Salmo 78 - Kuna San Blas

Bab-Dummad e-dulamarga ibmar-imaked

Asaf, we-namaked-Masquilʼye-nugad narmaksad.

¹ An-dulamar, an-ibmar-odurdaked be nue itomala, an-ibmar-soged be nue itomala.

² An ibmar-burbarmaladba sunmakoed, dikasurgus negasailaunni ibmar-dukuar-mamaidi, an osanalogoed.

³ Anmar bato we-ibmar itodiid, bato anmar wisid. We-ibmar anmar-babgan anmarga sogsadid.

⁴ Anmar anmar-mimmigangi we-ibmar odukuosulid. Anmar anmar-wagan-danimaloedga Bab-Jehová-e-ganguedgi sunmakoed, e-ibmar-dummagan-imaksadgi sunmakoed, e-ibmar-dakledisurmalad-imaksadgi sunmakoed.

⁵ Bab-Dummad, Jacob-waganga Igar mesisad, Israel-dulemarga Igar mesisad. Anmar-dadganga-Igar-uksagusad, be-wagan be odurdakoye,

⁶ adi, yoedse-be-wagan-danimaloedi, bela we-Igar wisgumalagarye, degi, yoedse-mimmigan-gwalulemaloedi, bela we-Igar wisgumarmogagarye, we-mimmiganmoga, we-Igargi na e-mimmigan-odurdakmogoed.

⁷ Deyobi, wemala, Bab-Dummadgi bensuli gumaloed, Bab-Dummad-e-ibmar-dummagan-imaksad iegosurmalad. Bab-Dummad-Igar-Maidba ibsamaloed.

⁸ E-dadganyobi guosurmalad. E-dadgandi, binsaed-sate, uayasuli gusmalad, e-gwagegi innikigwadba nanassurmalad, e-ulubgi Bab-Dummad-sogedba gudii gussurmalad.

⁹ Efraín-wagan, sigu-miemalad-buleganad, degi-inigwele, bila-onolenaid-ibagi wakite gusmalad.

¹⁰ Israel-dulemar Bab-Dummadbo-Igar-Mesisadba ibmar imaksasurmalad, Bab-Dummad-Igar-Maidba ibsassurmalad.

¹¹ Bab-Dummad-ibmar-dummagan-imaksadi, ega ibmar-gegerdaklemalad-oyosadi, bela iesmalad.

¹² Bab-Dummad Egipto-yargi, Zoán-nebagi, e-dadganga ibmar-dakledisurmalad-oyosgusadi, bela iesmalad.

¹³ Bab-Dummad, Israel-dulemar nabir-obakmalagala demar-dinnaa imaksad, demar gasdibiryob ganna mesisad.

¹⁴ Bab-Dummad, ibginedba mogirbali Israel-dulemar-idu-nadapi gusad, mutikidba soo-gaedbali idunadapi gusad.

¹⁵ Bab-Dummad, nega-dulesulidganba akwasaila marisad. A-akwagi dii-aryomai imaksad, geb a-dii-gobmalaga imaksad.

¹⁶ Bab-Dummad, akwagi dii-aryogega imaksad, diwaryobi dii-aryomai imaksad.

¹⁷ Degi-inigwele, Israel-dulemar gannar Bab-Dummadgi-isgunai gusmalad, nega-dulesulidganba Bab-Dummad-Bur-Biriginedgi gwisgunai gusmalad.

¹⁸ Israel-dulemar, yamo Bab-Dummad-wilubdakbi gusmalad, agala, e-abegedba Bab-Dummadse masgunned-egicha gusmalad.

¹⁹ Bab-Dummadgi sunmaksa gusmalad, sogsagusmalad: “¿Bab-Dummad, sunna anmarga nega-dulesulidganba mas-ukoe? Suli. Anmarga geg uke.

²⁰ Ar napiragwa, Bab-Dummad akwasaila-sarsosgua, dii binnasuli aryoargusad. Ar anmarga-mas-ukegala, ¿deyob imakbalo be ebinsae? E-dulamarga, ¿sunna san ukbalo be ebinsae?”

²¹ Bab-Jehová, Israel-dulemar weyob-soge-itosgua, bela-belad uluded. Jacob-wagangi sae-itoded, Israel-dulemargi sabsur-uluded.

²² Ar Israel-dulemar Bab-Dummadgi bengusmalad, Bab-Dummad e-bendakosurye binsasmalad.

²³ Bab-Dummad, nibneg-akale, mogirmarga igar-uksad, degidba, mogirmar argaded.

²⁴ Bab-Dummad, Israel-dulemar mas-gunmalagala, mas-manáʼye-nugad ega obatisad, madu-nibneggined-gunmalaga imaksad.

²⁵ Bela Israel-dulemar baliwitur-e-madu guchamalad. Nue-immelegedse-gunmalagala, Bab-Dummad ega mas barmialid.

²⁶ Bab-Dummad, dad-nakwedsikid-burwa barmiar gusad. E-gangued-nikadba dad-nakwed-argan-nuedsikid-burwa barmiar gusad.

²⁷ Bab-Dummad, ukub-mileddaedyobi ega san obatisad, demar-gakaba ukub-mergunaiyob ega nuumar obatisad.

²⁸ Bab-Dummad, dulemar-danar-danar-bukwamaladgi, nuumar-babatega imaksad, Israel-dulemar-e-neg-gabmalad-dikarba nuumar-obatisad.

²⁹ Israel-dulemar bela-bela-immelegedse mas-guchamalad. Deyobi, Bab-Dummad, ibmar-egichamaladi ega uksad.

³⁰ Ar undar-immerba-gudii gussurmalad, ar amba e-gaya-yaba mas-sigua,

³¹ Bab-Dummad-e-urwed egi gwisgunonikid. Bab-Dummad, e-ibe bur-dule-dutusurmalad oburgwisad, Israel-dulemar-bur-nuga-nikamalad ogilosad.

³² Degi-inigwele, Israel-dulemar amba isgudii gusmalad, Bab-Dummad-geger-ibmar-daklemalad-imaksadgi bengusmalad.

³³ A-ulale, Bab-Dummad, Israel-dulemar-e-ibagan sikwas-bunnogedyobi, berguega imaksad, e-birgamar dobed-dummad-abalagi, berguega imaksad.

³⁴ Ar Bab-Dummad Israel-dulemar-abar-oburgwisale, geb Israel-dulemar-baigan gannar Bab-Dummad-amiddamalad, gwae-gwae gannar Bab-Dummadse nonidamalad.

³⁵ Geb ebinsaddamalad, Bab-Dummad ega akwasailayob guye, Bab-Dummad-Bur-Birigined e-bendaked guye.

³⁶ Ar Israel-dulemar e-gayaginbi, e-gwabin-dukuginbi, gakansaar Bab-Dummad-nug-odummodii damalad,

³⁷ ar e-ulubgindi ega gakansadii damalad. Bab-Dummadbo-Igar-Mesisadba, sogedba imaksasurmalad.

³⁸ Degi-inigwele, Bab-Dummaddi wemar-wiledaksad, e-isgusad ega elisad, wemar-obelossurgusad. Bab-Dummad, gannar-gannar na e-urwed-barganai gusad, e-urwedba ibmar-imaknai gussulid.

³⁹ Bab-Dummad ebinsasgusad, wemarde unnila dulemar-guye, unnila burwa-goleyob guye, gwen bar daklegosurye.

⁴⁰ Israel-dulemar, nega-dulesulidgangi, bukidargus Bab-Dummadgi-yoledanigusmalad. Nega-dulesulidgangi Bab-Dummad-wile-itogega imaksamalad.

⁴¹ Gannar-gannar Bab-Dummad-wilubdaknai gusmalad, Israel-e-Bab-Dummad-Isligwaled-ourwenai gusmalad.

⁴² Bab-Dummad-e-gangued bipisaar ebinsassurmalad, e-isdarmaladse-wilebukwa-onolesgusadi, ebinsassurmalad.

⁴³ Egipto-yargi, Bab-Dummad ibmar-dakledisurmalad-oyosad iesmalad, neba-Zoánʼye-nugadgi ibmar-dummagan-imaksad iesmarbalid,

⁴⁴ Bab-Dummad, Egipto-yar-e-diwarmar abega obinnisad, Egipto-dulemar, a-diwar geg gobe gusmalad.

⁴⁵ Bab-Dummad, Egipto-dulemargi, gukurmar-bela-ibmar-biin-imakmalad barmiar gusad. Noomar-ibmar-obelomalad barmiar gusbalid.

⁴⁶ Bab-Dummad, Egipto-dulemar-e-ibmar-gwag-wesmaladi, sese-burwigana-omaega imaksad, e-ibmar-gwag-gullemalad-digarmaladi, sesega urmaksabalid.

⁴⁷ Bab-Dummad, Egipto-dulemar-e-uvaʼdub-digarnanaid, dii-gwamakaled-obatisadgi obelosad, e-higo-sapimar, boo-gwamakarmaladgi obelosad.

⁴⁸ Bab-Dummad, Egipto-dulemar-e-moli-bebe-nikamalad, dii-gwamakaled-obatisadgi oburgwisad. E-sibad-wawaadmar mar-egi-odesadgi obelosad.

⁴⁹ Bab-Dummad, Egipto-dulemargi bela-bela-e-urwed, e-sae-itoged, e-isdar-itoged, e-sae-daked barmiar gusad. Baliwitur-ibmar-obelomalad danagwen barmiar gusad.

⁵⁰ Bab-Dummad na e-urwed bar bargassur gusad. Burgwedgi, Egipto-dulemar bar ollor-imaksasulid, boni-dummaganga urmaksagusad.

⁵¹ Bab-Dummad, bela Egipto-dulemar-e-machi-sailaginmalad oburgwisad, Cam-dulemar-e-machi-sailaginmalad ogilosad.

⁵² Bab-Dummad, sibad-wawaad-danar-bukwadyobi, Israel-dulamar-idunadapi gusad, nega-dulesulidganba senadapi gusad.

⁵³ Bab-Dummad, Israel-dulamar-mer-dobee-itomalaga, igar-nueganba semai gusad. E-isdarmaladdi demargi-gundilegega imaksad.

⁵⁴ Bab-Dummad, na e-yar-islidikidse Israel-dulamar-senoni gusad, na e-garganguedgi we-yarmar-susadse senonikid.

⁵⁵ Bab-Dummad, Israel-dulemar-nadapid-idu dule-baigan-bukwad onosgusad, we-dulemar-e-napamar, Israel-dulemargadga-guega ega uksad. Deyobi, Bab-Dummad, a-napamargi, Israel-dadgan-dummagan-wagan urbisad.

⁵⁶ Degi-inigwele, Israel-dulemar Bab-Dummad-wilubdaknai gusmalad, Bab-Dummad-Bur-Biriginedgi aibitemalad, e-Igar-Maidba ibsassurmalad.

⁵⁷ E-babganyobi Bab-Dummadgi aibatemalad, egi yolenai gusmalad. Israel-dulemar, warsi-binsaledyob dopere gusmalad.

⁵⁸ E-bab-dummadse-goled-neg-sobsamaladba, Bab-Dummad-oulusmalad, ibmar-e-bab-dummadga-imakdimalad-e-wilub-sobsamaladba, Bab-Dummad-nobguega imaksamalad.

⁵⁹ Bab-Dummad, weyob ibmar-daksagua, uluded, degidbali, bela Israel-dulemar-obachad.

⁶⁰ Silo-neggweburgi e-neg-meged-siidgi aibated. Agi, Bab-Dummad dulemar-abargi maidaenad.

⁶¹ Bab-Dummad, na e-Ulu, e-gangued-yeerdakleged-e-wilubga guedi, e-isdarmaladse-galegega imaksad.

⁶² Bab-Dummad bela-bela e-dulamargi urwemaisoggu, es-suidgi e-dulamar-oburgwilegega imaksad.

⁶³ E-dula-sapingan soogi gummaksamalad, e-yaganga sui-nikued-ibagi-namakleged namaklessulid.

⁶⁴ E-dule-irwa-Bab-Dummadse-gormalad es-suidgi oburgwilesmalad, E-omegan-e-ibe-sui-burgwismaladi, e-suimarga gwen bonai gussurmalad.

⁶⁵ Geb Bab-Dummad, igi-dule-gabmair atakardae, deyobi atakalid. Igi-dule-bila-onoged-buled vino-gobnair binnasuli gormakdedae, deyobi Bab-Dummad uludedba binnasuli goted.

⁶⁶ Bab-Dummad, e-isdarmalad-sikirmakega imaksad, degisadegu bingeguega imaksad.

⁶⁷ Bab-Dummad, José-wagan-obachad, Efraín-wagan-sussulid.

⁶⁸ Bab-Dummad, aka bur Judá-wagan-sunonikid, na e-yar-bur-sabed-Sión sunonikid.

⁶⁹ Bab-Dummad, ese-goled-nega nibnegyobi matusuli sobsad, Bab-Dummad, igi-napneg degisadegu-gangu-nasiksa, deyobi na e-neg gangu sisad.

⁷⁰ Bab-Dummad, e-mai-David-sunonikid, sibad-wawaad-edarbedgi-arbadiidgi David-onosad.

⁷¹ Sibad-wawaad-baregindidaedgi, Davidʼse gochad. Bab-Dummad, ega e-dulamar-Jacob-wagan-akwega, Israel-dulemar-egad-gued-akwega, Davidʼse gochad.

⁷² David na e-gwage-innikigwadba Israel-dulemar-akwisad, e-binsaed-nue-nikadba dulemar-idudii gusad.