Salmo 79 - Kuna San Blas

Jerusalén-neggwebur-bergusadba nunmak-itoleged

Asaf, we-namaked narmaksad.

¹ Bab-Dummad, dulemar-aku-be-dakmalad be-yargi ubosmalad. Bese-goled-neg-islidikid oichosmalad. Jerusalén-neggwebur akwabi-dunnumakbukwa imaksamalad.

² We-dulemar, be-maimar-e-mui, mulamarga masga uksamalad. Dule-bega-inniki-nanadiid-e-sanmar, ibdurgan-ursilimarga masga uksamarbalid.

³ Be-maimar-e-ablis, bela Jerusalén-neggweburgi diiyobi eosmalad. Burgwismalad-digega dule sate gusad.

⁴ Dulemar-anmar-yar-dikarba-bukmaladi, anmargi dodomalad, dulemar-anmar-yar-dikarba-bukmaladga anmar e-dodoedga gued.

⁵ Bab-Jehováʼye, ¿sanagwadse be-urwed berguoe? ¿Sanagwadse degisadegu be urwemai guoe? ¿Sanagwadse be-nobgued sooyob gamai guoe?

⁶ Dulemar-aku-be-dakmaladse be urwe, dulemar-bese-gordisurmaladse be urwe.

⁷ Ar we-dulemar, Jacob-wagan obelosmalad. Jacob-wagan-e-yar akwabi-dunnumakbukwa imaksamarbalid.

⁸ Bab-Jehováʼye, anmar-epenne-isgusad, mer be bar ebinsae. Be-wiledaked gwae be anmarga oyoge, ar anmar bela-bela oitoles bukwad.

⁹ Bab-Dummad-anmar-abonoged, be-nug-dummarba-gued-ular, be anmar-bendake. Be-nug-sabed-ular, be anmar-ollorsae, anmar-isgusad be elie.

¹⁰ Ar ibiga dulemar-yar-baigangi-bukwad sogmaloe: “¿Bia e-Bab-Dummad nade?” Be anmarga oyoge, igi-be, be-dulamar-e-ablis-aryosad be buged-mai imake. Bela dulemar-yar-baid-baidgi-bukwamaladga oyobali, igi-be, be-maimar-e-ablis-aryosad be buged-mai imake.

¹¹ Dule-galesbukmalad-e-boed be itoge, dule-oburgwilesokarmaladi, be-garganguedba be bendake.

¹² Bab-Jehová, dulemar-anmar-yar-dikarba-bukwamalad begi dummad-dododigusmaladi, ilagugle (7) deyob-egi-dodomarmogaga be imake.

¹³ Anmardi, be-dulamar-gumalad, be-sibad-wawaadmaryob-gumalad. Degisadegu, anmar dog-nuedye bega sogmaloed. Degisadegu, anmar bega namakmaloed.