Salmo 77 - Kuna San Blas

Bab-Dummad-ibmar-dummagan-imaksadgi binsaed

Asaf, we-namaked narmaksad. Namaked-idued-Jedutúnʼga soglenaid.

¹ Bab-Dummad an-itogega, an ese binnasuli goled. Suli-suli an itodiidgine, Bab-Dummadse an goted.

² Bab-Dummadse mutikidba bogigusuli an argan-onakgwar gormai daed, degite, amba an-gwage naibi-itodaed.

³ Bab-Dummadgi an binsadele, nue-bukib an itodaed. An egi nue-binsadele, an boddaed, an binsaddaed bar an bendaklegosurye.

⁴ Bab-Dummad, gabsuli be an-imaked. Suli-suli an-itosoggu, geg sunmak an naddaed.

⁵ Ibagan-epenne-nasmalad an insaddaed, birgamar-epenne-nasmalad an insaddaed.

⁶ An mutikidba-namakmaidaed an ebinsaddaed, ulubgi an binsamaidaed, an egismaidaed:

⁷ “¿Ar Bab-Jehová degisadegu anmar-obandiguode? ¿Ar anmargi nued-binsadii bar guosurde?

⁸ ¿Bab-Dummad degisadegu-anmar-sabgudiid bergussi? ¿Bab-Dummad anmarga-ibmar-imakoye-sogsad degisadegu bergussi?

⁹ ¿Bab-Dummad dule-wiledaked iessi? ¿Bela-bela urwemaidba, bar anmar-sabguosurde?”

¹⁰ Geb an sogdesunnad: Bab-Dummad-Bur-Birigined bar epennegii anmarga ibmar imaksulid. We, nue-nunmak an-imaked.

¹¹ Epenne Bab-Jehová-ibmar-dakledisurmalad-imaksad an ebinsaoed. Epenne Bab-Jehová ibmar-gegerdakleged-imaksad an ebinsaoed

¹² Bab-Dummad-ibmar-dummagan-imaksad an egi binsaoed, be-ibmar-dummagan-imaklesadgi an sunmakoed.

¹³ Bab-Dummad, be-ibmar-imaked islidikidbiid. ¡Bab-dummagan-baigan anmar-Bab-Dummadyobid sulid!

¹⁴ Bab-Dummad, be ibmar-dakledisulid-imakedid. Be-gangued dulemar-yar-baid-baidgi-bukmaladse be oyomaid.

¹⁵ Be-ganguedgi, be-dulamar be ollor-imaksad, Jacob-wagan be ollor-imaksad, José-wagan be ollor-imaksad.

¹⁶ Bab-Dummad, demar be-daksagua, be-dobguded, muu-wilasailad be-daksagua, binnasuli giglimakded.

¹⁷ Mogirmar, dii-dummad owialid, nibneggi, malamar gollomakded, nibneggi, malamar ibyeded.

¹⁸ Burwa-bipirmakaled-imbaba be-goled malayobi binnasuli gollomakded, be-mala-ibyemamaid napaneg ibegwar-imakded, napaneg wawanmakded, bela giglimakded.

¹⁹ Demar-abargi, igar be mesisad, Muu-billi be egasad, a-abargi be nasad, degite, be-gannar daksasurmalad.

²⁰ Sibad-wawaadyobi be-dulamar Moisésʼba, Aarónʼba be semai gusad.