Salmo 55 - Kuna San Blas

Balegillediidba-Babse-goled

Namakmalad-e-iduedga soglesad: Neginotʼba namakoye.

¹ Bab-Dummadye, an bese-goled be an-itoge, an bese-wilenaid mer be an-itosuli gue.

² Be an-itoge, be an-abin-imake. Ar an-surbinsa-itogedi, anga gwage-bogidikid uksulid.

³ Dule-isdarmalad-sabsur-ibmar-soged an dobe itoged, dule-isganamar-e-sabsur-dule-imaked wile-ito an-imaked, ar gakansaar angi sunmakmalad, nue-urwedgi an-baleginmalad.

⁴ Ulubgi gwage nunmak an itoged, angi bela-bela dobe-burgwed nagunonikid.

⁵ Dobedbali an wawanmakgwichid, bela-bela an dobe itoged.

⁶ Geb an-sogsad: “¡Nuuyobi an sakan-nikana gadin! Adi, an gukusaled. Obunnoged-neg an aminadeled.

⁷ An wegine dikasur wakiteled, nega-dulesulidgangi an megisaled.

⁸ ”Burwa-dummad-idu-wakinnega, dukued-negse an gwae wakiteled.”

⁹ Bab-Dummadye, we-dulemar be obeloge, e-sunmakmalad aku-ito be imake. Ar unnila neggweburgine sabsur-imakmaladbi, abin-abin-imakmaladbi an daked.

¹⁰ Mutiki, ibgine, e-galu-matusulid-ebirdii damalad, e-galu-matusulid-yabali ibmar-isganabi, yamo-dulemar-yardakedbi neg naid.

¹¹ E-galu-matusulidgindi dule-obelogedbi neg naid, e-igar-imbaganbardi dule-wiogedbi, dule-yardakedbi neg naid.

¹² Ar an-isdarad an-obinge-imaksana, an na san bargasanad. Ar dule-isdar-an-daked mesagwar an-imaksana, an e-idu dukusanad.

¹³ Ar emigindi, bee be weyob an-imaksad. Be an-ai-nuedid. Be anyob dule gumogad. Be an-sordad, be an-ai-bur-walikagwadid.

¹⁴ Be nuedgi anbo-walikaa gudidaenad, ai-nuedgi be anbo Bab-Dummadse-goled-neggi gudidaenad. Emigindi, bee be angi weyob yolesad.

¹⁵ Burgwed ukiagwar an-isdarmaladgi yolesunna, neg-uangi napa-yaba dula odelesunna, ar e-neg-yaurgi ibmar-isganabi nikad.

¹⁶ Ar andi Bab-Dummadse goloed, Bab-Jehová an-bendakoed.

¹⁷ Wakdaradba, yorukudba, mutikidba an surbinsa-itogedgi Bab-Dummadse goloed, edi an-itogoed.

¹⁸ Ar dulemar bukidar angi aibinmar-inigwele, Bab-Dummaddi bogidikidgi angi-bila-ononanaidgi an-onogoed.

¹⁹ Bab-Dummad-gusgu-dummadga-maiguad an-itogoed. Bab-Dummad an-isdarmalad ibgwensur-imakoed. Ar wemar na e-daed ogwasurmalad, gwen Bab-Dummad dobsurmarbalid.

²⁰ Dule-isgana dule-ebo-nued-gudiidgi aibined, e-igar-mesisadgine annaed.

²¹ Na e-ibmar-sogedi ochii ibmar-nueganbi soged. E-gwagegindi bila-onogedginbi binsanaid. Na e-sunmakedi, innikii sunmak itolegenad. Degi-inigwele, esyobi dule-naibi-imaked.

²² Bab-Jehováʼga, be-bukib-binsaed be soge, na e be-bendakoed. Ar Bab-Dummad, dule-nued degisadegu-galakudii imakosulid.

²³ Bab-Dummad, bedi dule-isganamar oburgoed, napa-gullu-yaa be barmetoed. Dule-ablis-eodimaladi, dule-emar-yardakdimaladi, undar-dikasur dula-gudii guosurmalad. Ar andi begi bensulid.