Salmo 56 - Kuna San Blas

Bensulidgi Bab-Dummadse-goled

Agi David Mictam-narmaksad.

¹ Bab-Dummadye, wile be an-dake, dulemar an-balegindii nanaed. Bane-bane sae-an-dakmaladi, an-wiodimalad.

² Bane-bane an-isdarmaladi, an-balegindii nanaed. Dule-san-dummarba-imakdimaladi, bukidar angi gwisgudimalad.

³ An dobe-itoalile, begi an benguosulid.

⁴ Bab-Dummad, an begi bensulid, an be-gayaburba odummoged. Bab-Dummad, an begi bensulid, an dobe-itosulid. Degisoggu, ¿ar igi dule an-imakosunna? Dule akar an-imakosulid.

⁵ Bane-bane an-sunmaked oakaloddamalad, gusgu an-oakalogedgi binsadamalad.

⁶ Danakwaa ambikusdamalad, na dukusdamalad. An-oburgwed na yeer-itomalad. Yamo arbakee an-ibmar-imaked dakdimalad.

⁷ Bab-Dummad, we-dulemar be sabsur-odurdaksun. Melle begi wakinnega be imako.

⁸ An-bukib-binsadiid be nue-wisid. An-ibyanis-aryodiid be daksabalid ¿Ar we-ibmar be-gardagi narmakar maisursi?

⁹ An-bendakega na bese gotele, an-isdarmalad duurmakdoed. Ibmar-soggwen an wisid: Bab-Dummad, nue anba naid.

¹⁰ Bab-Dummad, an begi bensulid, be-gayaburba an odummoged. Bab-Jehová, an begi bensulid, be-gayaburba an odummoged.

¹¹ Bab-Dummad, an begi bensulid, an dobe-itosulid. Degisoggu, ¿ar igi dule an-imakosunna? Dule akar an-imakosuli.

¹² Bab-Dummad, an be-asabinni ibmar-saoye-an-sogsadi, angi siid. Ibmar-uklegedi, an bega ukoed.

¹³ Bab-Dummad, burgwedgi be an-ollorsasad. Igar-bulegangi be an ollor-imaksad. Adi, be-asabinni, neg-meegwadgi dula-nanadii guegar.