Salmo 67 - Kuna San Blas

Bela-dule-bukwamalad Bab-nug odummomar

Namakmalad-e-iduedga soglesad, we-namakedi Neginotʼba namakoye.

¹ Bab-Dummadye, wile be anmar-dake, be anmargi nued-binsae, bela-bela be-sabgued be anmarga oyoge,

² adi, we-napneggi be-igar wisgumalagar, bela dule-yar-baid-baidgi-bukwamalad be-abonoged wisgumalagar.

³ Bab-Dummad, dulemar be-nug odummomala, bela dulemar be-nug odummomala.

⁴ Dule-yar-baid-baidgi-bukwamalad wergumala, weligwaledgi namakmala. Bedi, dulemarga innikigwadgi igar naboged. Napneggi dule-yar-baid-baidgi-bukwamalad-e-iduedga be gued.

⁵ Bab-Dummad, dulemar be-nug odummomala, bela dulemar be-nug odummomala.

⁶ Napneggi bela ibmar-durba sanmakoed, Bab-Dummad, anmar-Bab-Dummad, anmargi nued-binsaoed.

⁷ Bab-Dummad, be anmargi nued-binsaoed, bela we-napneggi-yarmar-nanaid-ugakaase Bab-Dummad-dobgumaloed.