Salmo 86 - Kuna San Blas

Wile-e-dakega Bab-Dummadse goled

David Bab-Dummadse gornaid.

¹ Bab-Jehováʼye, wis be an-itoge, be an-abin-imake. Ar ande, dule-wilegedid, ibmarbina an bela-bela soged.

² Bab-Dummadye, be an-bendake, ar ande begala sogedba nanadiid. Be, an-Bab-Dummadid. An begi bensulid. Be-mai be bendake.

³ Bab-Jehováʼye, wile-be-an-dake, ar an bese gordii osedoddaed.

⁴ Be-nug-odummodiid weligwar be imake, adi, Bab-Jehová, an bese golegar.

⁵ Bab-Dummad, be dule-nued gued, isgudsuliyob be emar-dakedid. Dulemar-bese-gormalad be bela-bela sabed.

⁶ Bab-Jehováʼye, an bese-gornaid be itoge, an-wilesagwar-gornaid be itoge.

⁷ An suli-suli-itogedgi an bese goled, ar be an-abin-imakdaed.

⁸ Bab-Jehová, bab-dummagan-beyobid sated, be-ibmar-imaksadyobi gege ibmar imakmalad.

⁹ Bela be dulemar-obinnisadi, be-asabin sindigar signonimaloed, be-nug odummomaloed.

¹⁰ Bab-Dummad, ar bebi dummarba-maid, ar bebi ibmar-gegerdakleged imaked. ¡Ar bebi unnila Bab-Dummad gued!

¹¹ Bab-Jehová, an be-igar-innikigwadba nanadii guega, Be-Igar-Maid be anga oyoge. Bab-Dummad, an be-nug-odummodii nanaega, be an-gwage ogannoge.

¹² An-Bab-Dummad-Jehová, bela-bela an napiragwadgi be-nug odummogoed, degisadegu, an be-nug odummodii guoed.

¹³ Ar bela-belad be an-sabed, degisoggu, burgwega be an-imaksasulid.

¹⁴ Bab-Dummad, dulemar-na-san-buled-imakmalad angi gwisgunanaid, dule-gindakmalad an-oburgwebied. We-dulemar gwen begi binsasurmalad.

¹⁵ Bab-Jehová, bedi dule-nuedid, emar-wiledakedid. Bedi, baisursunna urwesulidid, sabgued-dummad-nikadid, dule-innikigwadbalidid.

¹⁶ Bab-Dummad, be an-dake, wile-be-an-dake. Be-nug-odummodiidga be-gargangued be uke. Ome-be-nug-odummodiid-e-machi be bendake.

¹⁷ Bab-Dummad, an-isdarmalad dakmalaga, an-isdarmalad bingegumalaga, be-sabgued be angi oyoge. Ar be Bab-Jehová, be an-bendakedid, be an-gwage-armakedid.