Salmo 71 - Kuna San Blas

Dador-Babse-goled

¹ Bab-Jehová, an begi bensulid, mer bipisaar bingeguega be an-imake.

² Be-igar-innikigwadba be an-bendake, be an-ollorsae, wis be an-itoge, be an-bendake.

³ Bee be, an-akwasaila-dukuedga gue, adi, an ase bali-bali dukudii guegar. Bedi an-bendakega be igar uksad. Be an-akwasailaga gued, bedi an-ganguedid.

⁴ An-Bab-Dummad, dulemar-isgana-e-ganguedgi be an-ollorsae. Dule-isgudimalad-e-ganguedgi, be an-ollor-imake. Emar-sabsur-imakmalad-e-ganguedgi be an-ollorsae.

⁵ Ar bedi, Bab-Dummad-Jehová, an-bendakedid. Sapingwagwad-akale, an begi bengudisulid.

⁶ An sapidukugi-mai, be an-akwide gusad. Bee be, muu-neggi-mai we-napnegse be an-odesad. A-ulale, degisadegu an be-nug-odummodii guoed.

⁷ Dulemarga an ibmar-gegerdaklegedyob gued, ar bedi an-odukued-gandikidid.

⁸ Bab-Dummad, bali-bali an be-nug odummoged, be-ganguedgi, be-yeerdaklegedgi an sunmakdii osedoddaed.

⁹ Bab-Dummadye, an seredgusale, mer be an-obano, an-gangued bergudele, mer be an-obano.

¹⁰ Ar an-isdarmalad angi sunmakmalad, an-oburgwebimalad na muchub-muchub angi sunmakmalad,

¹¹ weyob sogmalad: “Bab-Dummad we-dulegi bar binsamaisurye. Anmar baleginmala, ganamala, ar dule-e-bendaked sated.”

¹² Bab-Dummadye, mer be angi bangue, an-Bab-Dummad, gwae be an-bendakdage.

¹³ An-isdarmalad bingegumarsun, burgwemarsun. An-oakalobimalad, bela-bela bingegumarsun, bela-bela oesgudii gumarsun.

¹⁴ Ar andi begi degisadegu benguosulid, bur bule an be-nug-odummodii guoed.

¹⁵ Be-Igar-innikigwad, be-abonoleged-igar, amba an wissuli-inigwele, an egi sunmakdii osedodoed.

¹⁶ Bab-Dummad-Jehová, be-ganguedba-be-ibmar-imaksad an sogoed, be-igar-innikigwad an ebinsaoed, unnila abi an ebinsaoed.

¹⁷ Bab-Dummad, sapingwagwad-akale, be an-odurdaksad, amba emise-bakale, an be-ibmar-gegerdaklemalad-imaksadgi an sunmakdiid.

¹⁸ Bab-Dummad, an-seredgusale, an nono-dableargusale, mer be angi banguo. Amba dulemar-danimaloedga be-ganguedgi an sunmakbied, amba yoo-gwalulemaladga be-garganguedgi an sunmakbied.

¹⁹ Bab-Dummad, be ibmar-dummagan imaksad, be-igar-innikigwad nibnegse warmakmaid. Bab-Dummad, dule beyobid sulid.

²⁰ Bedi, surbinsa-itolegedba galitonai an-imaksad, wile-itolegedba galitonai an-imaksad. Degi-inigwele, gannar be an-ogannogoed, napa-urba-mai gannar be an-odurguoed.

²¹ An-nug-dummarba be imakoed, gannar be baisur-itoge an-imakoed.

²² Deyobi, an bega gar-salterioʼba doggus-nuedye sogoed, An-Bab-Dummad, innikigwadba-be-ibmar-imakedgi gar-arpaʼba an bega namakoed, Israel-Bab-Dummad, an bega gar-liraʼba namakoed.

²³ An bega namakdele, an weligwaledgi bega namakoed, ar ade, be an-abonosad.

²⁴ Deginbali, be-igar-inniki-imaksadgi an sunmakdii guoed. An-oakalobimalad nue-bingegusmalad, nug-bipii gusmalad.