Salmo 76 - Kuna San Blas

Bab-Dummad gege-galakued

We-namakleged, Neginotʼba namaklegoye.

¹ Judá-yalagine, bela Bab-Dummad magar-dakmalad, Israel-yalagi, e-nuga dummarba gued.

² Ese-goled-neg Salemʼgi siid, e-meged-neg Sión-yalagi siid.

³ A-yalagine, Bab-Dummad warsi-e-sigumar bibichisad, sigu-abgamalad bibichisad, es-suidmar bibichisad, bila-onolegedgi-ibmar-ebulemalad, bela obelosad.

⁴ Bab-Dummad, bedi dule-gandikidid, bedi yalamar-degisadegu-bukwadba bur gandikidid.

⁵ Dule-bulegan omilede gusmalad, burgwismalad. We-dule-bulegan gannale bar gwisguosurmalad.

⁶ Be, Jacob-e-Bab-Dummad, egi be gwichigusgua, e-moli-urmar, e-molimar geg bar nanae gusad.

⁷ ¡Bebi, unnila be-dobmalad! Be uludegwale, ¿doa be-asabin gwisguoe? Suli, dule gwen gwisguosuli.

⁸ Bab-Dummad, be nibneg-akale igar-nabosad. Bab-Dummad, napneggi san-bipi-imakdimalad-abonogega,

⁹ be gwichiguargusgu, napnega dobee itosad, napnega bogi nagusad.

¹⁰ Dule-begi-urwedimalad aka be-nug-ogannogoed. Dule-begi-urwedimalad-besmaladi aka bega iba-dummad onomaloed.

¹¹ Be-Bab-Dummad-Jehováʼba, ise-ibmar-sogar be imakmar, ega sogedba be ibmar imakmarbalo. Bela yarmar-anmar-neggwebur-dikarba-bukwadi, Bab-Dummad-gandikidga ibmar-ukleged sedamalo.

¹² Ar Bab-Dummadi, dule-dummagan-negdakmamaid obelogedid, napneggi reymar-mamaid-odobguedid.