Salmo 53 - Kuna San Blas

Dule-ibmar-isgana-imakmalad

David namakmalad-e-iduedga we-namaked narmaksad.

¹ Dule-binsaedsulidaed, e-gwagegi sogdiid: “Bab-Dummad maisurye.” We-dulemar nue-isgusgudidimalad, unnila ibmar-isganabi imakdidimalad. ¡Bipisaale dule ibmar-nued-imaked sated!

² Bab-Dummad, nibneg-akale dulemar-napneggi-bukmalad dakded, abakalegi, dule-wargwen binsaed-nikadaed gudiile, abakalegi, wis dule-wargwensaar Bab-Dummad-amibied gudiile.

³ Bab-Dummad dakalid, bela dulemar egi bangus gudidimala, bela nue-isgus gudidimala. Wargwensaale ibmar-nued-imaked suli, bipisaale wargwengiid ibmar-nued-imaked, sate.

⁴ Dule-ibmar-isgana-imakdimalad akusunna itomalad, amarde, madu-gunneyob an-dulamar-imakdimalad, Bab-Dummadse gordisurmarbalid.

⁵ Dule-isganamar dobguewilubsurmalanad, degite, bela-bela dobedba wawanmakdemaloed. Bab-Dummad we-dulemar-obachadbali, be-isdarmalad-e-garmar oaisakioed. Bab-Dummad dule-isgana obingesaoed.

⁶ Bitigi Israel-neggwebur-bendakleged Sión-yar-akar danikina gadin. Bab-Dummad na e-dulamar gannar e-yarse senonikile, Jacob-e-wagan wergudmaloed, Israel-dulemar weligwar itodmaloed.