Salmo 6 - Kuna San Blas

Bonigan-abalagi Bab-Dummadse goled

We-namaked, Seminitʼye nugad.

¹ Bab-Jehováʼye, melle ise-urwaledgi be sabsur-an-odurdake, melle sae-itogedgi be sabsur-an-imake.

² Bab-Jehováʼye, wis be wile-an-dake, ar an boniganba nue negoebied. Bab-Dummadye, be an-bendake, ar an-abagan nue-bibichis itoleged.

³ Bab-Jehováʼye, ¿sanase be an-bendaknonikoe? Emide, an nue-naibid-dummad itonaid.

⁴ Bab-Jehováʼye, be sabed-nikarbadbali, wis be an-bendakdage, mer baisur be an-dake.

⁵ Ar dule-burgwarmaladdi, bar begi binsamamaisulid. Ar neg-urbardi, ¿doa be-nug odummogoe? Gwen dule be-nug odummogosulid.

⁶ Bela-bela an bodiidbali, gege an sagusad. Bane-bane mutikidbali gachiyala, an ise-ogormakar maidaed. An-ibyanisbali, an-gas-megedi dinnasurgus naidaed.

⁷ An-isdarmalad-nukad, an-ibya an-ibe mommoleded. An-ibya, nunmakedbali, nue bar ataksurgusad.

⁸ ¡Dule-isganamar! Be angi bangumala. Ar Bab-Jehová, an-bodiid itononikid.

⁹ Bab-Jehová an ese wilesakwaa-gornaid an-itononikid. An-ese-gornaid an-itosad.

¹⁰ Ar bela an-isdarmaladi, surbinsa-itodmaloed, an-isdarmaladi, bingegudmaloed. Bingegudedba wakitemaloed.