Jehová, an bese goled, be an-bendakye. Wakudaryalaba an bese-goledgi, an be-amied.

¹⁴ Bab-Jehová, ¿ibiga be an-obane? ¿Ibiga be angi be-wagar odukue?

¹⁵ An sapingwagwad-akale ibitodiid, an burgwed-naga gudidaed. Bab-Jehová, be angine gwage-nunmaked-dummagan barmialid, geg an bar gugusad.

¹⁶ Be-urwedbali an galitosad, be-ise-sabsur-an-imaksadi, an-obelosad.

¹⁷ Be-emargi-gwisguedi, demaryobi bane-bane an-ebirnaid, bela an-ebilis naid.

¹⁸ Be angine an-aimar obachad, be an-gwenadgan angi obachabalid. Emigindi, unnila negsichidbi an-aiyob gued.