Salmo 83 - Kuna San Blas

E-isdarmalad-obelogega Babse-goled

Asaf, we-namaked narmaksad.

¹ Bab-Dummad, melle be gaya-bogidik mege. Bab-Dummad, melle be sunmaksuli gue, melle be ibmar-imaksuli gue.

² Bab-Jehová, be dake, ibibayobi be-isdarmalad uurmakbukwa, ibibayobi isdar-be-dakmalad begi gwisgunanai.

³ Be-dulamargi-aibinega yardakar igar-amismalad. Be-dulamar-na-be-sabgumaidgi-gwisgumalaga, yardakar bular igar-amismalad.

⁴ We-dulemar sogmalad: “Dagmala, anmar bela e-dulamar obelonae. Deyobi, Israel-e-nug bar bipisaar ebinsalegosulid.”

⁵ Dule-wargwennayob na igar-aminanaid, begi bila-onomalaga, we-dulemar na atosmalad:

⁶ Edom-dorgan, Ismael-dorgan, Moab-dorgan, Agar-dorgan,

⁷ Gebal-dorgan, Amón-dorgan, Amalec-dorgan, Filistea-dorgan, degi, Tiro-dorgan, bela wemar na atosmalad.

⁸ Asiria-dorganse-bakale, bela wemarba atosad. Lot-wagan-bendakega atosmalad.

⁹ Ar igi be Madián-dulemar-obelosgusa, deyobi be we-dulemar obelomoga. Ar igi be Sísara, degi, Jabín, Cisón-diangi-obelosgusa, deyobi be we-dulemar obelomoga.

¹⁰ We-dulemar Endorʼgi burgwismalad, ibmar-isganayob napagi miled gusmalad.

¹¹ Ar igi be Oreb, degi, Zeeb, imaksagusa, deyobi be e-sordamar-dummagan imakmoga. Ar igi be Zeba, degi, Zalmuna, imaksagusa, deyobi be bela e-dummagan-nuga-nikamalad be imakmoga.

¹² Wemar sogsagusad: “Bab-Dummad-e-yar-naidi, anmar e-ibe sumala.”

¹³ Bab-Dummad, we-dulemar burwaba-selegega be imake. Gaganmar burwaba-gukuddaeyobi be we-dulemar-imake.

¹⁴ Ar igi soo sapur-ogumakdae, degi, igi soo-gwabunyemaid yarmar-ogumakdae,

¹⁵ deyobi be we-dulemar, be-burwa-dummadgi be baleginne, be-burwa-ooredgi, be ogwaye.

¹⁶ Bab-Jehová, we-dulemar be obingegsae, adi, magar-be-dakmalaga, be Bab-Dummad gued.

¹⁷ We-dulemar, degisadegu bingegudii gumala, na bingegudii burgwemala.

¹⁸ Na wisgumala, bebi Bab-Jehová gued, weyobi be nugad. Na wisgumala, napneggine, bebi unnila Bab-Dummad-Bur-Birigined gued.