Salmo 59 - Kuna San Blas

E-isdarmaladgi e-ollorsaega Babse-goled

Deunni, Saúl, David-oburgwega e-sordamar David-negse barmisgu.

¹ Bab-Dummadye, an-isdarmaladgi be an-ollorsae, angi aibinmaladgi be an-bendake.

² Dule-ibmar-isgana-imakmaladgi be an-ollorsae, dule-gindakmaladgi be an-bendake,

³ ar an-oburgwebimalad. Bab-Jehová, an nossulinad, an isgussurbalinad, degite, dule-isganamar angi-aibinmalaga na atosmalad.

⁴ An ibmar-isgana imaksasur-inigwele, degite, an-oburgwebimalad. Bab-Jehováʼye, be gwae-dage, be an-bendakdage. Be dake, igi an be-asabin gwichi.

⁵ Bab-Jehová, be, Bab-Dummad-Bur-Gangued-Nika-Maid. Be, Israel-e-Bab-Dummadid. Dule-yar-baid-baidgi-bukwamalad-sabsur-odurdakega gwae be dage, dule-isgana-emargi-aibinmalad, mer be wiledake.

⁶ Dule-isganamar, mutikidbali achumar-urwedidaedyobi gannar nonidamalad, geb neggweburgi bipirmakdidamalad.

⁷ Yogasaar sunmakmalad, emargi yolegar sunmakmalad. An-itogosurmaladdeeye sogdedamalad.

⁸ Bab-Jehová, ar bedi we-dulemarga be alled, bela dule-yar-baid-baidgi-bukwamaladgi be dodoged.

⁹ Ar be an-ganguedsoggu, an begi bensulid. Ar be an-odukuedid.

¹⁰ Be, Bab-Dummad-wile-an-daked an-iduoed. Bab-Dummad an-isdarmalad-galakued anga oyogoed.

¹¹ An-dulemar mer a-dule-isganamar-iegega, mer ilagwen-obelogar be imako. Be, Bab-Jehová, sigu-abgaedyob an-irwa-gwisguedid. Be-ganguedgi be oaisakie, be-garganguedgi be irgwensur-imake.

¹² Na e-ibmar-isgana-sogedba, e-sunmakedba, emar-ukabsaedba, e-gakansaedba, san-dummarba-imakdimaladba, na dukin yardaklemarsun.

¹³ Bab-Dummad, urwedgi be amar-obeloge, mer bar dulagudigumalaga be obeloge. Deyobi, bela Israel-yargine wisgumaloed, Bab-Dummad bela we-napneg-ugakaase, negdakmaiye.

¹⁴ Dule-isganamar, mutikidbali achumar-urwedidaedyobi gannar nonidamalad, geb neggweburgi bipirmakdidamalad.

¹⁵ Masgunned-amiega gaamakdidamalad, immelessurmalale, mutikidba urwedidamalad.

¹⁶ Bab-Dummad, ar andi be-ganguedgi an namakoed. Wakudaryalaba be-dula-wiledakedgi an namakoed, ar bedi an-bendakedid. An-surbinsa-itoged-ibagi bedi an-dukuedid.

¹⁷ Be, an-ganguedid, an bega namakoed, ar bedi, Bab-Dummad, an-dukuedid. Bab-Dummad, be an-sabedid.