Salmo 7 - Kuna San Blas

Ega igar-nabogega Bab-Dummadse goled

Bab-Jehováʼga Sigaiónʼgi namaksad.

¹ An-Bab-Dummad-Jehováʼye, be an-bendake, ar an begi bendakleged amied. ¡Dulemar-an-balegindimaladgi be an-bendake! ¡Amargi be an-ollor-imake!

² Ar be an-bendaksulile, ¿doa bar an-bendakosunna? Dule-baid an-bendaked sated. Ar igi achumigur dule-ichimake, deyobi, an-isdarmalad an-imakmaloed. Ar igi achumigur dule-gunne, deyobi, an-obelomaloed.

³ An-Bab-Dummad-Jehováʼye, we-ibmar-soggwengi nosa be an-dakdibe: An ibmar-isgana imaksadibe,

⁴ an-aigi an nue-yolesdibe, an-isdarad-ibe an yogasaar ibmar-susdibe,

⁵ adi, an-isdarmalad an-baleginner, akarsurdo, an-isdarmalad an-bargado, dii-dii napagi an-oburgwedse angi annamardo. An-nug-dummad-nikad obelomalar, akarsurdo.

⁶ Bab-Jehováʼye, be sae-itogedba an-isdarmalad-anse-urwebukwadgi be gwisgudage. Anga be igar nabodage. An-Bab-Dummadye, anba be nague, igar-innikigwadba be anga igar naboge.

⁷ Bab-Jehováʼye, dulemar-baid-baid be-asabin-ambikuega be imake. Nibnega-akar a-dulemar-e-saila-dummadga be gue.

⁸ Bab-Jehováʼye, be dulemarga igar itosoggu, an-ibmar-inniki-imakdiidba be anga igar itoge, an-nossulidba be anga igar naboge.

⁹ Bab-Jehová, bedi Bab-Dummad-innikigwadid, bedi dule-binsaed bela baramied. Degisoggu, dule-isganamar-e-ibmar-isgana-imakdimalad be obeloge. Dule-nuegandi, melle be osikirmakega imake.

¹⁰ Bab-Dummad, sigu-abgaedyob an-irwa-gwisguedid, Bab-Dummad, na dule-gwage-ulubgi-inniki-binsadimalad bendakedid.

¹¹ Bab-Dummad, dulega igar-itogedgine, innikigwadba ega igar nabiroged, bane-bane dule-isganamar sabsur-odurdaked.

¹² Ar dule-isganamar, na e-isguedga bukib-binsasulile, amar-idu, Bab-Dummad es-suid-e-nugar ebinoed, amar-idu e-warsi guagwar dakbaloed.

¹³ Ar deyopira, Bab-Dummad ibmar-dule-gindakmalad guagwar urbisbalid, sigu-sooba-gamalad sobsabalid.

¹⁴ Dule-isgana, igar-isganaginbi binsadaed, ibmar-isgana-imakega igar amidaed, geb igar-isgana imaknonidaed.

¹⁵ Dule-isgana, yaa-matusur akwisad. A-yaa-matusulidgi na dukin argwanoed.

¹⁶ Dule-isgana, na e-igar-isgana-imaked egi aibinoed, e-sabsur-urwed egi aibinoed.

¹⁷ Bab-Jehová anga igar-inniki-nabosadba, an e-nug odummogoed. Bab-Dummad-Bur-Birigined-Jehováʼga, an namaked.