Salmo 52 - Kuna San Blas

Dule-isgudiid, binsa san-odummodiid

David Ahimelec-negse nadye. Namakmalad-e-iduedga soglenaid.

¹ Be, na-san-buled-imaked, ¿ibiga be-isguedgi be san-dummarbaa imake? ¡Bab-Dummaddi dule-sabgumaiguad!

² Be-gwabin-duku, esbipi-nugar-datarmakaledyobid, emar-obelogedginbi binsaed, gakanginbi sunmaked.

³ Igar-nuedba bur bule, igar-isganabina be soged. Igar-nabiridba bur bule, gakansaedbina be itoged.

⁴ Gakansaed-gwabin-duku be sediid. Be-sunmakedgi emargi-urwed be yeer itodaed.

⁵ Bab-Dummaddi, ilagwen-be-obelogar imakoed. Be-negyaurgi be-onogoed, we-napneggi be-obelogoed.

⁶ Dule-nuegan, we-ibmar dakmaloed, nue-dobee itodmaloed. Weyob be-annik dodoakwaa sunmakdemaloed:

⁷ “We-dule-isgana, Bab-Dummadgi-bendakleged-amissulid, be dakmala. Unnila ibmar-nue-nikadba na yeer itosad, e-ibmar-isgana-imakedgi gwen bangussulid.”

⁸ Andi, Bab-Dummadse-goled-neggi olivo-sapi-durbamakar-daedyob gued. Andi, degisadegu, Bab-Dummad-e-sabguedgi bensulid.

⁹ Bab-Dummad, andi be-ibmar-imaksadba be-nug-odummodii guoed. Bede dar dule-nuedsoggu, begine an bensuli gudioed. Dule-nuegan-abargi an bese gordii guoed.