Salmo 72 - Kuna San Blas

Reyga-Bab-Dummadse-golleged

Salomón we-namaked narmaksad.

¹ Bab-Dummad, be-naboged-igar reyga be uke. Be-Igar-innikigwadba-be-ibmar-saedi rey-machiga be uke.

² Adi, rey, innikigwadba be-dulamarga igar nabogoed, wile-itodimaladga innikigwadba igar nudakoed.

³ Yalamar, dulemarga neg-bogidikid nasiknonikoed, yala-mullugan, dulemarga igar-innikigwad ukoed.

⁴ Rey, dule-bukib-binsadimaladga igar nabogoed. Rey, dule-ibmar-nue-abedimalad-e-mimmigana abonogoed, mesagwar-dule-imakdimaladdi, obelogoed.

⁵ ¡Rey-nug odummolesun! Birga-birgaba rey yar-semai guoed. Igi-dad-ibeler birgabargus-naiyob, nii-ibeler birgabargus-naiyob guoed.

⁶ Igi-nainugi ibmar-digar-naidgi dii wiardae, deyob guoed. Igi dii-wied napa-dutuu imakdae, deyob guoed.

⁷ Rey-ibagangi igar-innikigwad dutu-achunnedyob guoed, rey-ibagangi ibmar nasgumai guoed, nii-naid-berguedse ibmarmar nasgumai guoed.

⁸ Rey demar-naid-ugakaase yar-semai guoed, Éufrates-diwar-maid-akale, bela napaneg-naid-ugakaase, rey yar-semai guoed.

⁹ Dulemar-nega-dulesulidganba-mamaid yokorgi-sindigale, rey-asabin dulluu imakmaloed, e-isdarmalad, rey-asabin napa-nagase dulluu imakmaloed.

¹⁰ Tarsis-e-reymar, dulemar-demar-gakagi-bukmaladi, neggweburgi-mani-galeged reyga ukmaloed. Sabá-e-reymar, Seba-e-reymar, ibmar-nuegan-binsa-ukleged reyga ukmaloed.

¹¹ Bela reymar yokorgi-sindigale, e-asabin dulluu imakmaloed. Dulemar-yar-baid-baidgi-bukmaladi, bela ega-arbamaloed.

¹² Rey, dule-ibmar-nue-abediidba wilesagwa-gordiidi bendakoed. Dule-wile-itodiid, dule-e-bendakoyob-binsadiid, rey bendakbaloed.

¹³ Rey, dule-wileged nue-wile dakbaloed, dule-ibmar-nue-abediid nue-wile dakbaloed, dule-wilegana-abonogoed.

¹⁴ Mesagwar-imaklediidgi dule-onogoed, sabsur-imaklediidgi dule-onogoed, ar dule ega bela-bela ibnuedga gued.

¹⁵ ¡Rey-nug odummolesun! Sabá-ormar ega uklesun. Bali-bali ega Babse-gorlesun. Bane-bane egi ise-nued-binsalesun.

¹⁶ Bela-napamargi, ibmar-gwag-gullemalad bukidar nikusun. Bela yalamar-birgi, Líbano-yargi-ibmar-gwag-gullemalad-nikayobi nikusun. Dulemar, gagan-nainugi-ainieyobi, neggweburgi mergusun.

¹⁷ Degisadegu rey-nug biledii gusun, dad-ibeler-naiyob e-nug naguoed. Bela dule-yar-baid-baidgi-bukmaladi rey-nuggine, dule-baigangi ise-nued-binsadii gumarsun, Bab-Dummad-egi-nued-binsasye sogmarsun.

¹⁸ Israel-e-Bab-Dummad-Jehová-nug odummolesun, unnila abi ibmar-gegerdaklemalad-imaked maid.

¹⁹ ¡Degisadegu, e-nug-gandikid odummoledii gusun! ¡Bela napneggi e-yeerdakleged neg-ganai gusun! ¡Deyob-gusun!

²⁰ Isaí-machi-David, Bab-Dummadse-goled-narmaksadi, wese bergunaid.