Salmo 49 - Kuna San Blas

Coré-wagan we-namaked narmaksad. Namakmalad-e-iduedga soglenaid.

¹ Bela bemar, nue an-itomar. Bela bemar, we-napneggi-bukmalad, nue be an-itomar.

² Dule-dummagan, dule-binsarmalad, dule-mani-nikamalad, dule-wilegana, nue be an-itomar.

³ An sunmakoedi, nue-binsaed-nikaa an sunmakoed. An-ulubgi-binsaedi, nue-magar-itole an sogoed.

⁴ Ibmar-binsaed-nikaa-soglemalad nue-itoakwaa an sogoed. Gar-arpa-ogorsiidgi we-ibmar-soglegoed-e-obared an bega odulogoed.

⁵ Ar bonigan dani-sogele, ¿ibiga dobee an itogoe? Dule-isganamar an-ebilis ambikunonimalale, ¿ibiga an dobguoe?

⁶ Dule-mani-nikadba-dobsuli-itodimalad, na e-ibmar-nikadba san-dummarba-imakdimalad, ¿a-dulemarde an dobguode? Suli, an dobguosuli.

⁷ Dule wargwensaale na dukin bendakosulid. Na dukin burgwedgi san-onogegala, geg Bab-Dummad-bennuked.

⁸ San-onolegedi gargesailad. San-onolegegala, mani unniguarsulid.

⁹ Dule degisadegu dula-gudii guosulid. Dule burgosurdeeye sogsulid, burgwedsegad.

¹⁰ Bela dulemar burgwedbiid, dule-binsaed-ibedi, dule-binsaedsulidi, bela burgwedsemalad. E-ibmar-nikadi dulemar-baiganga beoed.

¹¹ Ar nainu ichesur-nikus-inigwele, neg-uangi degisadegu mai guoed.

¹² Ar dule mani-ibed-inigwele, degisadegu dula-gudiguodeeye sogsulid. Ibdurganyobi burgwemarmogoed.

¹³ Weyobi, dulemar e-manigi-alakwaa-gudimaladi, berguddamalad. Na dukin san-dummarba-imakmaladi, weyobi, berguddamarmogad.

¹⁴ Igi sibad-iduged e-sibad-wawaad-semaidae, deyobi, burgwed we-dulemar-semai gumogoed. E-neg-dummagan-nuegan-daklemaladgi, dikasuli e-mui neg-uangi nungumai guoed. Yoedsega dule-nuegan negsemamai gumaloed.

¹⁵ Ar Bab-Dummaddi burgwedgi an-ollorsaoed, Bab-Dummad eba an-sedoed.

¹⁶ Dule-wargwen mani-ibedga-gudele, mer bai be dako, e-neg yeerdakle nadele, mer geg be dako.

¹⁷ Ar we-dule burgwidele, na e-ibmar sedosulid, e-ibmar-yeerdaklemalad eba naosulid.

¹⁸ Ar we-napneggi dula-gudigua, weligwar itodigus-inigwele, dulemar e-nug-odummodigusmar-inigwele,

¹⁹ we-dule, e-babgan-burgwismogayobi, burgwemogoed, we-napneggi bar gudii guosulid.

²⁰ Ar dule mani-ibed-inigwele, na aku itoged, ede ibdurgan-burgweyobi, burgwemogoed.