Salmo 74 - Kuna San Blas

E-isdarmaladgi-bendaklegega Bab-Dummadse gornaid

Asaf, we-namaked-Masquilʼye-nugad narmaksad.

¹ Bab-Dummad, ¿ibiga be degisadegu anmar-obacha? ¿Ibiga be anmarse nue-urwe? Ar be-sibad-wawaadyob-danar-bukwadse, ¿ibiga be nue-urwe?

² Be-dulamar negasailaun be susadi, mer be iego. Be-dulamar begadga-guega be bendaksagusadi, mer be iego. We-Sión-yar-siid be-negga be imaksadi, mer be iebalo.

³ We-neg bela-bibichis-bukwadse be dage, ar dule-be-isdarmalad, bese-goled-neg bela-bibichismalad.

⁴ Bab-Dummad, be-isdarmalad be-onmakedneggi oimakbukwad, nakwis-itomaladba e-bandermar digsamalad.

⁵ Dule sapurba-sapi-sikmaladyob, ibmar-olananai gusmalad.

⁶ Bela ibmar-urgogi-sobarmalad, e-akangi bibichismalad. Mardomargi bela bibichismarbalid.

⁷ Be-neg-siid soogi ogumaksamalad, bela swiri imaksamalad.

⁸ Dule-isdarmalad na e-gwagegi sogsamalad: “¡Bela anmar we-dulemar-obelogo!” ¡Geb we-yargi bese-goled-negmar-bukwad bela ogumaksamalad!

⁹ Anmar, anmar-bander gwen memermaknai bar-daksulid, dule-Bab-Dummad-e-gayaburba-barsogedbela bergusbalid. Anmar we-ibmargunaid-e-ibagan-bergudapoed gwen wissurbalid.

¹⁰ Bab-Dummad, ¿sanadse dule-isdarmalad begi dododii guoe? ¿Sanadse dule-isdarmalad be-nug oichodii guoe?

¹¹ ¿Ibiga be sabsur-odurdaksuli? ¿Ibiga be bai-gwen-daksuli?

¹² Bab-Dummad, bedina bato-sailanagi an-reyga be maid. We-napneggi bendakleged-igar be oyomaid.

¹³ Be-garganguedgi be demar egasbalid, be ibdulamar-dummagan-diakinmalad-e-nono marisad.

¹⁴ Be ibdula-dummad-diakined Leviatánʼye-nugad-e-nono ubigwar be imaksad. Ibdurgan-negsulidganba-gudimalad Leviatán-e-san-gunmalaga be imaksad.

¹⁵ Dii-sailagan-ariogega be imaksad, dianmar-megega be imaksad, diwar-dummagan-mamaid-dinguega be imaksabalid.

¹⁶ Be neg-meegwad nasiksad, mutikid be nasiksabalid. Be nii nasiksad, dad-ibeler be nasiksabalid.

¹⁷ Napneg-naid-e-abingunanaid be mesisad, Be dii-wied-iba nasiksad, yolagued-iba be nasiksad.

¹⁸ Bab-Jehová, nue be ebinsao: Be-isdarad begi ulusad. Dule-galagwensurdamalad be-nug isdar-daksamalad.

¹⁹ Be-dula-belagwa-gudimalad mer be ibdurganga urmake. ¡Be-dula-wiledimalad mer be iego!

²⁰ Bab-Dummad, be-dulaga-be-igar-mesisad be ebinsao, mer be iego. Ar we-napneggi bela neg isgusnaid, bela neg-urwed naid.

²¹ Dule-boniganba-galitodiid, melle be obingegsao. Dule-boniganba-galitodiid, dule-ibmar-abediid, be-nug-odummogega be imake.

²² ¡Bab-Dummad, be-gargangued be oyoge! Be, dule-binsaedsuligudimalad bane-bane begi-urwedimalad, mer be baisurdake.

²³ Be-isdarmalad-begi-oimaknanaid, mer be baisurdake. Ar begi-yoledimalad nue-mergumamaid.