Salmo 64 - Kuna San Blas

Babse-goled, dule-isganamargi an-bendakye

David namakmalad-e-iduedga we-namaked narmaksad.

¹ Bab-Dummadye, an-ibmar-isdar-itogedi, an bega sognaidi, wis be itoge. Bab-Dummadye, be an-bendake, an-isdarmalad dobe an itodiid.

² Dule-isganamar-anbina-itosgudimalad-idu, be an-odukue. Dule-ibmar-isgana-imakmaladgi, be an-onoge.

³ Es-suid-nugar-datarmakle-daebayobi e-gwabin-duku imakmalad. Igi sigu-milege, debayobi, e-gwabin-duku gayaburba-isganagan dulegi mied.

⁴ Dule-gwen-neg-oakalossulidgi, yamo arbakee gwichiguddamalad, wile-gwen-daksuli, dulegi aibitedamalad.

⁵ Dule-isganamar, na muchub-muchub e-igar-isganagi ogannobukwadamalad. Idu igar-amibukwadamalad, igi imakmalodibeye. Sogdedamarbalid: “¿Ar doa anmar-dakosunna?”

⁶ Dule-isganamar igar-isgana-nue-amibukwadamalad, sogdamalad: “Anmar igar-napiragwad amibukwamalad.” Dule-binsaedi ibiyobi, nue-akusunna itolege.

⁷ Bab-Dummaddi a-dulemargi e-sigu midoed. Wissuli-bukwadgi galedamaloed.

⁸ Dukin na e-gwabin-sunmakedgi sabsur-odurdaklemaloed. Doa deyob dakdagoe, egi dodoar sunmakdoed.

⁹ Bela dulemar-bukwadgi dobed nagunonikoed. Degidgine, Bab-Dummad-ibmar-dummagan-imaksadgi sunmakdemaloed. Agine, magar Bab-Dummad-ibmar-imaksadgi binsadmaloed.

¹⁰ Dule-nuegan, Bab-Jehováʼgi wergudmaloed, egi bensuli gudmaloed. Dule-gwage-nuegan yeer itodmaloed.