Salmo 65 - Kuna San Blas

Bab-Dummad-nug odummolegergebed

David we-namaked narmaksad. Namakmalad-e-iduedga soglenaid.

¹ Bab-Dummad-Sión-yargi-maid, be-nug odummolesun. Ibmar-imakmaloye-sogsamalad bega imakmalargebed.

² Bab-Dummad, dule-bese-goled be itodaed, degisoggu, bese bela dulemar nonimaloed.

³ Anmar-ibmar-isgana-imaked anmargi obined, degi-inigwele, anmar-isgued be anmarga osulodaed.

⁴ Dule-wargwen be susale, we-dulegi nued binsalesad. We-dule, be-neggi-gudiguega, bese be senonidaed.

⁵ Bab-Dummad, be anmar-Abonogedid. Ibmar-innikigwadba be anmar-abin-imakdaed. Dulemar we-napneg-naid-ugakaase-bukmaladi bela begi bensurmalad. Dule-demar-obakar-dikasur-bukmaladi begi bensurmarmogad.

⁶ Bab-Dummad, bee, be-ganguedgi yalamar be nasiksad, agi be-gangued be oyomaid.

⁷ Bee, muu-billi-uurmakmaid obogileged, muu-billi-welegan-uurmakmaid bogidik be imaked, dulemar-oimakbukwad be osuloged.

⁸ Degisoggu, dulemar dikasuli-bukmalad be-ibmar-dakledisulid-imaked dobdamarsunnad. Dulemar-dad-nakwedsik-bukmalad, dad-argwanedsik-bukmalad be weligwar-ito imaked.

⁹ Bee be, napa nue-akwed. Napagi gatik ibmar sanmakega egi be dii owied. Dian-dummad-Babagadi gege-dinguedi, bela ibmar-sanmakega imaked.

¹⁰ Napa-guremaladgi dii be owied, agi dii be osurmaked, diigi napa be odutumaked. Napagi ibmar sanmakega be imaked. Weyobi, be-dulamarga-be-mas-ukega, napa guakwaa be-dulamarga be nasiked.

¹¹ Be birga-nued nasikmaid, be ibmar unniguar-nika imakmaid.

¹² Nega-dulesulidgangi gaganmar aradikid, yar-mullugan ber weligwaled.

¹³ Nebagangi sibadmar, sibad-wawaadmar, obiryamakded, orosgi-dakleged agi nue naibalid. ¡Bela agine ibmar-durgan oimakded! ¡Bela namakedibimalad!